​ប្រែ​សម្រួលៈ​បំណង​(CNA)៖​អង្គការ​ប៉ូលិស​អន្តរជាតិ​ហៅថា​អាំងទែរ​ប៉ូល​(Interpol)​កាលពី​ថ្ងៃ​ព្រហស្បតិ៍​ទី​១០​កុម្ភៈ​បាន​និយាយថា ខ្លួន​មិន​អាច​ជួយ​ប្រទេស​ដែល​កំពុង​ជាប់​ក្នុង​ស្ថានការណ៍​ជម្លោះ​​នយោបាយ​ផ្ទៃក្នុង​បានទេ​។​ការអះអាង​ដូច្នេះ​ធ្វើ​ឡើង​តែ​ពីរ​ថ្ងៃ​បន្ទាប់​ពី​យោធា​មី​យ៉ាន់​ម៉ា បាន​ប្រកាស​សុំ​អោយ​អង្គការ​ប៉ូលិស​ពិភពលោក​នេះ​ផ្តល់​ការគាំទ្រ​។​

​ក្រសួងការបរទេស​មី​យ៉ាន់​ម៉ា​បាន​និយាយ​កាលពី​ថ្ងៃ​អង្គារ​ថា ខ្លួន​បាន​អំពាវនាវ​អោយ​អង្គការ​សន្តិសុខ​អន្តរជាតិ​ផ្សេងៗ​ធ្វើការ​ជាមួយ​មី​យ៉ាន់​ម៉ា​ដើម្បី​ប្រយុទ្ធប្រឆាំង​នឹង​«​ភេរវកម្ម​» ដោយ​ចង់​សំដៅ​​ទៅរក​អំពើ​របស់​ពួក​ប្រឆាំង​អាជ្ញាធរ​យោធា រួម​មាន​រដ្ឋាភិបាល​ឯកភាព​ជាតិ​(NUG)​ដែល​ជា​រដ្ឋាភិបាល​ស្រមោល​ផ្សំ​ឡើង​ដោយ​សមាភាព​រដ្ឋាភិបាល​មុន​។

​អ្នក​តវ៉ា​ប្រឆាំង​នៅ​មី​យ៉ាន់​ម៉ា រង​ការបាញ់​គ្រាប់​បែកផ្សែង​ដាក់​ក្នុង​បាតុកម្ម​កាលពី​ឆ្នាំ​២០២១​នៅ​ទីប្រជុំជន​កា​ឡេ ។​អាជ្ញាធរ​យោធា​ចាត់ទុក​ពួក​អ្នក​ប្រឆាំង​នឹង​រដ្ឋប្រហា​រ​ជា​ពួក​ភេរ​វករ​

​សេចក្តីថ្លែងការណ៍​របស់​អង្គការ​ប៉ូលិស​នេះ បាន​និយាយថា « អាំងទែរ​ប៉ូល​នឹង​មិន​ផ្តល់​ជំនួយ​សំរាប់​សំណើ​ណាមួយ​ដែល​អាច​ទាញ​អោយ​ខ្លួន​ចូលក្នុង​បញ្ហា​ពាក់ព័ន្ធ​នឹង​នយោបាយ​ផ្ទៃក្នុង ដូច​ជា​សំណើ​​ចាប់ខ្លួន​ជន​ប្រឆាំង​នយោបាយ ឬ​អ្នក​រិះគន់​រដ្ឋាភិបាល​»​ទេ​។​

​រដ្ឋមន្ត្រីការបរទេស​មី​យ៉ាន់​ម៉ា​ដែល​តែងតាំង​ឡើង​ដោយ​យោធា លោក វុន​ណា ម៉ោង​លីន​(Wunna Maung Lwin)​បាន​ជួបប្រជុំ​ជាមួយ​ឯកអគ្គរដ្ឋទូត​និង​មន្ត្រី​អង្គការ​សហប្រជាជាតិ​នៅ​ក្រុង​យ៉ាងហ្គោន​​កាលពី​ថ្ងៃ​អង្គារ​។​ក្នុងអំឡុងពេល​ប្រជុំ​នេះ​លោក បាន​ចោទប្រកាន់​ក្រុម​រដ្ឋាភិបាល​ឯកភាព​ជាតិ​(NUG) គណៈកម្មាធិការ​តំណាង​យី​ឌូង​ស៊ូ លូត​តាវ​(CRPH)​និង​កងកម្លាំង​ការពារ​ប្រជាជន​(PDF)​ថា​សុទ្ធ​​តែ​ក្រុម​ភេរវកម្ម ដោយ​ពួកគេ​បាន​ប្រព្រឹត្ត​អំពើ​ដូច​ជា​កាប់សម្លាប់​ជន​ស៊ីវិល​ស្លូតត្រង់ បុគ្គលិក​កងក​ម្លាំងរដ្ឋាភិបាល និង​បំផ្លាញ​អាគារ​រដ្ឋ ដូចជា​សាលារៀន មន្ទីរពេទ្យ​និង​ស្ពាន​។​

CRPH ត្រូវបាន​បង្កើន​ឡើង​ដោយ​ក្រុម​សមាជិក​សភា​ដែល​ត្រូវ​បណ្តេញចេញ​ពី​តំណែង​ក្នុង​រដ្ឋប្រហារ​ថ្ងៃ​១​កុម្ភៈ​។​រដ្ឋាភិបាល​ឯកភាព​ជាតិ​(NUG)​និង​PDF​ត្រូវបាន​បង្កើតឡើង​ក្រោម​មកទៀត​ដើម្បី​ដឹកនាំ​​ប្រជាជន​អោយ​ប្រឆាំង​នឹង​ការគ្រប់គ្រង​យោធា​បច្ចុប្បន្ន​ហើយ​ស្តារ​ការគ្រប់គ្រង​ស៊ីវិល​ឡើងវិញ​។​

​ក្នុង​សេចក្តីថ្លែងការណ៍​មួយ ក្រសួងការបរទេស​មី​យ៉ាន់​ម៉ា បាន​និយាយថា ខ្លួន​បាន​ជូនដំណឹង​ទៅ​បណ្តា​អង្គការ​ប្រឆាំង​ភេរវកម្ម​របស់​អង្គការសហប្រជាជាតិ​និង​អាស៊ាន បណ្តា​ប្រធាន​ប៉ូលិស​អាស៊ាន​(​អាស៊ាន​ប៉ូល​)​និង​អាំងទែរ​ប៉ូល អោយ​ថ្កោលទោស​ក្រុម NUG, CRPH, PDF​។​ក្រសួង​បាន​អំពាវនាវ​អោយ​មាន​«​កិច្ចសហប្រតិបត្តិការ​វិជ្ជមាន​នៅក្នុង​ការប្រយុទ្ធ​ប្រឆាំង​នឹង​ភេរវកម្ម​»​។​

​តាមពិត​យោធា​មី​យ៉ាន់​ម៉ា ខ្លួនឯង​ក៏​ត្រូវបាន​ចោទប្រកាន់ថា​បាន​ប្រព្រឹត្ត​ការសម្លាប់​ទ្រង់ទ្រាយ​ធំ​និង​ការធ្វើ​ទារុណកម្ម​លើ​សមាសភាព​ប្រឆាំង ជន​ស៊ីវិល រួមទាំង​ស្ត្រី​និង​កុមារ​។​

​ចាប់តាំងពី​រដ្ឋប្រហារ មនុស្ស​ជាង​១.៥០០​នាក់​ត្រូវ​គេ​ជឿ​ថា​ត្រូវ​បាន​សម្លាប់​ក្នុងការ​បង្ក្រាប​ពី​សំណាក់​កងកម្លាំងប្រដាប់អាវុធ​មី​យ៉ាន់​ម៉ា​លើ​ការតវ៉ា​ប្រឆាំង​នឹង​ការគ្រប់គ្រង​យោធា​៕