ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ តារាភាពយន្ត អ៊ែន​ជេ​លីណា ចូ​លី បាន​ត្រឡប់​មក​វិមាន​កា​ពី​តូ​ល​ហ៊ីល (Capitol Hill) វិញ​កាលពី​ថ្ងៃ​ពុធ​ទី​៩​កុម្ភៈ​ដោយ​អង្វរ​សមាជិក​សភា​អាម៉េរិក​​ឱ្យ​អនុម័ត​វិធានការ​នានា​ដើម្បី​ប្រយុទ្ធប្រឆាំង​នឹង​អំពើ​ហិង្សា​ក្នុង​គ្រួសារ​ជាបន្ទាន់​។​

​នៅក្នុង​សន្និសីទ​សារព័ត៌មាន​មួយ​នៅ​វិមាន​កា​ពី​តូ​ល​របស់​សហរដ្ឋ​អាម៉េរិក​លោកស្រី​ចូលី​បាន​សម្តែង​ការគាំទ្រ​ចំ​ពោះ​ការ​ពិនិត្យ​ឡើងវិញ​នូវ​ច្បាប់​ដែល​នឹង​ផ្តល់ឱ្យ​ជនរងគ្រោះ​នៃ​ការរំលោភបំពាន​​បែប​នេះ​ជាមួយនឹង​ជំនួយ​ផ្នែក​វេជ្ជសាស្ត្រ​និង​ផ្នែក​ច្បាប់​ក៏​ដូច​ជា​ការគាំទ្រ​ដល់​កុមារ​ដែល​រង​ផល​ប៉ះពាល់​ពី​អំពើ​ហិង្សា​នៅក្នុង​ផ្ទះ​។​

​ផលិតករ​ភាពយន្ត​និង​ជា​ម្ចាស់​ជ័យលាភី​ពានរង្វាន់ Academy Award រូបនេះ​បាន​និយាយថា “​ការពិត​ដ៏​អាក្រក់​គឺ​ថា អំពើ​ហិង្សា​នៅ​ក្នុងផ្ទះ​បាន​ក្លាយជា​រឿង​ធម្មតា​នៅក្នុង​ប្រទេស​របស់​យើង​”​។​

​លោកស្រី​ចូលី​បាន​និយាយ​ទាំង​ទឹកភ្នែក​ខណៈ​អំពាវនាវ​ឱ្យ​សភា​ផ្តោត​អាទិភាព​លើ​ការផ្តល់​អំណាច​ឡើង​វិញ​ដល់​ច្បាប់​ស្តី​ពី​អំពើ​ហិង្សា​លើ​ស្ត្រី ( VAWA) យ៉ាង​ដូច្នេះ​ថា​”​ខ្ញុំ​ចង់​ទទួលស្គាល់​ដល់​កុមារ​ដែល​មាន​​ការភ័យខ្លាច​និង​រង​ទុក្ខ​នៅពេលនេះ និង​មនុស្ស​ជាច្រើន​ទៀត ដែល​ច្បាប់​នេះ​ចេញ​មក​យឺត​ពេល​ពេក​សម្រាប់​ពួកគេ​”​។​

​តារា​ក្នុង​រឿង Eternals អាយុ ៤៦ ឆ្នាំ​រូប​នេះ​បាន​ចោទប្រកាន់​អតីត​ស្វាមី ប្រ៊ែត ភី​ត ថា​មាន​ចេតនា​វាយ​កូនប្រុស​របស់​ពួក​គេ​ឈ្មោះ ម៉ា​ត​ដុក ដែល​គ្រានោះ​ទើបតែ​មាន​អាយុ ១៥ ឆ្នាំ​ទោះបីជា​ភី​ត​​ត្រូវ​បាន​ជម្រះ​ពី​ការចោទប្រកាន់​នេះ​ក៏​ដោយ​។​

​លោក​ប្រធានាធិបតី ចូ បៃ​ដិន ដែល​ពេលនោះ​ជា​ព្រឹទ្ធ​សមាជិក​អាម៉េរិក គឺជា​អ្នកនិពន្ធ​ចម្បង​នៃ​សេចក្តីព្រាង​ដើម​នៃ​ច្បាប់​ដែល​បាន​ចុះហត្ថលេខា​ជា​លើក​ដំបូង​ក្នុង​ឆ្នាំ ១៩៩៤​។​កំណែ​ជា​បន្ត​​បន្ទាប់​នៃ​ច្បាប់ VAWA បានអនុម័ត​ដោយ​មាន​ការគាំទ្រ​យ៉ាងខ្លាំង​ពី​គណបក្ស​ប្រជាធិបតេយ្យ​និង​គណបក្ស​សាធារណរដ្ឋ​។​

​ប៉ុន្តែ​នៅ​ឆ្នាំ ២០១៩ កំណែ​មួយ ដែល​អនុម័ត​ដោយ​សភា​តំណាងរាស្ត្រ បាន​ជាប់គាំង​នៅ​ក្នុង​ព្រឹទ្ធសភា ដែល​កាលណោះ​គឺ​គ្រប់គ្រង​ដោយ​គណបក្ស​សាធារណរដ្ឋ​ដែល​រារាំង​ច្បាប់​នេះ​មិន​ឱ្យ​ឈាន​ដល់​ការបោះ​​ឆ្នោត​សម្រេច​ចុងក្រោយ​។​

​ច្បាប់​ដែល​បានបង្ហាញ​កាលពី​ថ្ងៃ​ពុធ​ក៏​មាន​ការគាំទ្រ​ពី​បក្ស​ទាំង​ពីរ​ផង​ដែរ​ហើយ​លោកបៃ​ដិនបាន​អបអរសាទ​រ​ក្រុម​សមាជិក​សភា​មកពីគ​ណ​បក្ស​ទាំងពីរ​ដែល​បាន​រួមគ្នា​ដើម្បី​ផ្តល់​អំណាច​​ឡើង​វិញ​ដល់​ច្បាប់ VAWA ៕

​តារាភាពយន្ដ​អាម៉េរិក អ៊ែន​ជេ​លីណា ចូ​លី ផ្តល់​សក្ខីកម្ម​នៅឯ​វិមាន​កា​ពី​តូ​ល​សហរដ្ឋ​អាម៉េរិក​កាលពី​ថ្ងៃ​ពុធ​ទី ៩ ខែ​កុម្ភៈ​ឆ្នាំ ២០២២ ក្នុង​ការគាំទ្រ​ច្បាប់​ថ្មី​ដើម្បី​ជួយ​ជនរងគ្រោះ​ដោយ​អំពើ​ហិង្សា​ក្នុង​គ្រួសារ