​ប្រែ​សម្រួល : កញ្ញា​ដា​លី​ស (VNExpress) ៖ ស៊ុយអែត​បាន​លុបចោល​សឹងតែ​ទាំងអស់​នូវ​រាល់​ការ​រឹតបន្តឹង​ដើម្បី​ទប់ស្កាត់​មេរោគ​កូរ៉ូណា​របស់ខ្លួន​កាលពី​ថ្ងៃ​ពុធ​ទី​៩​កុម្ភៈ​ហើយ​បាន​បញ្ឈប់​ការធ្វើ​តេស្តិ៍​​ភាគច្រើន​សម្រាប់រ​កកូ​វីដ​១៩ ទោះបីជា​សម្ពាធ​លើ​ប្រព័ន្ធ​ថែទាំ​សុខភាព​នៅ​តែ​មាន​កម្រិត​ខ្ពស់​និង​អ្នកវិទ្យាសាស្ត្រ​មួយចំនួន​បាន​អង្វរ​ឱ្យ​មាន​ការអត់ធ្មត់​បន្ថែ​ម​ទៀត​ក្នុង​ការប្រយុទ្ធប្រឆាំង​នឹង​​ជំងឺ​នេះ​ក៏ដោយ​។​

​រដ្ឋាភិបាល​ស៊ុយអែត ដែល​នៅ​ទូ​ទាំង​ជំងឺ​រាតត្បាត​នេះ​បានជ្រើសរើស​ប្រឆាំងនឹង​ការបិទ​ខ្ទប់ បាន​ប្រកាស​កាលពី​សប្តាហ៍​មុន​ថា ខ្លួន​នឹង​លុបចោល​ការ​រឹតបន្តឹង​ដែល​នៅសល់​ទាំងអស់​ដោយ​ប្រកាស​​ជា​ធរមាន​អំពី​ទីបញ្ចប់​នៃ​ជំងឺ​រាតត្បាត ខណៈ​វ៉ាក់សាំង​និង​មេរោគ​អូ​មី​ក្រុង​មិន​បង្ក​ឱ្យ​មាន​ករណី​ឈឺធ្ងន់ធ្ងរ​និង​ស្លាប់​។​

​រដ្ឋមន្ត្រីក្រសួង​សុខាភិបាល​លោកស្រី ឡេ​ណា ហាល់​លេន​ហ្គ្រី​ន (Lena Hallengren) បាន​ប្រាប់​កាសែត​ថា “​ដូចដែល​យើង​ដឹង​ពី​ជំងឺ​រាតត្បាត​នេះហើយ ខ្ញុំ​សូម​និយាយថា​វា​ចប់​ហើយ​។​វា​មិន​ទាន់​​ចប់​ទាំងស្រុង​មែន ប៉ុន្តែ​ដូច​ដែល​យើង​បានដឹង​ពី​វា​ហើយ​ទាក់ទង​នឹង​ការផ្លាស់ប្តូរ​យ៉ាង​រហ័ស​និង​ការ​រឹតបន្តឹង​” ដោយ​បន្ថែម​ថា កូវី​ដនឹង​មិន​ត្រូវបានចាត់ថ្នា​ក់​ជា​គ្រោះថ្នាក់​ដល់​សង្គម​ទៀត​ទេ​។​

​គិត​ត្រឹម​ថ្ងៃ​ពុធ បារ​និង​ភោជនីយដ្ឋាន​ត្រូវបាន​អនុញ្ញាត​ឱ្យ​បន្ត​បើក​បន្ទាប់ពី​ម៉ោង ១១ យប់​និង​គ្មាន​ការកំណត់​លើ​ចំនួន​ភ្ញៀវ​នោះទេ​។​ការកំណត់​ចំនួន​មនុស្ស​ចូលរួម​សម្រាប់​ទីតាំង​ខាងក្នុង​អគារ​​ធំៗ​ក៏​ត្រូវបាន​ដកចេញ​អស់​ផងដែរ​រួមទាំង​ការប្រើប្រាស់​ប័ណ្ណ​វ៉ាក់សាំង​។​

​ទោះយ៉ាងណា​ក៏ដោយ មន្ទីរពេទ្យ​ស៊ុយអែត​នៅតែ​មាន​សម្ពាធ​ខ្ពស់ ដោយ​មនុស្ស​ប្រហែល ២.២០០ នាក់​ដែល​មាន​ជំងឺ​កូ​វីដ​នៅតែ​ត្រូវការ​ការថែទាំ​នៅ​មន្ទីរពេទ្យ​ប្រហែល​ដូចនឹង​អំឡុង​ពេល​រលក​ទី​បី​នៅ​និ​​ទាឃ​រដូវ​ឆ្នាំ ២០២១ ដែរ​។ ខណៈ​ការធ្វើ​តេស្តិ៍​ដោយ​ឥតគិតថ្លៃ​ត្រូវបាន​កាត់បន្ថយ​នៅ​ដើមខែ​នេះ​និង​បញ្ឈប់​ទាំងស្រុង​ចាប់ពី​ថ្ងៃ​ពុធ គ្មាន​នរណា​ម្នាក់​ដឹង​ពី​ចំនួន​ករណី​ឆ្លង​ពិតប្រាកដ​នោះទេ​។​

​លោក ហ្វ្រេ​ឌី​ក អែល (Fredrik Elgh)​ជា​សាស្ត្រាចារ្យ​ផ្នែក​មេរោគ​នៅ​សាកលវិទ្យាល័យ​អ៊ូ​មា (Umea) និង​ជា​អ្នក​រិះគន់​ដ៏​ខ្លាំង​បំផុត​ម្នាក់​នៃ​គោលនយោបាយ​គ្មាន​ការបិទ​ខ្ទប់​របស់​ស៊ុយអែត បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័​រថា “​យើង​គួរតែ​មាន​ការអត់ធ្មត់​បន្តិចទៀត រង់ចាំ​យ៉ាង​ហោច​ណាស់​ពីរ​បី​សប្តាហ៍​ទៀត​។ ហើយ​យើង​មាន​ស្តុកស្តម្ភ​គ្រប់គ្រាន់​ដើម្បី​បន្ត​ការធ្វើ​តេស្តិ៍​”​។

​លោក​បាន​បន្តថា “​ជំងឺ​នេះ​នៅតែ​ជា​សម្ពាធ​ដ៏​ធំ​នៅក្នុង​សង្គម​”៕

​មនុស្ស​ជួបជុំ​នៅក្រៅ​ក្លឹប​រាត្រី​មួយ​នៅ​ក្រុង​ម៉ាល់​ម៉ូ ប្រទេស​ស៊ុយអែត នៅ​ពេល​ប្រទេស​ប្រកាស​ជំងឺ​ឆ្លងកូវី​ដ​១៩​ចប់​