​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ឧត្តមសេនីយ៍​អាម៉េរិក​ម្នាក់ ដែល​ត្រួតពិនិត្យ​ប្រតិបត្តិការ​មជ្ឈិមបូព៌ា បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័រ​ថា​សហរដ្ឋ​អាម៉េរិក​នឹង​ជួយ​អារ៉ាប់​រួម​អេ​មី​រ៉ា​ត​(​សហភាព​អារ៉ាប់​)​បំពេញ​ស្តុក​គ្រាប់​ស្ទាក់ចាប់​មី​ស៊ី​ល​ដែល​ខ្លួន​ប្រើ​ដើម្បី​បាញ់​ទម្លាក់​មី​ស៊ី​ល​ដែល​ហោះ​ចូលមក បន្ទាប់​ពី​មាន​ការវាយប្រហារ​មិន​ធ្លាប់​មាន​ពីមុន​មក​ដោយ​ក្រុម​យុទ្ធជន​ហ៊ូ​ធី (Houthi) នៅក្នុង​ប្រទេស​យេ​ម៉ែន​។​

​ក្នុង​ប៉ុន្មាន​សប្តាហ៍​ថ្មីៗ​នេះ ក្រុម​ហ៊ូ​ធី ដែល​មាន​សម្ពន្ធភាព​ជា​មួយ​អ៊ីរ៉ង់ បាន​ធ្វើ​ការវាយប្រហារ​មិនបាន​សំរេច​ភាគច្រើន​ទៅលើ​គោលដៅ​នៅ​ប្រទេស​អារ៉ាប់​រួម​អេ​មី​រ៉ា​ត​ដែល​បង្ក​ឱ្យ​មាន​ការបាញ់​ស្កាត់​​ចេញពី​ខែល​ការពារ​ដែនអាកាស​របស់​អា​រ៉ាប់រួម​និង​សហរដ្ឋ​អាម៉េរិ​ក ហើយ​ថែមទាំង​បាន​ឃើញ​ទាហាន​អាម៉េរិក​ដែលមាន​មូលដ្ឋាន​នៅ​ទី​នោះ​រត់​ជ្រក​គ្រាប់​មួយ​ប្រាវ​ផងដែរ​។​

​ឧត្តមសេនីយ៍ ហ្វ្រែង ម៉ាកេ​ន​ហ្ស៊ី (Frank McKenzie)​ប្រមុខ​ទីបញ្ជាការ​កណ្តាល​អាម៉េរិក បាន​និយាយ​នៅក្នុង​បទសម្ភាសន៍​មួយ​បន្ទាប់​ពី​ដំណើរ​ទៅ​កាន់​ទីក្រុង​អា​ប៊ូ​ដា​ប៊ី (Abu Dhabi)​កាលពីដើម​​សប្តាហ៍​នេះ​ថា “​យើង​នឹង​ជួយ​បំពេញ​ស្តុក​គ្រាប់​ស្ទាក់ចាប់​។ ហើយ​យើង​នឹង​ធ្វើ​អ្វីៗ​គ្រប់យ៉ាង​ដែល​យើង​អាច​ធ្វើបាន​ដើម្បី​ជួយ​អារ៉ាប់​រួម​ការពារ​ខ្លួន​”​។​

​លោក​ម៉ាក​កេន​ហ្ស៊ី​មិន​បាន​ផ្តល់​ព័ត៌មាន​លម្អិត​បន្ថែម​នោះ​ទេ​។ ប្រភព​ដែល​ដឹង​អំពី​បញ្ហា​នេះ​បាន​និយាយ​ក្នុង​លក្ខខណ្ឌ​អនាមិក​ថា​អារ៉ាប់​រួម​អេ​មី​រ៉ា​ត​បាន​ស្នើ​សុំ​ជា​លក្ខណៈ​ឯកជន​ដល់​សហរដ្ឋ​អាម៉េរិក​​ក្នុង​ការបំពេញ​ស្តុក​គ្រាប់​ស្ទាក់ចាប់​មី​ស៊ី​ល រួម​ទាំង​គ្រាប់​សម្រាប់​ប្រព័ន្ធ​ធី​អេច​អេអេ​ឌី​( THAAD) និង​ផែត​ទ្រៀត​( Patriot)​របស់ខ្លួន​៕

​សហរដ្ឋ​អាម៉េរិក​នឹង​ជួយ​អារ៉ាប់​រួម​អេ​មី​រ៉ា​ត​បំពេញ​ស្តុក​គ្រាប់​ស្ទាក់ចាប់​មី​ស៊ី​ល​