​ប្រែ​សម្រួលៈ​បំណង​(​បាងកក​ប៉ុស្តិ៍​)៖ រដ្ឋាភិបាល​ថៃ​កំពុង​ពិចារណា​រឹតបន្តឹង​វិធានការ​ប្រឆាំង​កូវី​ដ​១៩​នៅក្នុង​អំឡុង​ទិវា​នៃ​ក្តីស្រឡាញ់​ទី​១៤​កុម្ភៈ និង​ក្នុងអំឡុងពេល​ចូលឆ្នាំ​សង្ក្រាន្ត​ថ្មី​នៅ​ខែ​មេសា​ខាង​មុខ​ ដើម្បី​ជា​ការឆ្លើយតប​នឹង​កំណើន​នៃ​ការ​ឆ្លងកូវី​ដ​១៩​យ៉ាង​ឆាប់រហ័ស​។​

​ក្នុងជំនួប​មួយ​របស់​ក្រុមការងារ​កូវី​ដ​១៩​របស់​រដ្ឋាភិបាល​និង​នាយកដ្ឋាន​គ្រប់គ្រង​ជំងឺ ពួក​មន្ត្រី​បាន​សម្តែង​ការព្រួយបារម្ភ​អំពី​កំណើន​នៃ​ការ​ឆ្លងកូវី​ដ​១៩​ប្រចាំ​ថ្ងៃ​ថេរ​ចាប់តាំងពី​ដើមឆ្នាំ​២០២២ ជា​ពិ​​សេស​នៅ​ប៉ុន្មាន​ថ្ងៃ​ចុងក្រោយ​នេះ​។​

​កាលពី​ថ្ងៃ​ព្រហស្បតិ៍​ម្សិលមិញ ថៃ​បាន​ប្រកាស​រកឃើញ​អ្នក​ឆ្លងកូវី​ដ​ថ្មី​ចំនួន​១៤.៨២២​នាក់​និង​២០​នាក់​ទៀត​បាន​ស្លាប់​ដោយ​ជំងឺ​នេះ​តែ​ថ្ងៃ​សុក្រ​ទី​១១​កុម្ភៈ​ក្រសួងសុខាភិបាល​បាន​ប្រកាស​ថា​មនុស្ស​ដល់​​ទៅ​១៥.២៤២​នាក់​បាន​ឆ្លងកូវី​ដ​១៩​ថែម​នៅ​២៤​ម៉ោង​កន្លងទៅ និង​ស្លាប់​កើន​ដល់​២៣​នាក់​។​

​នាយករដ្ឋមន្ត្រី ប្រា​យុទ្ធ ចាន់​អូ​ចា នឹង​បើក​កិច្ចប្រជុំ​ក្រុមការងារ​កូវី​ដ​១៩​នៅ​ថ្ងៃ​សុក្រ ដោយ​គេ​រំពឹងថា​នឹង​ពិចារណា​ដាក់​ប្រើ​វិធានការ​រឹង​រ៉ឹង​ឡើង​ដើម្បី​ទប់ស្កាត់​ការឆ្លង​រាលដាល​វីរុស​ក្នុងអំឡុង​ទិវា​នៃ​​ក្តីស្រឡាញ់ និង​ក្នុងអំឡុងពេល​បុណ្យចូលឆ្នាំថ្មី​។​

​ក្នុងពេល​ជាមួយគ្នា រដ្ឋបាល​ក្រុង​បាងកក​កំពុង​ចែក​ស្រោមអនាម័យ​២​លាន ក្នុង​យុទ្ធនាការ​រួមភេទ​ដោយ​សុវត្ថិភាព​នៅមុន​ទិវា​នៃ​ក្តីស្រឡាញ់​១៤​កុម្ភៈ ដោយសារ​ជំងឺ​កាមរោគ​ក៏​កំពុង​កើន​ក្នុងចំណោម​​យុវជន​ថៃ​។​

​ក្រសួង​សុខាភិបាល​ថៃ​ក៏​បាន​ស្នើ​អោយ​អ្នក​ប្រុង​រួមភេទ​ក្នុងអំឡុង​ទិវា​នៃ​ក្តីស្រឡាញ់​នេះ​គួរ​ធ្វើតេស្តិ៍​រក​កូវី​ដ​១៩​ដោយ​ប្រើ​ឧបករណ៍​តេស្តិ៍​រហ័ស មុន​ពេល​រួមភេទ តែ​លោក​រដ្ឋមន្ត្រី​សុខាភិបាល​បាន​និយាយ​​ថា​«​ខ្ញុំ​អត់​ខ្វល់​អំពី​សំណើ​នេះ​ទេ ដោយសារ​ពួកគេ​(​គូស្នេហ៍​)​បាន​មាន​ទំនាក់ទំនង​ជិតស្និទ្ធ​រវាង​គ្នា​រួច​ទៅ​ហើយ​»​។​

​សូមបញ្ជាក់​ថា ចាប់តាំងពី​លេច​មានកូ​វីដ​១៩​នៅក្នុង​ប្រទេស​នេះ​កាលពីដើមឆ្នាំ​២០២០ អាជ្ញាធរ​ថៃ​បាន​រក​ឃើញ​អ្នក​ឆ្លង​សរុប ២.៥៦១.១១៥​នាក់ តែ​ជាង​២,៤២​លាន​នាក់​បាន​ជា​ពី​ជំងឺឆ្លង​រាតត្បាត​នេះ​​និង​២២.៣៨៧​នាក់​បាន​ស្លាប់​។​

​ទោះជា​ការឆ្លង​ពេលនេះ​កើនឡើង​ដល់​កំរិត​ខ្ពស់​ជាថ្មី តែ​វា​នៅ​ទាប​ជាង​ចំនួន​ឆ្លង​ខ្ពស់​បំផុត​ពី​មុន​ចំនួន​២៣.៤១៨​នាក់ ដែល​ត្រូវបាន​កត់ត្រា​ឃើញ​កាលពី​ថ្ងៃ​១៨​សីហា ឆ្នាំ​២០២១៕

ក្មេងសិស្សសាលាថៃក្នុងខេត្តណាខន រ៉ាតចាសីម៉ា រង់ចាំពិនិត្យរកកូវីដ១៩កាលពីថ្ងៃ១០កុម្ភៈ