ដោយៈ​ស៊ា ថាំង​/​ភ្នំពេញៈ​នៅ​ឆ្នាំ​២០២១ គយ​កម្ពុជាប្រមូល​ចំណូល​បាន ៩,២៩៥.៧ ប៊ី​លាន​រៀល (​ស្មើនឹង​ប្រមាណ ២,២៩៥.២ ដុល្លារ​អាម៉េរិក​) មានការ​ថយចុះ​ប្រមាណ ៥,១​ភាគរយ ធៀប​នឹង​ចំណូល​ប្រមូលបាន​ក្នុង​ឆ្នាំ​២០២០​។ លទ្ធផល​នេះ​គឺ​សម្រេចបាន​៩៧,១​ភាគរយ​នៃ​ផែន​ការដែល​កំណត់ដោយ​ច្បាប់​ស្ដីពី​ហិរញ្ញវត្ថុ​សម្រាប់​ការគ្រប់គ្រង​ឆ្នាំ ២០២១​។​

​កាលពី​ថ្ងៃទី​១០ ខែកុម្ភៈ ឆ្នាំ​២០២២​នៅ​សាលា​ជាតិ​គយ​មាន​ប្រារព្ធ​កិច្ចប្រជុំ​បូកសរុប​លទ្ធផល​ការងារ​គយ​និង​រដ្ឋាករ​ប្រចាំ ឆ្នាំ​២០២១ ក្រោម​អធិបតីភាព លោក​អគ្គបណ្ឌិត​សភាចា​រ្យ អូន ព័ន្ធមុនីរ័ត្ន ឧបនាយករដ្ឋមន្ត្រីរ​ដ្ឋ​មន្ត្រី​ក្រសួង​សេដ្ឋកិច្ច​និង ហិរញ្ញវត្ថុ ដោយមាន​ការចូលរួម​ពី​ថ្នាក់ដឹកនាំ​ក្រសួង​សេដ្ឋកិច្ច​និង​ហិរញ្ញវត្ថុ អគ្គនាយកដ្ឋាន​ពន្ធដា​រ​អគ្គនាយក​-​ដ្ឋា​ន​សវនកម្ម ផ្ទៃក្នុង អគ្គនាយកដ្ឋាន​គោលនយោបាយ អគ្គនាយកដ្ឋាន​ថវិកា​ព្រមទាំង​មានការ​ចូលរួម ពី​ចម្ងាយ​តាម​ប្រព័ន្ធ​វីដេអូ (Zoom) របស់​ថ្នាក់ដឹកនាំ​គ្រប់​ជាន់ថ្នាក់​នៃ​អគ្គនាយកដ្ឋាន​គយ​និង​រដ្ឋាករ​កម្ពុជា (​អគរ​) ។​

​លោក​បណ្ឌិត គុណ ញឹម រដ្ឋមន្ត្រី​ប្រតិភូ​អម​នាយករដ្ឋមន្ត្រី អគ្គនាយក​គយ​និង​រដ្ឋាករ​កម្ពុជា​បាន​ថ្លែងប្រាប់​កិច្ចប្រជុំ​ថា នៅ​ឆ្នាំ​២០២១ ដែល​ក្នុងនោះ គយ​ប្រមូល​ចំណូល​បាន ៩,២៩៥.៧ ប៊ី​លាន​រៀល (​ស្មើនឹង​ប្រមាណ ២,២៩៥.២ ដុល្លារ​អាម៉េរិក​) ថយចុះ​ប្រមាណ ៥.១​ភាគរយ ធៀប​នឹង​ចំណូល​ប្រមូលបាន​ក្នុង​ឆ្នាំ​២០២០​។

​លោក​បញ្ជាក់ថា​លទ្ធផល​នេះ គឺ​សម្រេចបាន ៩៧,១​ភាគរយ​នៃ​ផែន​ការដែល​កំណត់ដោយ​ច្បាប់​ស្ដីពី​ហិរញ្ញវត្ថុ​សម្រាប់​ការគ្រប់គ្រង​ឆ្នាំ​២០២១​។​បើ​គិត​តាម​ប្រភេទ​ពន្ធ​និង​អាករ ឃើញថា អាករ​លើ​តម្លៃបន្ថែម​មាន​ចំនួន ៣,៥២២.២ ប៊ី​លាន​រៀល (​ត្រូវជា ៣៧.៩ភាគរយនៃ​ចំណូល​សរុប​), អាករ​ពិសេស​មាន​ចំនួន ៣,៥១៣ ប៊ី​លាន​រៀល (​ត្រូវជា ៣៨.៨ភាគរយ​នៃ​ចំណូល​សរុប​), ពន្ធគយ​មាន​ចំនួន ១,៦៧១.៦ ប៊ី​លាន​រៀល (​ត្រូវជា ១៨ភាគរយ នៃ​ចំណូល​សរុប​), អាករ​បន្ថែម​លើ​ផលិតផល​ប្រេង​មាន​ចំនួន ៤០៣.៦ ប៊ី​លាន​រៀល (​ត្រូវជា ៤.៣ភាគរយ នៃ​ចំណូល​សរុប​), និង​អាករ​នាំចេញ​និង​កម្រៃ​ផ្សេងៗ​មាន​ចំនួន ១៨៥.២ ប៊ី​លាន​រៀល (​ត្រូវជា ២.០ភាគរយ នៃ​ចំណូល​សរុប​)​។ ចំពោះ​ចំណូល​តាម​ក្រុម​ទំនិញ ឃើញថា យានយន្ត​និង​គ្រឿងចក្រ​មាន​ចំនួន ៣,៩៩៨.៨ ប៊ី​លាន​រៀល (​ត្រូវជា ៤៣ភាគរយនៃ​ចំណូល​សរុប​), ទំនិញ​ចម្រុះ​មាន​ចំនួន ២,៥៧៩.៤ ប៊ី​លាន​រៀល (​ត្រូវជា ២៧.៨ភាគរយ នៃ​ចំណូល​សរុប​), ផលិតផល​តេ​ល​សិលា​មាន​ចំនួន ២,១៥៧.១ ប៊ី​លាន​រៀល (​ត្រួវ​ជា ២៣.២ភាគរយ នៃ​ចំណូល​សរុប​), និង​សម្ភារ​សំណង់​និង​កម្រៃ​ផ្សេងៗ​មាន​ចំនួន ៥៦០.៤ ប៊ី​លាន​រៀល (​ត្រូវជា ៦.០ភាគរយ នៃ​ចំណូល​សរុប​)​។​

​លោក​រដ្ឋមន្ត្រី​ប្រតិភូ​អម​នាយករដ្ឋមន្ត្រី​បាន​ថ្លែង​ឱ្យដឹង​ដែរ​ថា​ដោយឡែក​ទំហំ​ពាណិជ្ជកម្ម​អន្តរជាតិ​ក្នុង​ឆ្នាំ​២០២១ ធៀប​នឹង​ឆ្នាំ​២០២០ មាន​ដូចខាងក្រោម​៖
​ការនាំចេញ​ផលិតផល​កាត់ដេរ​មាន​ចំនួន ១១,៣៨៩.៦ លាន​ដុល្លារ​កើនឡើង​ប្រមាណ ១,៥០៥ លាន​ដុល្លារស្មើនឹង ១៥.២ភាគរយ។​
•​​ការនាំចេញ​ផលិតផល​វិនិយោគ​មិនមែន​កាត់ដេរ (​ដូចជា គ្រឿង​បំណែក​អេឡិចត្រូនិក កង់ ផលិតផល​ពី​ឈើ ស្បែក​សត្វ​កែច្នៃ ផលិតផល​ប្លា​ស្ទិ​ច គ្រឿងបន្លាស់​រថយន្ត និង​ផលិតផល​ឧស្សាហកម្ម​ផ្សេងៗ​ទៀត​) មាន​ចំនួន ៤,៥៤២.១ លាន​ដុល្លារ​កើនឡើង​ប្រមាណ ១,៣៩២.៥ លាន​ដុល្លារ​ ស្មើនឹង ៤៤.២ភាគរយ,
•​ការនាំចេញ​កសិផល​មាន​ចំនួន ២,៨១៧.៨ លាន​ដុល្លារ​ កើនឡើង​ប្រមាណ ៣,៩១០.៩ លាន​ដុល្លារ​ស្មើនឹង ៣៩.៥ភាគរយ ដែល​ក្នុងនោះ ស្រូវ​នាំចេញ​មានតម្លៃ ៨២៦.២ លាន​ដុល្លារ​ កើនឡើង​ប្រមាណ ៣៦០.៣ លាន​ដុល្លារ​ (៧៧.៣ភាគរយ), ការនាំចេញ​អង្ករ​សម្រេច ៤២៤.៩ លាន​ដុល្លារ​ ថយចុះ​ប្រមាណ ៨១.១ លាន​ដុល្លារ​ (១៦.០ភាគរយ)​, កៅស៊ូ​នាំចេញ​មានតម្លៃ ៣៩៩.៣ លាន​ដុល្លារ​ កើនឡើង​ប្រមាណ ១២៥.៧ លាន​ដុល្លារ​ (៤៥.៩ភាគរយ), និង​កសិផល​ផ្សេងទៀត​មានតម្លៃ ៦៥៣.៧ លាន​ដុល្លារ​ កើនឡើង ២៦៥.៣ លាន​ដុល្លារ​ (៦៨.៣ភាគរយ)​។​

​លោក​បាន​បន្ថែមថា​ទន្ទឹមនឹង​ការងារ​ប្រមូល​ចំណូល អគរ ក៏​សម្រេចបាន​នូវ​លទ្ធផល​ល្អប្រសើរ​លើ​ការងារ​សំខាន់ៗ​មួយចំនួន ដែល​មានចែង​ក្នុង​ផែនការ​សកម្មភាព​ប្រចាំឆ្នាំ​២០២១ ដូចជា​៖ (១)​ការងារ​គោលនយោបាយ​និង​បច្ចេកទេស​គយ​, (២)​ការបង្ការ​និង​បង្ក្រាប​អំពើ​រត់គេច​ពន្ធ និង​ការលើកកម្ពស់​អនុលោមភាព​, (៣)​ការលើកកម្ពស់​កិច្ច​សម្រួល​ពាណិជ្ជកម្ម​តាមរយៈ​ការធ្វើ​សាមញ្ញ​កម្ម​នីតិវិធី​គយ និង​ការប្រើប្រាស់​ប្រព័ន្ធ​បច្ចេកវិទ្យា​បន្ថែមទៀត​ក្នុង​ការងារ​គយ​, និង (៤)​ការចូលរួម​សកម្មភាព​សង្គម​នានា និង​ការអនុវត្ត​វិធានការ​សុខាភិបាល​ដើម្បី​ទប់ស្កាត់​ការរីក​រាលដាល​នៃ​ជំងឺ​កូ​វីដ​-១៩ ជាដើម​។​

​ឆ្លើយតប​នឹង​លទ្ធផល​ខាងលើ លោក​អគ្គបណ្ឌិត​សភាចា​រ្យ​ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច​និង​ហិរញ្ញវត្ថុ បាន​វាយតម្លៃ​ខ្ពស់​ចំពោះ​កិច្ចខិតខំ​ប្រឹងប្រែង​រប​ស់​ថ្នាក់ដឹកនាំ និង​មន្ត្រី​គយ​និង​រដ្ឋាករ​គ្រប់​ជាន់ថ្នាក់ ក្នុងការ​សម្រេចបាន​នូវ​លទ្ធផល​ល្អប្រសើរ​លើ​គ្រប់​ការដ្ឋាន​ការងារ ទោះបីជា​បាន​ឆ្លងកាត់​នូវ​ការ​ប្រឈម​ខ្លាំង​ពី​ការ​រាលដាល​ជំងឺ​កូ​វីដ​-១៩ និង​បាន​ថ្លែង​នូវ​ការគាំទ្រ​យ៉ាង​ពេញទំហឹង​ដល់​អគ្គនាយកដ្ឋាន​គយ​និង​រដ្ឋាករ​កម្ពុជា សម្រាប់​ការអនុវត្ត​ការងារ​នៅក្នុង​ឆ្នាំ​បន្តបន្ទាប់​ទៀត​។ លោក​អគ្គបណ្ឌិត​សភាចា​រ្យ​ឧបនាយករដ្ឋមន្ត្រី ក៏បាន​ក្រើនរំឭក​នូវ​ការណែនាំ​ដ៏​ខ្ពង់ខ្ពស់​របស់ សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ចំនួន ៥ ចំណុច ដែល​បាន​ថ្លែង​នា​ពិធី​សម្ពោធ​ដាក់ឱ្យ​ប្រើប្រាស់​ជា​ផ្លូវការ​អគារ​រដ្ឋបាល​គយ អគារ​សាលា​ជាតិ​គយ និង​អគារ​សារមន្ទីរ​គយ កាលពី​ថ្ងៃទី​២៣ ខែធ្នូ ឆ្នាំ​២០២១ រួមមាន​៖
១-​​បន្ត​លើកកម្ពស់​ការផ្សព្វផ្សាយ​ឱ្យ​កាន់តែ​ទូលំទូលាយ​ដល់​គ្រប់ភាគី​ពាក់ព័ន្ធ ជាពិសេស​វិស័យ​ឯកជន នូវ​រាល់​បទ​ប្បញ្ញត្តិ​ច្បាប់​និង​លិខិតបទដ្ឋាន​ទាំងឡាយ ដើម្បី​បង្កើន​ការយល់ដឹង និង​ការចូលរួម​ពី​គ្រប់ភាគី​ពាក់ព័ន្ធ ក្នុងការ​អនុវត្ត​កាតព្វកិច្ច​សារពើពន្ធ និង​ការអនុវត្ត​ច្បាប់​និង​បទ​ប្បញ្ញត្តិ​ជា​ធរមាន​។​
២-​បន្ត​អនុវត្ត​ឱ្យមាន​ប្រសិទ្ធភាព​ខ្ពស់​ថែមទៀត​នូវ​យុទ្ធសាស្ត្រ​កៀរគរ​ចំណូល ២០១៩-២០២៣ និង កម្មវិធី​កែទម្រង់​ការគ្រប់គ្រង​ហិរញ្ញវត្ថុ​សាធារណៈ ពិសេស​តាមរយៈ​ការលើកកម្ពស់​ភាពជា​អ្នកដឹកនាំ ការបង្កើន​ឆន្ទៈ​ក្នុងការ​អនុវត្ត​ការងារ​កែទម្រង់ ការពង្រឹង​ភាពជា​ម្ចាស់ និង​ការយកចិត្តទុកដាក់​ព​ង្រឹ​ង​សមត្ថភាព​ធនធាន​មនុស្ស និង​ការប្រើប្រាស់​ប្រព័ន្ធ​បច្ចេកវិទ្យា​ព៌​ត័​មាន និង​គមនាគមន៍​។​
៣-​​បន្ត​ពង្រឹង និង​កែលម្អ​ជាប្រចាំ​នូវ​ការអនុវត្ត​យន្តការ​គាំទ្រ​កិច្ច​សម្រួល​ពាណិជ្ជកម្ម​នានា ដូចជា​ប្រព័ន្ធ​ស្វ័យប្រវត្តិកម្ម​គយ ប្រព័ន្ធគ្រប់គ្រង​ហានិភ័យ សវនកម្ម​ក្រោយពេល​បញ្ចេញ​ទំនិញ​ពី​គយ និង​ប្រព័ន្ធ​បញ្ជរ​តែមួយ​ជាតិ​ជាដើម សំដៅ​កែលម្អ​បរិយាកាស​វិនិយោគ និង​ពាណិជ្ជកម្ម​នៅ​កម្ពុជា ឱ្យ​កាន់​តែមាន​ភាពប្រសើរឡើង​ថែមទៀត​។​
៤-​​ចូលរួម​អនុវត្ត​ឱ្យបាន​ម៉ឺងម៉ាត់ និង​ប្រកបដោយ​ប្រសិទ្ធភាព​ខ្ពស់​នូវ​បណ្តា​វិធានការ​នានា ដែល​រាជ​-​រដ្ឋាភិបាល​បានដាក់​ចេញ សំដៅ​ទប់ស្កាត់​ការឆ្លង​រីក​រាលដាល​នៃ​ជំងឺ​កូ​វីដ​-១៩ និង​ដោះស្រាយ​រាល់​ផលប៉ះពាល់​នានា​ដែល​បង្កឡើង​ដោយ​ជំងឺ​នេះ ពិសេស​គឺ​ត្រូវអនុវត្ត​ឱ្យបាន​ខ្ជាប់ខ្ជួន​នូវ​បណ្តា​វិធានការ ដែល​មានចែង​នៅក្នុង​យុទ្ធសាស្ត្រ​ស្តីពី​ការរស់នៅ​តាម​គន្លង​ប្រក្រតីភាព​ថ្មី ក្នុង​បរិបទ​នៃ​ជំងឺ​កូ​វីដ​-១៩ ព្រមទាំង​វិធានការ​ជាក់ស្តែង​ទាំងឡាយ ដែល​មានចែង​នៅក្នុង​ឯកសារ «​ក្របខណ្ឌ​យុទ្ធសាស្ត្រ និង​កម្មវិធី​ស្ដារ និង​ជំរុញ​កំណើនសេដ្ឋកិច្ច​កម្ពុជា នៅក្នុង​ការរស់នៅ​ជាមួយ​កូ​វីដ​-១៩ តាម​គន្លង​ប្រក្រតីភាព​ថ្មី សម្រាប់​ឆ្នាំ​២០២១-២០២៣»​។​
៥-​​ពង្រឹង​បន្ថែមទៀត​នូវ​ប្រសិទ្ធភាព​នៃ​ការបង្ការ និង​បង្ក្រាប​អំពើ​រត់គេច​ពន្ធ សំដៅ​បង្កើន​ចំណូល​ជូន​រដ្ឋ​, ធានា​នូវ​ការប្រកួតប្រជែង​ដោយ​ស្មើភាព​សម្រាប់​ធុរកិច្ច​, និង​លើកស្ទួយ​អនុលោមភាព​និង​វប្បធម៌​សារពើពន្ធ​នៅ​កម្ពុជា​។​
​ដើម្បី​ជួយ​បង្កើន​ប្រសិទ្ធភាព​ការងារ​សម្រាប់​ឆ្នាំ​២០២២ លោក​អគ្គបណ្ឌិត​សភាចា​រ្យ​ឧបនាយករដ្ឋមន្ត្រី បានផ្ដល់​ការណែនាំ​បន្ថែមចំនួន ៨ ចំណុច រួមមាន​៖ ទី​១-​បន្តធ្វើ​សាមញ្ញ​កម្ម​នីតិវិធី ទី​២-​លើកកម្ពស់​ប្រសិទ្ធភាព​ការងារ​បង្ការ​និង​បង្ក្រាប​បទល្មើស​ឱ្យបាន​សកម្ម​ដូច​ភ្លៀងរលឹម​ទាំង​នៅ​ដើមទី កណ្តាល​ទី និង​ចុង​ទី ដោយ​រាប់បញ្ចូល​ទាំង​ការបង្ក្រាប​ទំនិញ​ក្លែងក្លាយ​, ទំនិញ​ល្មើស​សិទ្ធិ​ចែកចាយ​ផ្ដាច់មុខ​, ទំនិញ​ដែល​អាច​ត្រូវបាន​ប្រើប្រាស់​ជា​វត្ថុធាតុដើម​សម្រាប់​ផលិត​គ្រឿងញៀន​, និង​ការសហការ​ជាមួយ​អង្គភាព​ពាក់ព័ន្ធ​ក្នុងការ​កំណត់​មុខសញ្ញា​ករណី​សង្ស័យ​បទល្មើស សម្អាត​ប្រាក់​ជ្រក​ក្រោមរូបភាព​ពាណិជ្ជកម្ម​, ទី​៣-​ត្រូវ​ព​ន្លឿ​ន​ការពិនិត្យ​លិខិតបទដ្ឋាន​គតិយុត្ត​នានា​ពាក់ព័ន្ធ​នឹង​គយ ទី​៤-​ត្រូវ​ពង្រឹង​ការងារ​បច្ចេកទេស​គយ និង​ការប្រើប្រាស់​ប្រព័ន្ធ​បច្ចេកវិទ្យា​ដើម្បី​លើកកម្ពស់​ប្រសិទ្ធភាព​និង​ផលិតភាព​ការងារ​, ទី​៥-​បន្ត​ជំរុញ​អនុវត្ត​ឱ្យ​ម៉ឹងម៉ាត់ និង​មាន​ប្រសិទ្ធភាព​ការងារ​ប្រមូល​ពន្ធអាករ​រថយន្ត​គ្មាន​ពន្ធ​មាន​ស្រាប់​ក្នុងស្រុក​, ទី​៦-​បន្ត សម្របសម្រួល​ជាមួយ​ស្ថាប័ន​មាន​សមត្ថកិច្ច​ពាក់ព័ន្ធ​នឹង​ការទប់ស្កាត់​អំពើ​រត់គេច​ពន្ធ និង​បន្ត​កិច្ចសហការ​ល្អជា​មួយផ្នែក​ឯកជន​ពិសេស​ក្រោម​យន្តការ​ក្រុម “​ឃ​” នៃ​វេទិកា​រាជរដ្ឋាភិបាល​-​ផ្នែក​ឯកជន​,​ទី​៧-​យកចិត្តទុកដាក់​អនុវត្ត​យុទ្ធសាស្ត្រ​បច្ចេកវិទ្យា​គមនាគមន៍​និង​ព័ត៌មាន​របស់ អគរ ពិសេស​ការអនុវត្ត​ប្រព័ន្ធ​បញ្ជរ​តែមួយ​ជាតិ (National Single Window) ឱ្យ​កាន់តែ​ទូលំទូលាយ​និង​មាន​ប្រសិទ្ធភាព​, និង ទី​៨-​ត្រូវ​បន្ត​ប្រតិបត្តិ​ឱ្យបាន​ខ្ជាប់ខ្ជួន និង​ជាប់​ជាប្រចាំ​នូវ​វិធានការ​សុខាភិបាល ពិសេស​វិធានការ ៣ ការពារ និង ៣ កុំ ដើម្បី​ទប់ស្កាត់​ការរីក​រាលដាល​នៃ​ជំងឺ​កូ​វីដ​-១៩ ក្នុង​គន្លង​ប្រក្រតីភាព​ថ្មី​។​
​ក្នុង​កិច្ចប្រជុំ​នេះ​លោក​អគ្គបណ្ឌិត​សភាចា​រ្យ​ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច​និង​ហិរញ្ញវត្ថុ បាន​បំពាក់​គ្រឿង​ឥស្សរិយយស ជូន​ដល់​មន្ត្រី​គយ​និង​រដ្ឋាករ​មាន​ស្នាដៃ​មួយចំនួន ដើម្បី​ជាការ​លើកទឹកចិត្ត​៕សរន