ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ រដ្ឋមន្ត្រី​ការពារជាតិ​អង់គ្លេស លោក បិ​ន វ៉ាល់​ឡេស (Ben Wallace) បាន​និយាយ​កាលពី​ថ្ងៃ​ព្រហស្បតិ៍​ទី​១០​កុម្ភៈ​ថា​រុស្ស៊ី​គ្រោង​នឹង​ធ្វើ​សមយុទ្ធ​យុទ្ធសាស្ត្រ​​នុយក្លេអ៊ែ​រ ត្បិត​មាន​ភាព​តានតឹង​ខ្លាំង​ជុំវិញ​អ៊ុ​យក្រែន​។​

​លោក​វ៉ាល់​ឡេស​បាន​ព្រមាន​ថា សកម្មភាព​របស់​វិមាន​ក្រឹម​ឡាំង​កំពុង​ឆ្ពោះទៅរក​ទិសដៅ​ខុស បើទោះបីជា​មាន​ការខិតខំ​ប្រឹងប្រែង​ស្វែងរក​ដំណោះស្រាយ​ការទូត​ក៏ដោយ​។​លោក​ថា​ចារកម្ម​បានអោយ​​តម្រុយ​ថា រុស្ស៊ី​កំពុង​ចូលរួម​ក្នុង​ផែនការ​សម្រាប់​អ្វី​ដែល​គេ​ហៅថា ប្រតិបត្តិការ​ទង់​ក្លែងក្លាយ ដើម្បី​ជា​លេស​សម្រាប់​ការឈ្លានពាន​អ៊ុយ​ក្រែន​ក៏ដូចជា​ការអនុវត្ត​ការវាយប្រហា​រតាម​អ៊ី​ន​ធឺ​ណេត​និងស​ក​​ម្ម​ភាព​អស្ថិរភាព​ផ្សេងទៀត​។​

​លោក​វ៉ាល់​ឡេស​បាន​ប្រាប់​វិទ្យុ BBC ថា “​ទោះបីជា​មាន​ការចរចា​ក៏ដោយ​ក៏​ប៉ុន្តែ​ទិសដៅ​នៃ​ការ​ធ្វើ​ដំណើរ​គឺ​ខុស​។​រុស្ស៊ី​នៅតែ​បង្កើន​ក្រុម​យុទ្ធវិធី​កងវរសេនាតូច​របស់​ពួកគេ​…​ពួកគេ​គ្រោង​នឹង​ចាប់ផ្តើម​​សមយុទ្ធ​យុទ្ធសាស្ត្រ​នុយក្លេអ៊ែរ​ក្នុងពេល​ឆាប់ៗ​នេះ ហើយ​ជា​ការពិត​ណាស់ យើង​ឃើញ​សកម្មភាព​កាន់តែ​ច្រើន​នៅ​កន្លែង​ផ្សេង​”​។​

​ប្រភព​ការពារជាតិ​រុស្ស៊ី​មួយ​ក៏​បាន​ប្រាប់​ទីភ្នាក់ងារ​សារព័ត៌មាន TASS នៅ​ដើមឆ្នាំ​នេះ​ដែរ​ថា សមយុទ្ធ​នុយក្លេអ៊ែរ ដែល​គេ​ស្គាល់​ថា “Thunder”​នឹង​មាន​ការចូលរួម​ពី​កងកម្លាំង​នុយក្លេអ៊ែរ​យុទ្ធសាស្ត្រ​​ទាំង​បី​របស់​រុស្ស៊ី ដោយ​សាកល្បង​នីតិវិធី​បាញ់​នុយក្លេអ៊ែរ​ចេញពី​ដីគោក សមុទ្រ និង​អាកាស​។​

​សមយុទ្ធ​នុយក្លេអ៊ែរ​ត្រូវបាន​ធ្វើឡើង​ជា​ញឹកញាប់​ក្នុងប្រទេស​រុស្ស៊ី ប៉ុន្តែ​ការសម្រេចចិត្ត​បន្ត​ធ្វើ​លំ​ហាត់​សមយុទ្ធ​បែបនេះ​នៅ​ចំពោះមុខ​ភាព​តានតឹង​ជុំវិញ​អ៊ុយ​ក្រែ​ននឹង​បង្ក​ការព្រួយបារម្ភ​បន្ថែម​ដល់​មហាអំណាច​ពិភពលោក​។​

​ដំណឹង​នេះ​កើតឡើង​ខណៈ​កងកម្លាំង​មកពី​ប្រទេស​រុស្ស៊ី​និង​បេឡា​រូស​ធ្វើ​សមយុទ្ធ​យោធា​រួមគ្នា​ជាមួយនឹង​ទាហាន​រុស្ស៊ី​ប្រមាណ ៣០.០០០ នាក់​ចូលរួម​ក្នុង​សមយុទ្ធ​រយៈពេល ១០ ថ្ងៃ​នៅ​ជិត​ព្រំដែន​​អ៊ុ​យក្រែន នៅក្នុង​អ្វី​ដែល​អគ្គលេខាធិការ​អង្គការ​ណា​តូ​លោក ជែន ស្តូល​ធិន​បឺក (Jens Stoltenberg) ពណ៌នា​ថា​ជា “​ពេលវេលា​ដ៏​គ្រោះថ្នាក់​” សម្រាប់​ទ្វីបអឺរ៉ុប​។​

​លោក​ស្តូល​ធិន​បឺក​បានប្រាប់​អ្នកយក​ព័ត៌មាន​កាលពី​ថ្ងៃ​ព្រហស្បតិ៍​ក្នុង​សន្និសីទ​សារព័ត៌មាន​រួមគ្នា​ជាមួយ​នាយក​រដ្ឋមន្ត្រី​អង់គ្លេស បូរី​ស ច​ន​សុន ថា​”​យើង​កំពុង​តាមដាន​យ៉ាង​ដិត​ដល់​នូវ​ការដាក់​​ពង្រាយ​ទាហាន​របស់​រុស្ស៊ី​នៅក្នុង​ប្រទេស​បេឡា​រូស ដែល​ជា​ការ​ដាក់​ពង្រាយ​ធំ​បំផុត​ចាប់តាំងពី​ទីបញ្ចប់​នៃ​សង្គ្រាមត្រជាក់​”​។​

“​នេះ​គឺជា​ពេលវេលា​ដ៏​គ្រោះថ្នាក់​មួយ​សម្រាប់​សន្តិសុខ​អឺរ៉ុប​។ ចំនួន​កងកម្លាំង​រុស្ស៊ី​បន្ត​កើនឡើង​។ ពេលវេលា​ព្រមាន​សម្រាប់​លទ្ធភាព​វាយប្រហារ​កាន់តែ​ជិត​អស់​”៕

​រុស្ស៊ី​និង​បេឡា​រូស​កំពុង​ធ្វើ​សមយុទ្ធ​យោធា​រួមគ្នា​ក្បែរ​ព្រំដែន​អ៊ុ​យក្រែន​