​ប្រែ​សម្រួលៈ​បំណង​(​ដេល្លី​ម៉េល​)៖ អ្នកកាសែត​ម៉ិក​ស៊ិចម្នាក់​ត្រូវបាន​បាញ់សម្លាប់​នៅក្នុងរ​ដ្ឋ​វ៉ូ​រ៉ា​ចា​(Oaxaca)​កាលពី​ថ្ងៃ​ព្រហស្បតិ៍​ទី​១០​មករា ។​វា​ជា​ការសម្លាប់​អ្នកកាសែត​ចុងក្រោយ​ក្នុងចំណោម​ការសម្លាប់​​អ្នកសារព័ត៌មាន​ជា​បន្តបន្ទាប់​នៅក្នុង​ប្រទេស​នេះ ដែល​បាន​នាំ​អោយ​ពួក​សមាជិកសភា​អាម៉េរិក​ដាក់​សម្ពាធ​អោយ​ម៉ិក​ស៊ិច​បង្កើន​ការការពា​រ​អ្នកសារព័ត៌មាន​។​

​ប៉ូលិស​បាន​និយាយថា លោក​ហេ​ប៊ឺ ឡូប៉េស​(Heber Lopez)​អ្នកកាសែត​ឯករាជ្យ​ម្នាក់​ដែល​បើក​កាសែត​ណូ​ទីស្យា​ស្វេប​(NoticiasWeb)​ត្រូវបាន​បាញ់សម្លាប់​នៅក្នុង​បន្ទប់​ថត​ផ្សាយ​របស់លោក​។​

​រដ្ឋអាជ្ញា​រដ្ឋ​វ៉ូ​រ៉ា​ចា​បានអោយដឹងថា មនុស្ស​២​នាក់​ត្រូវបាន​ចាប់ខ្លួន​ពាក់ព័ន្ធ​នឹង​ឃាតកម្ម​នេះ តែ​ការស៊ើបអង្កេត​នៅ​កំពុង​បន្តធ្វើ​។​

​លោក ឡូប៉េស ធ្លាប់បាន​ទទួល​ការ​គំរាម​សម្លាប់​នៅ​ឆ្នាំ​២០១៩ ។​លោក​តែង​សរសេរ​អំពី​រឿង​នយោបាយ​និង​អំពើពុករលួយ​ក្នុង​រដ្ឋាភិបាល​។​

​វា​ជា​ការវាយប្រហារ​ចុង​ក្រោយ​មួយ​ក្នុងចំណោម​ការវាយប្រហា​រ​ជា​បន្តបន្ទាប់​លើ​អ្នកកាសែត​នៅ​ម៉ិក​ស៊ិច​នៅ​ប៉ុន្មាន​សប្តាហ៍​មក​នេះ​។​អ្នកកាសែត​បីនាក់​និង​បុគ្គលិក​សារព័ត៌មាន​ម្នាក់​ត្រូវបាន​សម្លាប់​នៅ​​ក្នុង​ខែមករា​ឆ្នាំ​២០២២​តែមួយ និង​អតីត​អ្នកកាសែត​ម្នាក់​ត្រូវបាន​សម្លាប់​កាលពី​ល្ងាច​ថ្ងៃ​សៅរ៍​សប្តាហ៍​មុន​។​

​សមាជិក​ព្រឹទ្ធសភា​អាម៉េរិក​ពីរ​រូប​កាលពី​ថ្ងៃ​អង្គារ បាន​ទទូច​អោយ​អាជ្ញាធរ​ម៉ិក​ស៊ិច​បង្កើន​ការការពា​រ​អ្នកកាសែត និង​បាន​រិះគន់​ប្រធានាធិបតី អង់​ដ្រេ​ស ម៉ាញូ​អែល ឡូប៉េស ហ្សូ​ប្រាឌ័​រ (Andres Manuel Lopez Obrador)​ថា​បន្ត​វាយប្រហារ​អ្នកសារព័ត៌មាន​ដែល​រិះគន់​លោក​។​

​យោងតាម​អង្គការ​សិទ្ធិ​មនុស្ស​មួយ អ្នកកាសែត​ប្រមាណ​១៤៥​នាក់​ត្រូវបាន​សម្លាប់​នៅ​ម៉ិក​ស៊ិច​ចាប់ពី​ឆ្នាំ​២០០០​ដល់​២០២១ ដោយ​ធ្វើអោយ​ម៉ិក​ស៊ិច​ក្លាយជា​ប្រទេស​គ្រោះថ្នាក់​បំផុត​សំរាប់​អ្នកសារព័ត៌មាន​៕

​មិត្ត​ភ័ក្តិ​ចូលរួម​ក្នុង​ការតវ៉ា​ទាមទារ​រក​យុត្តិធម៌​អោយ​អ្នកកាសែត​ម៉ិក​ស៊ិចម្នាក់​ដែល​ត្រូវបាន​គេ​ធ្វើឃាត​កាលពី​ឆ្នាំ​២០២១​នៅ​ទីក្រុង​វែរ៉ា​គ្រូស​