​ប្រែ​សម្រួលៈ​បំណង​(ST)៖ អាម៉េរិក អូស្ត្រាលី ជប៉ុន​និង​ឥណ្ឌា​កាលពី​ថ្ងៃ​សុក្រ​ទី​១១​កុម្ភៈ​បាន​សន្យា​ធ្វើ​កិច្ចសហប្រតិបត្តិការ​អោយ​កាន់តែ​ស៊ី​ជំរៅ​ឡើង​ដើម្បី​ធានា​តំបន់​ឥណ្ឌូ​ប៉ាស៊ីហ្វិក​សេរី​ចេញពី​ការ​​សម្លុត​គំរាម​បង្ខិតបង្ខំ ដោយ​ចង់​សំដៅ​ការពង្រីក​សេដ្ឋកិច្ច​និង​យោធា​ចិន ដោះស្រាយ​ការប្រែប្រួល​អាកាសធាតុ កូវី​ដ​១៩ និង​បញ្ហា​ប្រឈម​ផ្សេងៗ​។​

​ពួក​រដ្ឋមន្ត្រី​ក្នុង​ក្រុម​ដែល​ហៅថា ក្វា​ដ​(Quad)​បាន​ប្តេជ្ញា​ធ្វើការ​លើ​បញ្ហា​ជំនួយ​មនុស្សធម៌ ភេរវកម្ម ចោរកម្ម​តាម​អ៊ិន​ធឺ​ណិ​ត សន្តិសុខ​សមុទ្រ​និង​ការ​ប្រឈម​អំពី​ខ្សែសង្វាក់​ផ្គត់ផ្គង់​សកល​។​

​ទោះជា​នៅ​ក្រៅ​ព្រំដែន​របស់​ក្រុម​បួន​ប្រទេស​នេះ វិបត្តិ​កាន់តែ​កើន​ឡើង​រវាង​លោក​ខាងលិច​និង​រុស្ស៊ី​ស្តីពី​អ៊ុ​យក្រែន ក៏​ជា​របៀបវារៈ​មួយ ដោយ​រដ្ឋមន្ត្រី​ការបរទេស​អាម៉េរិក​លោក អ៊ែន​ថូ​នី ប្លីង​កិន បាន​​និយាយ​ថា​ការបង្កើន​កម្លាំង​ទ័ព​របស់​រុស្ស៊ី​ជាការ​ប្រឈម​មួយ​ចំពោះ​សណ្តាប់ធ្នាប់​ពិភពលោក​ផ្អែកលើ​ច្បាប់ ដែល​ក្រុម​ក្វាដ​ត្រូវតែ​រួមគ្នា​ថែរក្សា​។​

​ពេល​បើក​កិច្ចប្រជុំ លោក​បាន​និយាយថា​« នោះ​រួមមាន​សិទ្ធិ​របស់​ប្រទេស​ទាំងអស់​ក្នុង​ការជ្រើសរើស​ផ្លូវ​ដើរ​ផ្ទាល់​របស់​គេ សេរីភាព​ចេញពី​ការបង្ខិតបង្ខំ និង​សិទ្ធិ​មាន​អធិបតេយ្យភាព​ព្រមទាំង​បូរណភាព​​ទឹក​ដី​ត្រូវតែ​បាន​ការគោរព​។​មិន​ថា​នៅទីនេះ ឥណ្ឌូ​ប៉ាស៊ីហ្វិក នៅ​អឺរ៉ុប ឬ​នៅ​កន្លែង​ណាមួយ​ផ្សេង​ក្នុង​លោក​ឡើយ​»​។​

​លោក​ប្លីង​កិន​បាន​ទៅ​ដល់​អូស្ត្រាលី​នៅ​សប្តាហ៍​នេះ​ចំ​ពេល​រដ្ឋាភិបាល​ក្រុង​វ៉ាស៊ីនតោន​កំពុង​ប្រទាញប្រទង់​ជាមួយ​រដ្ឋាភិបាល​ក្រុង​មូ​ស្គូ ដែល​កំពុងផ្តុំ​កម្លាំង​ទ័ពជា​ង​១០០.០០០​នាក់​នៅ​ក្បែរ​ព្រំដែន​អ៊ុ​យក្រែន​​ដែលនាំអោយ​មាន​ការព្រួយបារម្ភ​ថា រុស្ស៊ី​នឹង​ចូល​ឈ្លានពាន​អ៊ុ​យក្រែន​។​

​ទោះជា​យ៉ាងណា រុស្ស៊ី​បាន​អះអាង​ថា​ខ្លួន​មិន​មាន​ផែនការ​ធ្វើ​ដូច្នេះ​ទេ​។​

​រដ្ឋមន្ត្រីការបរទេស​អូស្ត្រាលី ម៉ា​រី​ស ផេន (Marise Payne)​បាន​និយាយថា កិច្ចសហប្រតិបត្តិការ​របស់​ក្វាដ​អំពី​ការឆ្លើយតប​ប្រឆាំង​កូវី​ដ​១៩​របស់​តំបន់​«​មាន​សារសំខាន់​ណាស់​» ហើយ​បញ្ហា​សង្គ្រាម​​ប្រឆាំង​ចោរកម្ម​តាម​អ៊ិន​ធឺ​ណិ​ត សន្តសិសុខ​សមុទ្រ ហេដ្ឋារចនាសម្ពន្ធ ចំណាត់ការ​អំពី​អាកាសធាតុ​និង​ជំនួយ​គ្រោះមហន្តរាយ ជា​ពិសេស​ក្រោយ​ការផ្ទុះ​ភ្នំភ្លើង​នៅ​តុង​ហ្កា​កាលពី​ពេល​ថ្មីៗ ក៏​ជា​ការយកចិត្ត​​ទុកដាក់​។​

​លោកស្រី ផេន ក៏​បាន​និយាយថា បញ្ហា​អ៊ុ​យក្រែន ចិន​និង​កូរ៉េ​ខាងជើង​ក៏​នឹង​ត្រូវ​លើក​មក​ពិភាក្សា​ផង​ដែរ​។​

​សូមបញ្ជាក់​ថា ប្រទេស​ក្នុង​ក្រុម​ក្វាដ​នេះ​បាន​ធ្វើ​សមយុទ្ធ​ជើង​ទឹក​ប្រចាំ​ឆ្នាំ​នៅ​ទូ​ទាំង​ឥណ្ឌូ​ប៉ាស៊ីហ្វិក​ដើម្បី​បង្ហាញ​អន្តរ​ប្រតិបត្តិការ ហើយ​អាម៉េរិក​ធ្វើការ​ល្បាត​ក្នុង​សមុទ្រ​ចិន​ខាងត្បូង​ជាប្រចាំ​ក្នុង​អ្វី​​ដែល​រដ្ឋាភិបាល​ក្រុង​វ៉ាស៊ីនតោន​ហៅថា​សេរីភាព​នាវាចរណ៍​។​

​ចិន​ធ្លាប់​ហៅ​ក្រុង​ក្វាដ​នេះ​ថា​ជា សំណង់​សង្គ្រាមត្រជាក់​មួយ​និង​ជា​បន​ដែល​ផ្តោត​លើ​ប្រទេស​ផ្សេងៗ​។​

​ដំណើរ​មក​ចូលរួម​ប្រជុំ​របស់​លោក​រដ្ឋមន្ត្រី​ការបរទេស​អាម៉េរិក​កើត​ឡើង​ក្រោយ​ពី​មេដឹកនាំ​ចិន​និង​រុស្ស៊ី​កាលពី​សប្តាហ៍​មុន​បានប្រកាស​ភាព​ជា​ដៃគូ​យុទ្ធសាស្ត្រ​«​គ្មាន​ដែន​កំណត់​»​មួយ ដើម្បី​ស្ថាបនា​​សណ្តាប់ធ្នាប់​អន្តរជាតិ​ថ្មី​មួយ ផ្អែក​លើ​ការបកស្រាយ​ផ្ទាល់​របស់​ប្រទេស​ទាំង​ពីរ​ស្តីពី​សិទ្ធិ​មនុស្ស​និង​លទ្ធិប្រជាធិបតេយ្យ​៕

​ក្រុម​រដ្ឋមន្ត្រីការបរទេស​ក្រុម​ក្វាដ ជួបប្រជុំ​គ្នា​នៅ​ក្រុង​មែ​ល​ប៊​ន ប្រទេស​អូស្ត្រាលី កាលពី​ថ្ងៃ​១១​កុម្ភៈ​