​ប្រែ​សម្រួល : កញ្ញា​ដា​លី​ស (VNExpress) ៖ អ្នក​ក្រុង​ហូជីមិញ​បាន​សម្រុក​ទៅ​ផ្លូវ​តាន់​គី​តាន់​គុយ ក្នុង​សង្កាត់​តាន់​ភូ (Tan Phu)​នៃ​ទីក្រុង​ហូជីមិញ​ដើម្បី​ទិញ​ត្រី​រ៉ស់​អាំង ដែល​ជា​តង្វាយ​មួយ​​ត្រូវតែ​មាន​ដាច់​ខាត់​នៅ​ថ្ងៃ “​ទេវតា​ទ្រព្យ​”​។​

​ផ្លូវ​តាន់​គី​តាន់​គុយ​គឺ​ពោរពេញ​ដោយ​អតិថិជន​ក្នុង​រយៈពេល​ប៉ុន្មាន​ថ្ងៃនេះ ខណៈ​អ្នក​ហូជីមិញ​តម្រង់​ជួរ​នៅ​មុខ​តូប​ដើម្បី​ទិញ​ត្រី​រ៉ស់​អាំង​សម្រាប់​ថ្ងៃ “​ទេវតា​ទ្រព្យ​” ឬ​ហៅ​ថា ថ្ងៃ​កៃ​សិន (Caishen Day) ឬ ថា​ន់​តៃ (Than Tai)​ជា​ភាសា​វៀតណាម​។​

​ទេវតា​ទ្រព្យ ដែល​គោរព​បូជា​ដោយ​ក្រុម​គ្រួសារ​វៀតណាម​នៅ​ថ្ងៃទី ១០ នៃ​ឆ្នាំ​ចន្ទគតិ (១០ កុម្ភៈ ឆ្នាំនេះ​) ត្រូវ​គេ​ជឿ​ថា​នឹង​នាំ​លាភ​សំណាង​ដល់​មុខ​ជំនួញ​និង​ក្រុមគ្រួសារ​ពេញ​មួយឆ្នាំ​។​

​តូប​រាប់សិប ដែល​អាំងត្រី​រ៉ស់​រាប់​តោន​សម្រាប់​ជា​សំណែន​ពិសេស​នៅ​ថ្ងៃ​ទេវតា​ទ្រព្យ បាន​ចាប់ផ្តើម​លក់​នៅ​ម៉ោង ៤ ទៀប​ភ្លឺ ដើម្បី​ឆ្លើយតប​នឹង​តម្រូវការ​ទីផ្សារ​ដ៏​ខ្ពស់​។​

​លោក ង្វៀន ទ្រុង បាន​បង្ហើប​ឱ្យដឹងថា តូប​របស់​គាត់​បាន​ដំណើរការ​ពេញ​សមត្ថភាព​ក្នុង​រយៈពេល​ពីរ​ថ្ងៃ​កន្លងមកនេះ​។​

​បុរស​វ័យ​៦៨​ឆ្នាំ​រូប​នេះ​បាន​និយាយថា “​ជា​រៀងរាល់ឆ្នាំ ខ្ញុំ​បាន​នាំចូល​ត្រី​រ៉ស់​ប្រហែល ៣ ពាន់​ក្បាល (៥ តោន​) ពី​ផ្សារ​លក់ដុំ​បិ​ញ​ទៀន (Binh Dien) សម្រាប់​ថ្ងៃ​ទេវតា​ទ្រព្យ​”​។​

​នៅ​ភាគខាងត្បូង ប្រជាជន​តែង​ធ្វើ​ដង្វាយ​ជា​ផ្លែ​ឈើ ផ្កា ក្រដាស​សែន ធូប សាច់​អាំង និង ជាពិសេស​ត្រី​រ៉ស់​អាំង ដែល​ខានមិនបាន​នោះឡើយ​។​

​ត្រី​រ៉ស់​អាំង​រាប់ពាន់​ក្បាល​ត្រូវបាន​រៀបចំ​យ៉ាង​ស្អាត​នៅលើ​ធ្នើរ​ខាងក្នុង​តូប​របស់​លោក​ទ្រុង​។ បុគ្គលិក​របស់​គាត់​បា​ន​ប្រឹង​ធ្វើការ​យ៉ាង​ខ្លាំងក្លា​បំផុត​ដើម្បី​ធ្វើ​ត្រី រៀបចំ​បន្លែ និង​ធ្វើ​ទឹក​ជ្រលក់​។​

​ជាធម្មតា​តូប​របស់​លោក​ទ្រុងមាន​បុគ្គលិក​តែ​ពីរ​បី​នាក់​ប៉ុណ្ណោះ ប៉ុន្តែ​ក្នុងឱកាស​នេះ លោក​និយាយថា​បាន​កៀរគរ​បុគ្គលិក​ជិត ៣០ នាក់​។​

​អាស្រ័យ​លើ​ទំហំ ត្រី​រ៉ស់​អាំង​នីមួយៗ​មានតម្លៃ​ចន្លោះ​ពី ១៧០.០០០-២០០.០០០ ដុង (៧,៤៩-៨,៨១ ដុល្លារ​)​។ បើ​ផ្អែក​តាម​តូប​ជា​ច្រើន តម្លៃ​នេះ​គឺ​កើនឡើង​បន្តិច​ធៀប​នឹង​ឆ្នាំ​មុន​។​

​នាង​ហាំង ជា​អ្នកស្រុក​នៅ​សង្កាត់​តាន់​បិ​ញ (Tan Binh) បាន​ទិញ​ត្រីអាំង​ពីរ​នៅ​ថ្ងៃ​ទេវតា​ទ្រព្យ​។​

​នាង​និយាយថា “​ដោយសារតែ​ខ្ញុំ​ជា​ម្ចាស់​អាជីវកម្ម ការ​ថ្វាយបង្គំ​ទេវតា​ទ្រព្យ​គឺ​សំខាន់​ណាស់​សម្រាប់​ខ្ញុំ​”៕

តូប​រាប់សិប​ដាក់លក់​ត្រី​រ៉ស់​អាំង​សម្រាប់​ប្រជាជន​ក្រុង​ហូជីមិញ​សែន​នៅ​ថ្ងៃ​ទេវតា​ទ្រព្យ