ដោយៈបញ្ញាសាស្រ្ត/ក្រចេះ៖គិត​ត្រឹម​ដំណាច់​ឆ្នាំ​២០២១​ទំហំ​ទ្រព្យសកម្ម​របស់​គ្រឹះស្ថាន​មីក្រូ​-​ហិរញ្ញវត្ថុ​និង​គ្រឹះស្ថាន​ឥណទាន​ជនបទ​សរុប​មាន​ប្រមាណ ៣៧,៣០ ទ្រី​លាន​រៀល (​ស្មើនឹង ៩,១៦ ប៊ី​លាន​ដុល្លារ​អាម៉េរិក១ប៊ីលានស្មើ ១.០០០លាន)។​​នេះ​គឺជា​ការបញ្ជាក់​របស់​លោក ម៉ែន ភក្តី ប្រធាន​នាយក​​ដ្ឋា​ន​គ្រប់គ្រង​ទិន្នន័យ​និង​វិភាគ​ម៉ាក្រូរបស់​ធនាគារជាតិនៃ​កម្ពុជា​ព្រឹក​ថ្ងៃទី​១១ ខែកុម្ភៈ ឆ្នាំ​២០២២ ក្នុង​សិក្ខាសាលា​ផ្សព្វផ្សាយស្តីពី «​វិស័យ​មីក្រូហិរញ្ញវត្ថុ​នៅ​កម្ពុជា​»​ជូន​អ្នក​ពាក់​ព​ន្ធ័​ក្នុងស្រុក​សំបូរ ខេត្តក្រចេះ​។​

លោក ម៉ែន ភក្តី ប្រធាន​នាយក​​ដ្ឋា​ន​គ្រប់គ្រង​ទិន្នន័យ​និង​វិភាគ​ម៉ាក្រូរបស់​ធនាគារជាតិនៃ​កម្ពុជា(រូបថតធនាគារជាតិនៃកម្ពុជា)

​លោក ម៉ែន ភក្តី បាន​បញ្ជាក់ថា​ ទោះបី​កម្ពុជា​ជួប​ការលំបាក​ដែល​បណ្តាលមកពី​ការរីក​រាលដាល​នៃ​ជំងឺ​កូ​វីដ​១៩​យ៉ាងណា ក៏ដោយ​ក៏​សកម្មភាព​ប្រតិបត្តិការ​ក្នុង​វិស័យ​មីក្រូ​នៅ​កម្ពុជា​នៅតែ​ដំណើរការ​និង ប្រតិបត្តិការ​ដោយ​កាទ​ទទួលខុសត្រូវ​ខ្ពស់​ជានិច្ច​។ ជាក់ស្ដែង​គិត​ត្រឹម​ដំណាច់​ឆ្នាំ​២០២១​គ្រឹះស្ថាន​មីក្រូហិរញ្ញវត្ថុ​_ គ្រឹះស្ថាន​មីក្រូហិរញ្ញវត្ថុ​ទទួល​ប្រាក់​បញ្ញើ និង និង​គ្រឹះស្ថាន​ឥណទាន​ជន នៅតែ​ប្រតិបត្តិការ​នៅ​ទូទាំងប្រទេស​។ ហើយ​ទំហំ​ទ្រព្យសកម្ម​របស់​គ្រឹះស្ថាន​មីក្រូ​-​ហិរញ្ញវត្ថុ​និង​គ្រឹះស្ថាន​ឥណទាន​ជនបទ​សរុប​មាន​ប្រមាណ ៣៧,៣០ ទ្រី​លាន​រៀល (​ស្មើនឹង ៩,១៦ ប៊ី​លាន​ដុល្លារ​​) ក្នុងនោះ​ប្រាក់កម្ចី​សរុប​មាន​ប្រមាណ ៣១,៩៦ ទ្រី​លាន​រៀល (​ស្មើនឹង ៧,៨៤ ប៊ី​លាន​ដុល្លារ​​) ផ្តល់​ដល់​អតិថិជន​ចំនួន​ជាង ១,៩៧ លាន​គណនី និង​គណនី​ប្រាក់​បញ្ញើ​នៅ​គ្រឹះស្ថាន​មីក្រូហិរញ្ញវត្ថុ​ទទួល​ប្រាក់​បញ្ញើ​មាន​ចំនួន​ជាង ២,៥៧ លាន​គណនី ដែលមាន​ទំហំ​ប្រាក់​បញ្ញើ​សរុប​ប្រមាណ ១៦,៨៤ ទ្រី​លាន​រៀល (​ស្មើនឹង ៤,១៣ ប៊ី​លាន​ដុល្លារ​​)​។​

លោកបន្តថា ដោយឡែក​នៅក្នុង​អំឡុង​រង​ការ​ប៉ះ ពាល់​ពី​កូ​វីដ​១៩​នេះដែរ គ្រឹះស្ថាន​ធ​គារ​និង​ហិរញ្ញវត្ថុ​ក៏បាន​រៀបចំ​ឥណទាន​ឡើងវិញ​ដើម្បី​គាំពារ​ដល់​អតិថិជនរ​បស់​ខ្លួន​ដែរ​។​បើតាម​ការបញ្ជាក់​ពី​លោក សួន ពិសី ប្រធាន​ក្លឹប​ប្រតិបត្តិការ​នៃ​សមាគម​មីក្រូហិរញ្ញវត្ថុ​កម្ពុជា​បាន​ឲ្យ​ដឹងថា​នៅ​ឆ្នាំ​២០២១​កន្លងទៅនេះ​ឥណទាន​ដែល​បានរៀបចំ​ឡើងវិញ​មាន​ចំនួន​៣៧០ ៧៨៥ គណនី​ស្មើនឹង​ទឹកប្រាក់​៥,៤៩​ប៊ី​លាន​ដុល្លា​។​

លោក ម៉ែន ភក្តី​ បានបញ្ជាក់​ទៀតថា​ ​វិស័យ​មីក្រូហិរញ្ញវត្ថុ​នៅ​កម្ពុជា បច្ចុប្បន្ន​បាននិងកំពុង​ដើរតួនាទី​យ៉ាងសំខាន់​ក្នុងការ​រួមចំណែក​អភិវឌ្ឍ​សេដ្ឋកិច្ច​និង​សង្គម​កម្ពុជា ជាពិសេស​នៅក្នុង​ការកាត់បន្ថយ​ភាពក្រីក្រ​របស់​ប្រជាជន​នៅតាម​តំបន់​ជនបទ​។​ដូចនេះហើយ​ទើប រាជរដ្ឋាភិបាល​កម្ពុជា​បាន​គាំទ្រ​ដល់​វិស័យនេះ តាមរយៈ​ការកំណត់​ទស្សនៈវិស័យ និង​យុទ្ធសាស្ត្រ​តម្រង់ទិស​អភិវឌ្ឍ​ច្បាស់លាស់​ដោយ​អនុញ្ញាត​ឲ្យ​វិស័យនេះ​មានលទ្ធភាព​ពង្រីក​វិសាលភាព​ប្រតិបត្តិការ​របស់ខ្លួន ប្រកបដោយ​និរន្តរភាព​និង​ទំនុកចិត្ត ព្រមទាំង​បាន​ជួយ​បង្កើត​នូវ​កាលានុវត្តភាព​ថ្មីៗ​ដល់​ការអភិវឌ្ឍ​សេវា​ហិរញ្ញវត្ថុ ក្នុង​គោលដៅ​ផ្តល់ជូន​ប្រជាជន​កម្ពុជា​នូវ​សេវា​ហិរញ្ញ​វត្ថុ​ប្រកបដោយ​ប្រសិទ្ធភាព និង​បរិ​យាប​ន្ន​។

នៅក្នុង​ឱកាស​នោះដែរ ​លោក ម៉ែន ភក្តី​ បានបង្ហាញ​មោ​ទ​នភាព​ខ្ពស់​ចំពោះ វិស័យ​មីក្រូហិរញ្ញវត្ថុបើទោះ​ជួប​វ​ប​ត្តិ​កូ​វីដ​ក៏ដោយ​វិស័យនេះ​នៅតែ​រក្សា​នូវ​ការរីកចម្រើននិង​បន្ត​ដើរតួនាទី​យ៉ាងសំខាន់​ក្នុងការ​ចូលរួមចំណែក​ស្តារ​និង​បន្ត​អភិវឌ្ឍ​សេដ្ឋកិច្ចកម្ពុជា ក្នុង​បរិបទ​នៃ​ការរស់នៅ​តាម​គន្លង​ប្រក្រតីភាព​ថ្មី​។​

លោក​បាន​បន្តទៀតថា​​ដើម្បី​ពង្រឹង​តួនាទី​យ៉ាងសំខាន់​របស់​វិស័យ​មីក្រូហិរញ្ញវត្ថុ​នេះ​ធនាគារជាតិ​នៃ​កម្ពុជា បានធ្វើ​សកម្មភាព​និង​យុទ្ធនាការ​នានា ជាច្រើន​ក្នុង​គោលដៅ​លើកកម្ពស់​ចំណេះដឹង​ផ្នែក​ហិរញ្ញវត្ថុ​ដល់​សាធារណជន ជំរុញ​ការផ្តល់​ឥណទាន​ប្រក​ដោយ​ការទទួលខុសត្រូវ និង​ពង្រឹង​គោលការណ៍​ផ្តល់​កម្ចី​ប្រកបដោយ​ក្រមសីលធម៌​វិជ្ជាជីវៈ ។​លោក​បាន​សំណូមពរ​ឲ្យ​មាន​ការជួយ​ផ្សព្វផ្សាយ​និង​អប់រំ​ប្រជាជន​ឲ្យ​ខ្ចីប្រាក់​ពី​គ្រឹះស្ថាន​ស្របច្បាប់ ព្រមទាំងប្រើប្រាស់​ប្រាក់កម្ចី​នោះ​ឲ្យ​ចំ​គោលដៅ និង​គោរព​តាម​កាតព្វកិច្ច​សង​។​

ដោយឡែក​ផ្នែក​ពាក់​ព​ន្ធ័​គប្បី​ត្រូវ​ចូលរួម​ទាំងអស់គ្នា​ជួយ​ពិនិត្យ​ស្ថានភាព​ហិរញ្ញវត្ថុ​របស់​ប្រជាជន​ឲ្យ​បាន​ម៉ត់ចត់ មុននឹង​ចេញ​លិខិតបញ្ជាក់​សម្រាប់​ស្នើសុំ​ប្រាក់កម្ចី​។​លោក​នូវបាន​ស្នើសុំ​ចំពោះ​អាជ្ញាធរ​មូលដ្ឋាន​ឲ្យ​បន្ត​រាយការណ៍ និង​ចូលរួម​សហការ​ចាត់វិធានកា​រ ចំពោះ​សកម្មភាព​ប្រមូលប្រាក់​សន្សំ​ខុសច្បាប់ ឬ ផ្តល់​កម្ចី ដោយ​ពុំមាន​ច្បាប់​អនុញ្ញាត​ត្រឹមត្រូវ​ផងដែរ​ដើម្បី​បាន​ទប់ស្កាត់​ទាន់ពេលវេលា​កុំ​ឲ្យ​ប្រជាជន​ក្នុង​មូលដ្ឋាន​ខ្លួន​រងគ្រោះ​និង​ជាប់បំណុល​វ័ណ្ឌក ពី​ការកេងប្រវ័ញ្ច​នានា​ពី​ក្រុម​ឈ្មួញ​ក្រៅ​ប្រព​ន្ធ័​៕​សរន