​ប្រែ​សម្រួល : កញ្ញា​ដា​លី​ស (​បាល់ទាត់​) ៖ ការប្រកួត​លី​ក​កំពូល​ធំៗ​ទាំង​៥​នៅ​អឺរ៉ុប​វិលត្រឡប់​មក​វិញ​នៅ​ចុង​សប្តាហ៍​នេះ​។ នៅ​អង់គ្លេស ក្រុម​មេឃ​ខៀវ Man City រំពឹង​ឈ្នះ​នៅ​ថ្ងៃ​សៅរ៍​នេះ​ដើម្បី​ពង្រីក​ការនាំ​មុខ​បន្ថែមទៀត ក្នុងពេល​ដែល​ក្រុម​បិសាច​ក្រហម Man U ក៏​រំពឹង​ឈ្នះ​នៅ​ក្បាល​ព្រលប់​នេះ​ផង​ដែរ​។​

​ចំណែក​នៅ​ឯ​លី​ក​កំពូល​អាល្លឺម៉ង់ Bayern ក៏​នៅតែ​រំពឹង​ឈ្នះ​លើ Bochum ដើម្បី​បន្ថែម​ការ​នាំមុខ​លើ​កំពូល​តារាង​។

​ទន្ទឹម​នេះ​នៅអេ​ស្ប៉ាញ ក្រុម​កំពូល​តា​រាងដូចជា Real Madrid, Betis, Barcelona ក៏​រំពឹង​ទទួល​បាន​បី​ពិន្ទុ​រៀងៗ​ខ្លួន​បន្ថែម​ទៀត​នៅ​ចុង​សប្តាហ៍​នេះដែរ​។

​ដោយឡែក​ក្រុម​រំពឹង​ឈ្នះ​ខ្ពស់បំផុត​នៅ​បារាំង​និង​អ៊ីតាលី​ចុង​សប្តាហ៍​នេះ​រួមមាន​ដូចជា Monaco, Clemont, Nantes, Lens, Lazio, Torino, AC Milan និង Verona​។​

​សម្រាប់​ការវិភាគ​លម្អិត យើង​នឹង​លើកយក​២​គូ​នៅ​អង់គ្លេស គឺ ៖

– [5] Manchester Utd vs Southampton [10]

​បិសាច​ក្រហម​មិន​ទាន់​បង្ហាញ​ទម្រង់​លេង​លេចធ្លោ​ណាមួយ​នៅឡើយ​ទេ បើទោះបីជា​បាន​នាំយក​គ្រូបង្វឹក​អស្ចារ្យ​ដូចជា​លោក រ៉ា​ហ្វ រេ​ង​នី​ក (Ralf Rangnick) ដែល​ទទួលបាន​ការគោរព​ខ្ពស់​ពី​លោក ជួ​ហ្គិន ក្លប់ និង​លោក ថូ​ម៉ាស ធូ​ខល់ ក៏ដោយ​។​

​យ៉ាងហោចណាស់ ការបញ្ចប់​នៅ​ចំណាត់ថ្នាក់​លេខ ៤ គឺជា​កត្តា​ចាំបាច់​បំផុត​សម្រាប់​ក្រុម​បិសាច​ក្រហម បើ​មិន​ដូច្នោះ​ទេ​នឹង​ត្រៀមខ្លួន​ជួប​ស្ថានភាព​ដូច​ចុះ​នរក​ជាមិនខាន​។ ជាពិសេស​ជាមួយ​វត្ត​មាន​ដូចជា គ្រីស្ទា​ណូ រ៉ូ​ណាល់​ដូ នៅក្នុង​ក្រុម​របស់​ពួកគេ គេ​មិន​អាច​នឹកស្មានថា​នឹងមាន​អ្វី​កើតឡើង​នៅ United នោះឡើយ ប្រសិន​បើ​ពួកគេ​បរាជ័យ​មិន​អាច​ទទួលបាន​កៅអី CL ។​

​ពួកគេ​មាន​ការប្រកួតប្រជែង​ដ៏​ស្វិតស្វាញ​នៅ​ចុង​សប្តាហ៍​នេះ ខណៈ​ដែល​ពួកគេ​ស្វាគមន៍ Southampton នៅ​ទឹកដី Old Trafford ។ ក្រុមព្រះ​ម៉ែ​ម៉ា​រី Southampton កំពុង​មាន​ស្មារតី​ខ្ពស់​បន្ទាប់ពី​បាន​ទទួល​ជ័យជម្នះ ២-៣ នៅ​ក្រៅ​ទឹកដី​កាលពី​ពាក់កណ្តាល​សប្តាហ៍​ទល់នឹង Tottenham ដែល​កំពុង​មាន​ទម្រង់​លេង​ល្អ​។​

​ការជួប​គ្នា​នៅ​ទឹកដី Old Trafford គឺ​ប្រាកដជា​ការប្រកួត​ដ៏​គួរឱ្យ​រំភើប​។ ក្រុម​ទាំង​ពីរ​កំពុង​ត្រូវការ​ពិន្ទុ​ជាបន្ទាន់ ហើយ​រំពឹង​មាន​ការវាយលុក​គ្នា​ទៅវិញទៅមក​មិន​សំចៃ​ជើង​នោះឡើយ​។

​ប្រវត្តិ​ជួបគ្នា​
– ជួប​គ្នា​ចុងក្រោយ​បំផុត​ស្មើគ្នា ១-១​។​
– មុននេះ ៤ ប្រកួត​ចុងក្រោយ ពួកគេ​ស៊ុត​ចូលគ្នា​លើសពី ៣ គ្រាប់​ឡើងទៅ​។​
– ៦​ប្រកួត​ក្នុងចំណោម​ជំនួប ៧ លើកចុងក្រោយ ក្រុម​ទាំង​ពីរ​តែង​ស៊ុត​បញ្ចូល​ទី​គ្នា​។​
– ៤ ប្រកួត​ចុងក្រោយ​នៅ​ទឹកដី Old Trafford មាន​គ្រាប់​បាល់​ស៊ុត​ចូល​លើសពី ៤ គ្រាប់​ឡើងទៅ​។

​ត្បិត​មិន​លេចធ្លោ ប៉ុន្តែ​ទម្រង់​លេង​របស់ Man U កំពុង​ឡើង​សន្សឹមៗ ចំណែក​ទម្រង់​លេង​របស់ Southampton ក៏​ស្រដៀង​នឹង​បិសាច​ក្រហម​ដែរ ប៉ុន្តែ​រាង​ទាប​ជាង​បន្តិច​។

​ផ្អែក​លើ​ប្រវត្តិ​និង​ទម្រង់​លេង​សព្វថ្ងៃ យើង​រំពឹង​បិសាច​ក្រហម​ឈ្នះ​យ៉ាងហោច​ក្នុង​លទ្ធផល ៣-១ ។

– [18] Norwich vs Manchester City [1]

​ដោយសារ​ជួបតែ​ការប្រកួត​អំណោយផល​ថ្មីៗ​នេះ Norwich អាច​បន្ថែម​ពិន្ទុ​ជាង ៤០% នៃ​ពិន្ទុសរុប​របស់​ពួកគេ​ពី​ការប្រកួត​បី​លើកចុងក្រោយ​។ ប៉ុន្តែ​នៅ​ប្រកួត​ខាងមុខនេះ ពួកគេ​នឹង​ត្រូវ​ជួប​ជាមួយ​ក្រុម Man City និង Liverpool ។​

​មុននេះ ពួកគេ​បាន​ប្រកួត​ស្មើ ១-១ ជាមួយ​ក្រុម Crystal Palace នៅក្នុង​ផ្ទះ​។ លទ្ធផល​មុននេះ​ប៉ុន្មាន​ប្រកួត​របស់​ចាប​លឿង គឺ​ឈ្នះ​រហូត​។​

​ដោយ​អាច​បន្ថែម​៧​ពិន្ទុ​ពី​ការប្រកួត​លី​ក​៥​លើក​ចុងក្រោយ​របស់​ពួកគេ ក្លិប​ចាប​លឿង​បច្ចុប្បន្ន​កំពុង​ឈរ​នៅ​លេខ​រៀង​ទី ១៨ ក្នុង​តារាង​លី​ក​កំពូល​របស់​អង់គ្លេស ដោយមាន​១​ពិន្ទុ​តាម​ពីក្រោយ​ក្រុម​លេខ ១៧ Newcastle United​។​

​ក្រុម​មេឃ​ខៀវ Manchester City កំពុង​បន្ត​ការលេង​ល្អឥតខ្ចោះ​របស់​ពួកគេ ហើយ​ពួកគេ​កំពុង​បំបាក់​គូប្រជែង​ទាំងអស់​នៅ Premier League ពី​មួយ​សប្តាហ៍​ទៅ​មួយ​សប្តាហ៍​ដូច​សព្វមួយដង​។ ក្លិប​មេឃ​ខៀវ​មានការ​នាំមុខ​ច្រើន​ពិន្ទុ​ល្មម​អាច​ការពារ ១៤ ប្រកួត​សេសសល់​ចុងក្រោយ​របស់​ពួកគេ ដើម្បី​លើក​ពាន​លី​ក​ជា​លើក​ទី ៤ ក្នុង​រយៈពេល ៥ ឆ្នាំ​។​

​ការប្រកួត​លី​ក​ថ្មីៗ​បំផុត​របស់​ពួកគេ​គឺ​នៅ​ក្នុងផ្ទះ​ទល់នឹង Brentford ដែល​ក្នុងនោះ​ពួកគេ​បាន​យកឈ្នះ​យ៉ាង​ងាយស្រួល​លើ​ក្រុម​នៅ​ទីក្រុង​ឡុង​ដ៍​នេះ​ក្នុង​លទ្ធផល ២-០ ។​

​ដោយ​មិន​ខ្វល់​ពី​ការធ្វើដំណើរ​របស់​ពួកគេ​ទៅ​កាន់​កីឡដ្ឋាន Saint Mary’s Stadium ទី​ដែល​ពួក​គេ​លេង​បាន​ត្រឹម​១​ពិន្ទុ ក្រុម​មេឃ​ខៀវ​បានឈ្នះ​រាល់​ការប្រកួត​លី​ក​ទាំង ១៤ លើក​ចុងក្រោយ​របស់​ពួកគេ​។​

​ដូច្នេះ​ដោយ​ដណ្តើមបាន ៤០ ពិន្ទុ​ពី ៤២ សរុប​ពិន្ទុ​ក្នុងចំណោម​ការប្រកួត​ទាំងអស់នោះ ឥឡូវនេះ​ក្លិប​មេឃ​ខៀវ​កំពុង​នាំមុខ Liverpool ចំនួន ៩ ពិន្ទុ​នៅលើ​កំពូល​តារាង​។ យ៉ាងណាមិញ ហង្ស​ក្រហម​នៅ​មាន​មួយ​ប្រកួត​ក្នុង​ដៃ​លើ​ក្រុម​របស់​លោក​ប៉េប ហ្គាឌី​អូ​ឡា​។​

​ប្រវត្តិ​ជួបគ្នា​
– ក្រុម​ចាប់​លឿង​ធ្លាប់​បំបាក់​មេឃ​ខៀវ​ម្តងគត់​ក្នុងជំនួប​៨​លើកចុងក្រោយ​។​
– ក្រុម​មេឃ​ខៀវ​រក្សា Clean Sheet ចំនួន ៤ លើកចុងក្រោយ​ទល់នឹង Norwich​។​
– ជួបគ្នា ៣ លើកចុងក្រោយ មាន​គ្រាប់​បាល់​ស៊ុត​ចូល​លើសពី ៥ គ្រាប់​ឡើងទៅ​។

​ផ្អែក​លើ​ទម្រង់​លេង​ដ៏​ល្អឥតខ្ចោះ​របស់ Man City យើង​រំពឹង​ពួកគេ​បន្ត​ឈ្នះ​ក្នុង​លទ្ធផល​ព្យាករណ៍ ៣-១៕

Man U រំពឹង​ឈ្នះ Southampton នៅ​ក្បាល​ព្រលប់​ថ្ងៃ​សៅរ៍​នេះ​ដើម្បី​ប្រជែង​កៅអី Top 4