​ដោយ​:​ដេប៉ូ​/​ភ្នំពេញ​: លោក សាយ សំ​អាល់ ប្រធាន​ក្រុម​ប្រឹក្សាជាតិ​អភិវឌ្ឍន៍​ដោយ​ចីរភាព និង​ជា​រដ្ឋមន្ត្រី​ក្រសួងបរិស្ថាន​នៅ​ថ្ងៃទី​១១ ខែកុម្ភៈ ឆ្នាំ​២០២២ នា​ទីស្ដីការ​ក្រសួងបរិស្ថាន​បានប្រកាស​ជា​ផ្លូវការ​និង​ប្រគល់​សៀវភៅ​យុទ្ធសាស្ត្រ​អភិវឌ្ឍន៍​រយៈពេល​វែង​ប្រកបដោយ​អព្យាក្រឹត​កាបូន​ដល់​ស្ថាប័ន​ពាក់ព័ន្ធ​។​

​បញ្ជាក់​ក្នុង​ពិធី​នេះ លោក​សាយ សំ​អាល់ បានបង្ហាញ​ការ​សាទរ​ចំពោះ​ក្រុមការងារ​ក្នុងការ​ផលិត​បាន​នូវ​សៀវភៅ “​យុទ្ធសាស្ត្រ​អភិវឌ្ឍន៍​រយៈពេល​វែង​ប្រកបដោយ​អព្យាក្រឹត​កាបូន – Cambodia’s Long Term Strategy for Carbon Neutrality (LTS4CN)” បាន​ទាន់ពេលវេលា ប្រកបដោយ​ជោគជ័យ​។

​លោក​រដ្ឋមន្ត្រី​បាន​ថ្លែង​ដែរ​ថា យុទ្ធសាស្ត្រ​ដែលមាន​ក្នុង​សៀវភៅ​នេះ បង្ហាញ​នូវ​ការប្ដេជ្ញាចិត្ត​ដ៏​មោះមុត​របស់​កម្ពុជា​ចំពោះ​ប្រជាជន​ខ្លួន និង​ចំពោះ​ពិភពលោក​ទាំងមូល​។ ផ្ដើមចេញពី​ការដឹកនាំ​ប្រទេស​ប្រកបដោយ​ភាព​ភាពឈ្លៀសវៃ និង​សុខសន្តិភាព ដែល​អាចឱ្យ​កម្ពុជា​ឈាន​មក​គិតគូរ​ពី​បរិស្ថាន និង​ដាក់ចេញ​នូវ​យុទ្ធសាស្ត្រ​អភិវឌ្ឍន៍​រយៈពេល​វែង​ប្រកបដោយ​អព្យាក្រឹត​កាបូន​នេះ​ឡើង​។

​គួរ​បញ្ជាក់ថា សៀវភៅ​នេះ បានដាក់​ចេញ​នូវ​វិស័យ​សំខាន់ៗ​ចំនួន​៦ រួមមាន (១)​កសិកម្ម (២)​ព្រៃឈើ និង​ការប្រើប្រាស់​ដី​ផ្សេងទៀត (៣)​ថាមពល (៤)​ការដឹកជញ្ជូន (៥)​ឧស្សាហកម្ម​និង​ការប្រើប្រាស់​ផលិតផល និង​(៦)​ការគ្រប់គ្រង​សំណល់ ដែល​ឈរលើ​មូលដ្ឋាន​វិទ្យាសាស្ត្រ និង​ភាពប្រាកដនិយម ដែល​កម្ពុជា​បាននិងកំពុង​ធ្វើ ដើម្បី​សម្រេច​ឱ្យបាន​នូវ​គោ​ដៅ​អព្យាក្រឹត​កាបូន ត្រឹម​៣០​ឆ្នាំ​ខាងមុខ​។ នេះ​គឺជា​លើក​ទី​១​ដែល​កម្ពុជា​បាន​បង្កើតបាន​នូវ​ឯកសារ​យុទ្ធសាស្ត្រ​រយៈពេល​វែង​ក្នុងការ​សម្រេច​នូវ​អព្យាក្រឹត​កាបូន នៅ​ឆ្នាំ​២០៥០ ដែល​នេះ​គឺ​ស្រប​នឹង​គោលដៅ​ប្រែក្លាយ​កម្ពុជា​ទៅជា​ប្រទេស​មាន​ប្រាក់ចំណូល​មធ្យម​កម្រិត​ខ្ពស់​នៅ​ឆ្នាំ​២០៣០ និង​ចំណូល​ខ្ពស់​នៅ​ឆ្នាំ​២០៥០ និង​ផែនការ​បរិស្ថាន​ជាតិ​ផ្សេងទៀត​៕​