​ដោយ​: ភ្នំ​ស្វាយ​/​បន្ទាយ​មាន​ជ័​យៈ ក្រសួង​សាធារណការ និង​ដឹកជញ្ជូន ធនាគារអភិវឌ្ឍន៍អាស៊ី (ADB) និង​រដ្ឋបាលខេត្ត​បន្ទាយមានជ័យ កាលពី​ថ្ងៃទី​១១ ខែកុម្ភៈ ឆ្នាំ ២០២២ បានធ្វើ​ពិធី​សែន​ក្រុង​ពលី​បើក​ការដ្ឋាន​សាងសង់ ប្រព័ន្ធ​លូ និង​ស្ថានីយ​ប្រព្រឹត្ត​កម្ម​ទឹក​កខ្វក់ ក្នុង​ក្រុង​សិរីសោភ័ណ ក្រោម​កម្ចី​ឥណទាន​របស់​ធនាគារ​អភិវឌ្ឍន៍អាស៊ី (ADB ) ដែលមាន​ទឹកប្រាក់​ប្រមាណ​២២​លាន​ដុល្លារ​អាមេរិក ។​

​លោក សុក ចាន់ថា ប្រធាន​មន្ទីរ​សាធារណការ​:​ការ និង​ដឹកជញ្ជូន​ខេត្តបន្ទាយមានជ័យ បានអោយ​ដឹក​ថា​: ក្រោម​កម្ចី​ឥណទាន​របស់ ADB រួមជាមួយ​នឹង​ថវិការ​បដិភាគ​របស់​រាជរដ្ឋាភិបាល​កម្ពុជា​ផង គម្រោង​ប្រព័ន្ធ​បង្ហូរទឹក​កខ្វក់ និង​ប្រព័ន្ធ​បង្ហូរ​ទឹកភ្លៀង ស្ថានីយ​ប្រព្រឹត្ត​កម្ម​ទឹក​កខ្វក់​ទទួល​ការសាងសង់​ដោយ​ក្រុមហ៊ុន BUCG និង​ត្រួតពិនិត្យ​បច្ចេកទេស​ដោយ​ក្រុមហ៊ុន Ramboll Denmark. A/W In jointventure With oriental Consultant&Secln Association With Tancons ដែល​ចំណាយ​អស់​ទឹកប្រាក់ ២២.៤៨៦.១៧៩ ដុល្លារ​អាមេរិក​។​

​ការសាងសង់​ប្រពន្ធ​លូ និង​ស្ថានីយ​ប្រព្រឹត្ត​កម្ម​ទឹក​កខ្វក់ ក្នុង​ក្រុង​សិរីសោភ័ណ មាន​រយៈពេល​គ្រោង​សាងសង់ ៣ ឆ្នាំ គឺ​ចាប់ពី​ខែកញ្ញា ឆ្នាំ​២០២១ ដល់​ខែសីហា ឆ្នាំ​២០២៤​។​
​អ្នកទទួល​ការសាងសង់​ត្រូវ​ផ្ដល់​ការបណ្ដុះបណ្ដាល​ដល់​បុគ្គលិក​និ​យោ​ជិ​ក​ធ្វើ​ប្រតិបត្តិការ និង​ថែទាំ​ការងារ​នេះ​រយៈពេល ៦ ខែ​ចាប់​ពីថ្ងៃ​បញ្ចប់​ការសាងសង់ ។​

​លោក​វង្ស ពិសិដ្ឋ អនុរដ្ឋលេខាធិការ​ក្រសួង​សាធារណការ និង​ដឹកជញ្ជូន​បាន​មានប្រសាសន៍ថា​: ស្ថានីយ​ប្រព្រឹត្ត​កម្ម​ទឹក​កខ្វក់​មាន​សមត្ថភាព​អាច​ចម្រោះ​បាន​ចំនួន​៣.៥០០​ម៉ែត្រ​ក្នុង​មួយថ្ងៃ ហើយ​សាងសង់​លើ​ផ្ទៃដី​ប្រមាណ ៤​ហិកតា​។​

​លោក​បាន​បន្ត​ឲ្យ​ដឹង​ទៀតថា ការសាងសង់​ប្រព័ន្ធ​លូ​និង​ស្ថានីយ​ប្រព្រឹត្ត​កម្ម​ទឹក​កខ្វក់​សម្រាប់​តំបន់​សេវាកម្ម​ភាគ​ពាយ័ព្យ នៃ​ស្ទឹង​សិរីសោភ័ណ​ដែលមាន​បំពង់​បង្ហូរ​ប្រវែង​១១០​គីឡូម៉ែត្រ និង​ស្ថានីយ​បូម​មេ​មួយកន្លែង​និង​ស្ថានីយ​បូម​តូច​ចំនួន ៣ កន្លែង ។​
​ព្រមទាំង​ការតភ្ជាប់​បណ្ដាញ​តាម​ផ្ទះ​ជា​ពាណិជ្ជកម្ម អាគារ​ស្ថាប័ន​ផ្សេងៗ​ចំនួន​៣.៧៧៩ កន្លែង ។​

​គម្រោង​នេះ​នឹងធ្វើ​ការសាងសង់​ផ្លូវ​ចូលទៅ​កាន់​ស្ថានីយ​ប្រព្រឹត្ត​កម្ម​ដែលមាន​ប្រវែង​២.៥០០ ម៉ែត្រ​និង​បណ្ដាញ​លូបង្ហូរទឹក​ភ្លៀង​ប្រវែង​៦.៨៨៥​ម៉ែត្រ ៕​