​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប្រធាន​អង្គការ​សុខភាព​ពិភពលោក (WHO)​បាន​និយាយ​កាលពី​ថ្ងៃ​សុក្រ ទី ១១ ខែ​កុម្ភៈ​ថា ដំណាក់កាល​ស្រួចស្រាល់​នៃ​ជំងឺ​រាតត្បាត​អាច​នឹង​បញ្ចប់​នៅ​ឆ្នាំនេះ ប្រសិនបើ​មនុស្ស​ប្រហែល ៧០ ភាគរយ​នៅលើ​ពិភពលោក​បាន​ចាក់​វ៉ាក់សាំង​។​

​លោក តេ​ត្រូស អា​ដា​ណុ​ម ហ្គេ​ប្រេ​យ៉េ​ស៊ូស បាន​ប្រាប់​អ្នកយកព័ត៌មាន​នៅ​ប្រទេស​អាហ្វ្រិក​ខាងត្បូង​ថា “​ការរំពឹងទុក​របស់​យើង​គឺ​ថា​ដំណាក់កាល​ស្រួចស្រាល់​នៃ​ជំងឺ​រាតត្បាត​នេះ​នឹង​បញ្ចប់​នៅ​ឆ្នាំនេះ ពិត​ណាស់​ជាមួយ​នឹង​លក្ខខណ្ឌ​មួយ គឺ​ការចាក់​វ៉ាក់សាំង ៧០ ភាគរយ (​គោលដៅ​ត្រូវ​សម្រេចបាន​) នៅ​ពាក់កណ្តាល​ឆ្នាំនេះ ប្រហែល​ខែមិថុនា ខែកក្កដា​”​។​

“​ប្រសិន​បើ​រឿង​នេះ​សម្រេចបាន នោះ​ដំណាក់កាល​ស្រួចស្រាល់​ពិតជា​អាច​បញ្ចប់​បាន ហើយ​នោះ​ជា​អ្វី​ដែល​យើង​កំពុង​រំពឹងទុក​។ វា​ស្ថិត​នៅក្នុង​ដៃ​របស់​យើង​ហើយ​។ វា​មិនមែន​ជា​បញ្ហា​នៃ​ឱកាស​នោះទេ​។ វា​ជា​បញ្ហា​នៃ​ជម្រើស​”​។​

​លោក​បាន​និយាយ​ក្នុងអំឡុងពេល​ដំណើរ​ទស្សនកិច្ច​ទៅកាន់​ក្រុមហ៊ុន Afrigen Biologics and Vaccines ដែល​ផលិត​វ៉ាក់សាំង​កូវី​ដ​១៩ mRNA ដំបូងបង្អស់​នៅ​ទ្វីបអាហ្វ្រិក​ដោយ​ប្រើ​សេ​ខ្វិន (Sequence) របស់​ក្រុមហ៊ុន Moderna ។​

​ប្រធាន WHO បាន​និយាយថា “​យើង​រំពឹង​វ៉ាក់សាំង​នេះ​នឹង​កាន់តែ​សមស្រប​ទៅ​នឹង​បរិបទ ដែល​វា​ត្រូវ​បាន​ប្រើប្រាស់ ព្រោះ​ពុំ​សូវ​មាន​បញ្ហា​ក្នុងការ​ស្តុក​ទុក​និង​មានតម្លៃ​ទាប​”​។​

​វ៉ាក់សាំង​នេះ​នឹង​ត្រៀម​រួចរាល់​សម្រាប់​ការសាកល្បង​ព្យាបាល​នៅ​ខែ​វិច្ឆិកា ជាមួយ​ការអនុម័ត​ឱ្យ​ប្រើប្រាស់​រំពឹង​ធ្វើឡើង​នៅ​ឆ្នាំ ២០២៤​។​

​ក្រុមហ៊ុន Afrigen កំពុង​ដឹកនាំ​គម្រោង​សាកល្បង​វ៉ាក់សាំង ដែល​គាំទ្រ​ដោយ WHO និង​គំនិត​ផ្តួចផ្តើម Covax ។​

​ជនជាតិ​អាហ្វ្រិក​តែ ១១ ភាគរយ​ប៉ុណ្ណោះ​បាន​ចាក់​វ៉ាក់សាំង ដែល​ជា​អត្រា​ទាប​បំផុត​នៅក្នុង​ពិភពលោក​។​

​កាលពី​សប្តាហ៍​មុន ការិយាល័យ WHO ប្រចាំ​ទ្វីបអាហ្វ្រិក​បាន​និយាយថា ទ្វីប​នេះ​ត្រូវតែ​បង្កើន​អត្រា​នៃ​ការចាក់​វ៉ាក់សាំង​របស់ខ្លួន “​ប្រាំ​មួយដង​” ដើម្បី​ឈានដល់​គោលដៅ ៧០ ភាគរយ​៕

​ជនជាតិ​អាហ្វ្រិក​តែ ១១ ភាគរយ​ប៉ុណ្ណោះ​បាន​ចាក់​វ៉ាក់សាំង ដែល​ជា​អត្រា​ទាប​បំផុត​នៅក្នុង​ពិភពលោក​