ប្រែ​សម្រួល :  (​ស្ត្រេត​ថែមស៍​) ៖ ប្រភពពីរ​នៅក្នុង​ក្រុម​របស់​លោក​ម៉ា​ក្រុង​បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័​រថា ប្រធានាធិបតី​បារាំង​លោក អេម​ម៉ានុយ​អែល ម៉ា​ក្រុង​បាន​បដិសេធ​​សំណើ​របស់​វិមាន​ក្រឹម​ឡាំង​ឱ្យ​លោក​ធ្វើតេស្តិ៍​រក​កូវី​ដ​១៩​នៅ​ប្រទេស​រុស្ស៊ី នៅ​ពេល​លោក​បាន​មកដល់​ដើម្បី​ជួប​ប្រធានាធិបតីវ្ល៉ា​ឌី​មៀរ ពូ​ទីន​ក្នុង​សប្តាហ៍​នេះ​ដើម្បី​កុំឱ្យ​រុស្ស៊ី​ទទួលបាន DNA​របស់លោក​​ម៉ា​ក្រុង​។​

​ជា​លទ្ធផល ប្រមុខរដ្ឋ​បារាំង​ដែល​បំពេញ​ទស្សនកិច្ច​រូបនេះ​ត្រូវបាន​ដាក់​ឱ្យ​អង្គុយ​ឆ្ងាយ​ពី​មេដឹកនាំ​រុស្ស៊ី ក្នុងអំឡុងពេល​កិច្ចពិភាក្សា​ដ៏​យូរ​ស្តី​ពី​វិបត្តិ​អ៊ុយ​ក្រែន​នៅ​ទីក្រុង​មូ​ស្គូ​។​

​ក្រុម​អ្នកសង្កេតការណ៍​មាន​ការភ្ញាក់ផ្អើល​យ៉ាងខ្លាំង​ចំពោះ​រូបភាព​របស់​មេដឹកនាំ​ទាំង​ពីរ​អង្គុយ​ទល់មុខ​គ្នា​នៅ​តុ​ប្រវែង ៤ ម៉ែត្រ​កាលពី​ថ្ងៃ​ចន្ទ​ក្នុងអំឡុងពេល​កិច្ច​ពិភាក្សា​របស់​ពួកគេ​ដោយ​មាន​អ្នក​​ការទូត​ខ្លះ​និង​អ្នក​ផ្សេង​ទៀត​លើកឡើងថា លោកពូ​ទីន​ប្រហែល​ជា​ចង់​ផ្ញើ​សារ​ការទូត​អ្វី​មួយ​ហើយ​។​

​ប៉ុន្តែ​ប្រភព​ពីរ​ដែល​ដឹង​អំពី​ពិធីសារ​សុខភាព​របស់​លោក​ម៉ា​ក្រុង​បាន​ប្រាប់​រ៉​យ​ទ័​រថា គាត់​ត្រូវបាន​ផ្តល់​ជម្រើស​មួយ គឺ ទទួល​យក​ការធ្វើ​តេស្តិ៍ PCR ដែល​ធ្វើឡើង​ដោយ​អាជ្ញាធរ​រុស្ស៊ី​ហើយ​ត្រូវបាន​អនុញ្ញាត​ឱ្យ​ចូល​ទៅ​ជិត​លោកពូ​ទីន ឬ បដិសេធ​ការធ្វើតេ​ស្តិ៍​ហើយ​ត្រូវ​គោរព​តាម​ការរ​ក្សា​គម្លាត​សង្គម​ដ៏​តឹងរ៉ឹង​។​

​ប្រភព​មួយ​បាន​ប្រាប់​រ៉​យ​ទ័​រថា “​យើង​ដឹង​យ៉ាងច្បាស់​ថា​នោះ​គឺ​មានន័យថា​គ្មាន​ការ​ចាប់ដៃ​និង​ត្រូវ​អង្គុយ​នៅ​តុ​ដ៏​វែង​នោះ​។ ប៉ុន្តែ​យើង​មិន​អាច​ទទួលយក​បាន​ទេ​ដែល​ពួកគេ​ទទួលបាន DNA របស់​ប្រធានាធិបតី​” ដោយ​សំដៅ​ទៅលើ​ការព្រួយបារម្ភ​អំពី​សន្តិសុខ​ឯកជន ប្រសិន​បើ​មេដឹកនាំ​បារាំង​ត្រូវបាន​ធ្វើតេស្តិ៍​ដោយ​វេជ្ជបណ្ឌិត​រុស្ស៊ី​។

​វិមាន​ក្រឹម​ឡាំង​បានបញ្ជាក់​កាលពី​ថ្ងៃ​សុក្រ​ទី​១១ កុម្ភៈ​ថា លោក​ម៉ា​ក្រុង​ត្រូវ​បាន​ដាក់​ឱ្យ​នៅ​រក្សា​គម្លាត​ឆ្ងាយ​ពី​លោកពូ​ទីន​។​

​អ្នកនាំពាក្យ​របស់​វិមាន​ក្រឹម​ឡាំង លោក ឌី​មី​ទ្រី ប៉េ​ស្កូវ (Dmitry Peskov)​បាន​និយាយថា​គេ​អាច​យល់​បាន​ពី​ជំហរ​របស់​បារាំង​ហើយ​នោះ​បាន​នាំឱ្យ​មាន​តម្រូវការ​ក្នុង​ការការពារ​លោកពូ​ទីន​​នៅក្នុង​កិច្ចប្រជុំ ដែល​មេដឹកនាំ​ទាំង​ពីរ​ត្រូវតែ​អង្គុយ​ទល់មុខ​គ្នា​នៅ​ចុង​តុ​អ៊ីចឹង​ហើយ​៕

លោកពូ​ទីន​និង​លោក​ម៉ា​ក្រុង​អង្គុយ​នៅ​ចុង​តុ​ប្រវែង​៤​ម៉ែត្រ​ព្រោះ​បារម្ភ​ឆ្លងកូវី​ដ