​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ជនជាតិ​អង់គ្លេស​ត្រូវបាន​ប្រាប់​ឱ្យ​ចាកចេញ​ពី​ប្រទេស​អ៊ុយ​ក្រែន​ជាបន្ទាន់ ដោយសារ​មាន​ការព្រួយបារម្ភ​កាន់តែ​ខ្លាំង​ឡើង​ថា​រុស្ស៊ី​អាច​បើក​ការ​ឈ្លាន​​ពាន​នៅ​ប៉ុន្មាន​ថ្ងៃ​ខាងមុខនេះ​។​

​ការិយាល័យ​ការបរទេស​បាន​ធ្វើ​បច្ចុប្បន្នភាព​ដំបូន្មាន​របស់ខ្លួន​កាលពី​ល្ងាច​ថ្ងៃ​សុក្រ​ទី​១១​កុម្ភៈ​ដើម្បី​ជំរុញ​ឱ្យ​ជនជាតិ​អង់គ្លេស “​ចាកចេញ​ឥឡូវនេះ​ខណៈ​មធ្យោបាយ​ពាណិជ្ជកម្ម​នៅ​អាច​រកបាន​”​។​

​ទីភ្នាក់ងារ​សារព័ត៌មាន AP បាន​និយាយថា បទបញ្ជា​នេះ​ត្រូវបាន​ចេញ​ខណៈ​ព័ត៌មាន​ស៊ើបការណ៍​សម្ងាត់ និង​ដំបូន្មាន​ពី​អ្នកជំនាញ​នៅនឹងកន្លែង​ផ្ទាល់​បាន​លើកឡើង​អំពី​កម្រិត​គំរាមកំហែង​កាន់​​តែ​ខ្ពស់​ឡើង ជាមួយ​ការ​លុកលុយ​នៅពេល​ណា​មួយ​ឆាប់ៗ​នេះ​ត្រូវបាន​ចាត់ទុក​ថា​ទំនងជា​អាច​កើតឡើង​បំផុត​។​

​រឿង​នេះ​បាន​កើតឡើង​បន្ទាប់ពី​លោក បូរី​ស ច​ន​សុន សម្តែង​ការព្រួយបារម្ភ​ចំពោះ​សន្តិសុខ​របស់​អឺរ៉ុប​ក្នុងអំឡុងពេល​ហៅ​ទូរស័ព្ទ​ជាមួយ​មេដឹកនាំ​លោកខាងលិច​រួមទាំង​ប្រធានាធិបតី​អាម៉េរិក​លោក ចូ បៃ​ដិន​។​

​រដ្ឋមន្ត្រី​ការពារជាតិ​អង់គ្លេស​លោក បិ​ន វ៉ាល់​ឡេស (Ben Wallace)​បាន​និយាយថា ការ​លុកលុយ​អាច​កើតឡើង “​គ្រប់ពេល​” ដោយហេតុ​ថា​ប្រធានាធិបតី​រុស្ស៊ី លោក​វ្ល៉ា​ឌី​មៀរ ពូ​ទីន​បាន​ប្រមូល​កង​​ទ័ព​ប្រមាណ ១៣ ម៉ឺន​នាក់​នៅ​តាម​ព្រំដែន​ជាមួយ​អ៊ុយ​ក្រែន​រួចជាស្រេច​។​

​ទីប្រឹក្សា​សន្តិសុខ​ជាតិ​របស់​លោកបៃ​ដិន​គឺ​លោក ជែក ស៊ូ​ល​លី​វ៉ាន់ (Jake Sullivan) បាន​និយាយថា ការវាយប្រហារ​នៅមុន​ការបញ្ចប់​ព្រឹត្តិការណ៍​កីឡា​អូឡាំពិក​រដូវរងា​នៅ​ថ្ងៃទី ២០ ខែ​កុម្ភៈ​គឺ “​រំពឹង​អាច​កើតឡើង​បំផុត​”​។​

​លោក​បាន​និយាយថា កងកម្លាំង​រុស្សី​ថ្មី​បាន​មកដល់​ព្រំដែន ហើយ​ស្ថិត​ក្នុង​ទីតាំង​ដើម្បី “​ធ្វើ​ប្រតិបត្តិការ​យោធា​ដ៏​សំខាន់​ក្នុង​ប្រទេស​អ៊ុយ​ក្រែន​នា​ពេល​ឥឡូវនេះ​” ដែល​អាច​រួមបញ្ចូល​”​ការវាយលុក​​យ៉ាង​រហ័ស​លើ​ទីក្រុង​គៀវ​” ឬ​នៅ​លើ​ផ្នែក​ផ្សេង​ទៀត​នៃ​ប្រទេស​។​

​ថ្លែង​ពី​សេត​វិមាន លោក​ស៊ូ​ល​លី​វ៉ាន់​បាន​និយាយថា រុស្ស៊ី​អាច​ជ្រើសរើស “​យក​បទបញ្ជា​ក្នុងពេល​ដ៏​ខ្លី​បំផុត​ដើម្បី​ចាប់ផ្តើម​សកម្មភាព​យោធា​ដ៏​ធំ​ប្រឆាំងនឹង​អ៊ុ​យក្រែន​” ប៉ុន្តែ​បាន​សង្កត់ធ្ងន់ថា សហរដ្ឋ​អាម៉េរិក​មិនដឹងថា​តើ​លោកពូ​ទីន​បាន​ធ្វើ​ការសម្រេចចិត្ត​ចុងក្រោយ​ហើយ​ឬ​យ៉ាងណា​នោះ​ទេ​។​

​លោក​ស៊ូ​ល​លី​វ៉ាន់​បាន​និយាយថា “​ការគំរាមកំហែង​ឥឡូវនេះ​គឺ​គ្រប់គ្រាន់​ល្មម​” ដើម្បី​ជំរុញ​ឱ្យ​ជនជាតិ​អាម៉េរិក​ចាកចេញ​ពី​អ៊ុ​យក្រែន​”​ឱ្យបាន​ឆាប់​តាម​ដែល​អាច​ធ្វើទៅបាន​និង​នៅក្នុង​ព្រឹត្តិការណ៍​​ណាមួយ​ក្នុង​រយៈពេល ២៤ ទៅ ៤៨ ម៉ោង​បន្ទាប់​”៕

ទាហាន​អ៊ុយ​ក្រែន​កំពុង​ពិនិត្យ​អាវុធរ​បស់​ខ្លួន​អំឡុងពេល​ធ្វើ​សមយុទ្ធ