ដោយៈ ភ្នំ​សន្ទុក / កំពង់ធំ ៖ លោក ងួន រតនៈ​អភិបាលខេត្ត​កំពង់ធំ បាន​ថ្លែងថាៈ លោក​មេឃុំ និង​មន្ត្រី​ជំនាញ គ្រប់រូប ត្រូវអនុវត្ត​ច្បាប់ អោយបាន​ម៉ត់ចត់ ម៉ឺង​មាត់ មាន​តម្លាភាព សុ​ក្រិត បញ្ហា​សំណង់​សាងសង់​ខុសច្បាប់ នៅក្នុង​ស្រុក​ស្ទោង ខេត្តកំពង់ធំ ជា​ហូរហែរ ជៀសវាង​មាន​បញ្ហា ប៉ះពាល់​ផលប្រយោជន៍ របស់​ប្រជាពលរដ្ឋ ថ្ងៃក្រោយ​។​

​លោក ងួន រតនៈ បាន​ថ្លែង​បែបនេះ នៅពេល​លោក​បាន​ចូលរួម ក្នុង​ពិធី ប្រកាស​តែងតាំង លោក ថូ គឹម​ស៊ន ជា​អភិបាលរង ស្រុក​ស្ទោង​ថ្មី នា​រសៀល ថ្ងៃទី​១១ ខែកុម្ភៈ ឆ្នាំ​២០២២​។

​លោក អភិបាលខេត្ត​កំពង់ធំ បាន​មានប្រសាសន៍ថាៈ ជា​ទិសដៅ​ចម្បង មន្ត្រី​ជំនាញ​គ្រប់រូប ត្រូវ​យកចិត្តទុកដាក់ ទៅលើ​ថ្នាក់ដឹកនាំ ចាំ​បញ្ជា ក្រុមប្រឹក្សា ស្រុក និង​គណៈ​អភិបាល​នេះ ហើយ​រដ្ឋបាល​ថ្នាក់ក្រោម​ជាតិ ត្រូវ​ផ្ដួចផ្តើម គំនិត​ឆ្លង​យោបល់ អនុវត្ត​ទាក់ទង​នឹង​ការបំផ្លាញ ធនធានធម្មជាតិ នៅក្នុង​តំបន់​បី ការពារ​ទាំងអស់គ្នា​។​

​លោក ថូ គឹម​ស៊ន អភិបាលរង​ស្រុក​ស្ទោង​ថ្មី បានអោយដឹងថាៈ សក្តានុពល ជាច្រើន ដែល​យើង​មិន​ប្រើប្រាស់ ឱ្យ​អស់ពី​លទ្ធភាព និង​ទាញយក​ផល ប្រយោជន៍ បាន​នៅឡើយ ដូចជា វិស័យ​កសិកម្ម វិស័យ​ទេសចរណ៍ ជាដើម ។ ជាមួយគ្នានេះ អាជ្ញាធរខេត្ត និង​មន្ត្រី ជំនាញ ព្រមទាំង​គ្រប់ភាគី​ពាក់ព័ន្ធ សហការគ្នា រួមគ្នា ធ្វើយ៉ាងណា អភិវឌ្ឍន៍​ខេត្ត និង​សេដ្ឋកិច្ច​របស់ ប្រជាពលរដ្ឋ ឱ្យមាន​ការរីកចម្រើន ដើម្បី​សម្រេច​ឱ្យបាន​ផែនការ​ទាំង អស់នេះ ។

​លោក ថូ គឹម​ស៊ន អភិបាលរង​ស្រុក​ស្ទោង​ថ្មី បាន​បន្ថែមថាៈ លោក​នឹង​ខិតខំ បង្កលក្ខណៈ ងាយស្រួល ក្នុងការ​គៀងគរ រក​ដៃគូ​វិនិយោគ ជា​យុទ្ធសាស្ត្រ រយៈពេល​វែង ជាមួយ សក្តានុពល​របស់​ខេត្ត សម្រាប់​ពេលអនាគត ជាពិសេស​ធ្វើការ​វិនិយោគ លើ​តំបន់ ទេសចរណ៍ វប្បធម៌ និង​ធម្មជាតិ ជាច្រើន​របស់​ខេត្ត​៕/V​-PC