ដោយៈមុនីរ័ត្ន/ភ្នំពេញ: គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប.​) បាន​បើក​កិច្ចប្រជុំ​តាម​ប្រព័ន្ធ​វីដេអូ អន​ឡាញ​ជាមួយ​ភាគី​ពាក់ព័ន្ធ​នឹង​ការបោះឆ្នោត ដើម្បី​ផ្សព្វផ្សាយ​ការផ្តល់​សុពលភាព និង​ប្រកាស​ផ្សាយ​បញ្ជី​បោះឆ្នោត​ផ្លូវការ​ឆ្នាំ​២០២១ នៅ​ព្រឹក​ថ្ងៃ​សៅរ៍ ទី​១២ ខែកុម្ភៈ ឆ្នាំ​២០២២ ក្រោម​អធិបតីភាពលោក ឯម សូផាត សមាជិក គ​.​ជ​.​ប. និង​ជា​ប្រធាន​ដឹកនាំ​កិច្ចប្រជុំ​។​

រូបថតៈលោក ឯម សូផាត សមាជិក គ​.​ជ​.​ប.

​លោក ឯម សូផាត បាន​មានប្រសាសន៍ថា បញ្ជី​បោះឆ្នោត​ផ្លូវការ​ឆ្នាំ​២០២១ ត្រូវបាន​ផ្តល់ សុពលភាព និង​ប្រកាស​ផ្សាយ​ជូន​ប្រជាពលរដ្ឋ​ជា​សាធារណៈ​នៅ​ថ្ងៃទី​១២ ខែកុម្ភៈ ឆ្នាំ​២០២២​។ ឯកឧត្តម​បាន​បន្តថា បញ្ជី​បោះឆ្នោត​ផ្លូវការ​នេះ​ត្រូវបាន​ផលិត និង ​បញ្ជូនទៅឱ្យ​គណៈកម្មការ​រៀបចំ​ការ​បោះឆ្នោត​គ្រប់លំដាប់​ថ្នាក់ និង​សាលាឃុំ សង្កាត់ សម្រាប់​រក្សាទុក និង ​ប្រើប្រាស់​ជា​ផ្លូវការ​នៅ​៖
– លេខាធិការដ្ឋាន​រាជធានី ខេត្ត​រៀបចំ​ការបោះឆ្នោត (​ជា PDF File) ចំនួន ១ ច្បាប់​
– គណៈកម្មការ​ឃុំ សង្កាត់​រៀបចំ​ការបោះឆ្នោត ចំនួន ១ ច្បាប់​
– គណៈកម្មការ​ការិយាល័យ​បោះឆ្នោត ចំនួន ២ ច្បាប់​
– សាលាឃុំ សង្កាត់ ចំនួន ១ ច្បាប់​
– ជាមួយគ្នានេះ​បញ្ជី​បោះឆ្នោត​ផ្លូវការ ឆ្នាំ​២០២១ ក៏បាន​បង្ហោះ និង​រក្សាទុក នៅក្នុង​គេហទំព័រ គ​.​ជ​.​ប voterlist.nec.gov.kh (http://www.voterlist.nec.gov.kh/) និង​កម្មវិធី​លើ​ទូរស័ព្ទដៃ (App) NEC KH​ផងដែរ​។​

​តាម​តួលេខ ដែលមាន​ក្នុង​បញ្ជី​បោះឆ្នោត​ផ្លូវការ ឆ្នាំ​២០២១ គឺ​៖
– អ្នកមាន​ឈ្មោះ​ក្នុង​បញ្ជី​បោះឆ្នោតសរុប​មាន​ចំនួន ៩.២០៥.៦៨១ (​ប្រាំបួន​លាន​ពីរ​រយ​ប្រាំ​ពាន់​ប្រាំមួយរយ​ប៉ែតសិប​មួយ​នាក់​) ស្មើនឹង ៨៧,៩៤ភាគរយ នៃ​ចំនួន​ប្រជាពលរដ្ឋ​អាយុ​១៨​ឆ្នាំ​ឡើង ក្នុងនោះ​មាន​ស្ត្រី​ចំនួន ៤.៩០៤.៨៣២ (​បួន​លាន​ប្រាំបួន​រយ​បួន​ពាន់​ប្រាំបី​រយ​សាមសិប​ពីរ​នាក់​)
– ចំនួន​ការិយាល័យ​បោះឆ្នោត​សរុប​មាន​ចំនួន ២៣.៦០២ ការិយាល័យ ចំណុះឱ្យ​ឃុំ សង្កាត់ ចំនួន ១.៦៥២ ការិយាល័យ នៃ​រាជធានី ខេត្ត ទាំង ២៥​។​

​ភាគី​ពាក់ព័ន្ធ​ដែល​ចូលរួម​ក្នុង​កិច្ចប្រជុំ បាន​ថ្លែងអំណរគុណ និង​កោតសរសើរ​ដល់ គ​.​ជ​.​ប. ដែល​បាន​បំពេញភារកិច្ច​បាន​យ៉ាង​ល្អ​ក្នុង​ការរៀបចំ​ការចុះឈ្មោះ​បោះឆ្នោត​ឆ្នាំ​២០២១ កន្លងមក និង​សរសើរ​ដល់​កម្មវិធី​ប​ច្ចេក​វិទ្យា​ព័ត៌មាន​ថ្មី​ដែល គ​.​ជ​.​ប បានដាក់​ឱ្យប្រើ​ប្រាស់ ដោយបាន​បង្កលក្ខណៈ​ងាយស្រួល​ដល់​គណបក្សនយោបាយ​។​

​ឆ្លើយតប​ទៅនឹង​សំណួរ​របស់​ភាគី​ពាក់ព័ន្ធ​ដែល​បាន​ចូលរួម​ក្នុង​កិច្ចប្រជុំ​នោះ ចំពោះ​គណបក្សនយោបាយ​ដែល​ចង់បាន​បញ្ជី​បោះឆ្នោត​ផ្លូវការ​ឆ្នាំ​២០២១ គណបក្សនយោបាយ​អាច​ជាវ​ដោយ​បង់​ត្រឹម​តម្លៃ​ផលិត​ប៉ុណ្ណោះ​។ រីឯ​ចំនួន​ជនពិការ​ភាព​ដែលមាន​ក្នុង​បញ្ជី​បោះឆ្នោត​ផ្លូវការ​ឆ្នាំ​២០២១ មាន​ចំនួន ២៣.៥៩១ (​ម្ភៃ​បី​ពាន់​ប្រាំ​រយ​កៅសិប​មួយ​នាក់​)​។​

​កិច្ចប្រជុំ​ផ្សព្វផ្សាយ​តាម​ប្រព័ន្ធ​វីដេអូ​អន​ឡាញ បាន​ប្រព្រឹត្ត​ទៅតាម​កម្មវិធី​ដែល​បាន​គ្រោងទុក និង​មាន​អ្នកចូលរួម​ប្រមាណ ៥៦​នាក់ ដែល​មកពី​តំណាង​ក្រុមប្រឹក្សាធម្មនុញ្ញ ព្រឹទ្ធសភា រដ្ឋសភា ក្រសួងមហាផ្ទៃ ក្រសួង​ព័ត៌មាន អគ្គស្នងការដ្ឋាន​នគ​របាល​ជាតិ តំណាង​គណបក្សនយោបាយ​ចំនួន ១៦ តំណាង​អង្គការ​មិនមែន​រដ្ឋាភិបាល​ចំនួន ១២ អង្គការ តំណាង​ស្ថានទូត​ជប៉ុនភ្នាក់ងារចៃកា( JICA) ក្រុមប្រឹក្សា​សកម្មភាព​ជនពិការព្រមទាំង​មាន​អ្នកសារព័ត៌មាន​ជាច្រើន​ចូលរួម​ផងដែរ​។

​គណៈកម្មាធិការ​ជាតិ​រៀបចំ​ការបោះឆ្នោត (​គជប​) នៅ​ថ្ងៃទី​១២ ខែកុម្ភៈ ឆ្នាំ​២០២២ នេះ បានចេញ​សេចក្ដីសម្រេច​ស្ដីពី​ការផ្ដល់​សុពលភាព និង​ដាក់ឱ្យ​ប្រើប្រាស់​បញ្ជី​បោះឆ្នោត​ផ្លូវការ ឆ្នាំ​២០២១ ដែលមាន​អ្នកបោះឆ្នោត​សរុប​ចំនួន ៩.២០៥.៦៨១​នាក់ ស្មើនឹង ៨៧,៩៤​ភាគរយ ក្នុងនោះ​ស្រី​ចំនួន ៤.៩០៤.៨៣២​នាក់ និង​ការិយាល័យ​សរុប​ចំនួន ២៣.៦០២ ការិយាល័យ​។ នេះ​បើ​យោងតាម​សេចក្តីសម្រេច​របស់ គ​.​ជ​.​ប. ចុះ​ថ្ងៃទី​១២ ខែកុម្ភៈ ឆ្នាំ​២០២២​។​

​លោក​ហង្ស ពុទ្ធា អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត​បាន​ថ្លែងប្រាប់​រសមី​ក​ម្ព​ជា​នៅ​ព្រឹក​ថ្ងៃទី​១២ ខែកុម្ភៈ នេះ​ថា គណៈកម្មាធិការ​ជាតិ​រៀបចំ​ការបោះឆ្នោត បានធ្វើ​បច្ចុប្បន្នភាព​ពាក់ព័ន្ធ​នឹង​ដំណើរការ​ទាំងមូល​ដែល​អនុវត្ត​ទៅតាម​ច្បាប់​ជា​ធរមាន ក្នុងនោះ​ការរៀបចំ​បញ្ជី​បោះឆ្នោត គឺ​បានបញ្ចប់ នឹង​បានធ្វើការ​ផ្សព្វផ្សាយ​នៅ​ថ្ងៃទី​១២ ខែកុម្ភៈ ឆ្នាំ​២០២២​នេះ​។​
​អ្នកនាំពាក្យ​គ.ជ.ប.បានបញ្ជាក់​ថា ការផ្ដល់​សុពលភាព និង​ដាក់ឱ្យ​ប្រើប្រាស់​បញ្ជី​បោះឆ្នោត​ផ្លូវការ ឆ្នាំ​២០២១ ដែលមាន​អ្នកបោះឆ្នោត​សរុប​ចំនួន ៩.២០៥.៦៨១​នាក់ ស្មើនឹង ៨៧,៩៤​ភាគរយ ធៀប​ទៅ​និង​ប្រជាពលរដ្ឋ​ដែលមាន​អាយុ ១៨​ឆ្នាំ​ឡើង​៕​សរន