​ដោយៈ សុវណ្ណ​កុម្ភៈ / ភ្នំពេញៈ សហព័ន្ធ​កីឡាបាល់ទាត់​កម្ពុជា (FFC) បានបង្ហាញ បញ្ជី​ឈ្មោះ​ផ្លូវការ កីឡាករ ២៨​នាក់ ចុងក្រោយ នៃ​ក្រុម​ជម្រើសជាតិ អាយុ​ក្រោម ២៣ ឆ្នាំ​កម្ពុជា ដែល​ជាប់​ក្នុងការ​ធ្វើតេស្ត សម្រាប់​ចូលរួម​ប្រកួត ពានរង្វាន់​បាល់ទាត់​ជើងឯក អាស៊ីអាគ្នេយ៍ អាយុ​ក្រោម ២៣​ឆ្នាំ AFF U23 Championship 2022 នៅ​កម្ពុជា ហើយ​កាលពី​រសៀល ថ្ងៃទី​១២ ខែកុម្ភៈ ឆ្នាំ​២០២២ ម្សិលមិញ​នេះ​។​

​កីឡាករ ២៨ នាក់ ចុងក្រោយ ដែល​ឆ្លង​ផុត​ការធ្វើ​តេស្ដ ២ ដំណាក់កាល​នេះ រួមមាន កីឡាករ ក្លិប​បឹងកេត ៧​នាក់ (​ហ៊ុល គឹម​ហ៊ុយ​, ក​យ សា​លីម​, សៀង ច​ន្ធា​, សឿត ណា​វ៉ា​, តាំង ប៊ុនឆៃ​, លឹម អា​រុណ​រ៉េ​យ​មិន និង​សាន គឹម​ហេង​)​។ វិសាខា ៦​នាក់ (​វីរៈ ដា​រ៉ា​, ទេស សម្បត្តិ​, ឡេង ណូ​រ៉ា​, សារ ទី​, រដ្ឋ វីរៈ និង គី រី​ណា​)​។ ព្រៃវែង ៤​នាក់ (​ចាន់ សា​រ៉ា​ពេជ្រ​, ស រតនា​, ស៊ិន សុវណ្ណ​មករា និង​អាត អូន​តូច​)​។ ភ្នំពេញ​ក្រោ​ន ៣​នាក់ (​យ៉ើ សា​ហ្វី​, សឿត បារាំង និង​ជួន ចាន់​ចាវ​)​។ ព្រះខ័ន​រាជ​ស្វាយរៀង ៣​នាក់ (​មិន រតនៈ​, នី សុខ​រី និង អ៊ា​ន ពិសី​)​។ កងយោធពល​ខេមរភូមិន្ទ ៣​នាក់ (​ណា​រ៉ុង កក្កដា និង​ញាណ សុ​ស៊ី​ដាន​)​។ អគ្គិសនី​កម្ពុជា ២​នាក់ (​ណុប ដេវីត និង​ឈឿង វិ​ស៊ី​នុ​) និង​អង្គ​រថា​យ​ហ្គឺ​រ​ម្នាក់ (​ម៉ៅ ពិសិដ្ឋ​)​។​

​កីឡាករ​ដ៏​សំខាន់​មួយរូប ដែល​តែង​ជាប់ និង​ជួយ​ក្រុម​ជម្រើសជាតិ កន្លងមក គឺ​កីឡាករ លឹម ពិសុទ្ធ បាន​អវត្តមាន ដោយសារ​ខ្សែប្រយុទ្ធ វ័យក្មេង​រូបនេះ មាន​បញ្ហា​របួស អំឡុងពេល​ហ្វឹកហាត់ រូបគេ​មិនអាច​ជួយ​ក្រុម​កម្ពុជា ក្នុង​បេសកកម្ម​ប្រកួត AFF U23 Championship 2022 នា​ដើម​សប្ដាហ៍​ក្រោយនេះ​បាន​។ ហេតុនេះ លោក Keisuke Honda អ្នកចាត់ការ​ក្រុម​ជម្រើសជាតិ​កម្ពុជា សម្រេច​ឲ្យ​កីឡាករ​រូបនេះ សម្រាក​ព្យាបាល​របួស ចៀសវាង​នាំ​ឲ្យ​មាន​របួស​រ៉ាំ​រៃ បង្ករ​ភាព​ធ្ងន់ធ្ងរ និង​ប៉ះពាល់ ដល់​អាជីព​គេ នា​ថ្ងៃក្រោយ​។​

​កម្ពុជា បានទទួល​សិទ្ធិ​ធ្វើ​ម្ចាស់ផ្ទះ ការប្រកួត​ពានរង្វាន់ AFF U23 Championship 2022 ចាប់ពី​ថ្ងៃទី​១៤ ស្អែក​នេះ ដល់​ថ្ងៃទី​២៦ ខែកុម្ភៈ ឆ្នាំ​២០២២ ដោយ​ប្រើប្រាស់ ទីលាន​ប្រកួត ចំនួន ២ គឺ​ពហុ​កីឡដ្ឋាន​ជាតិ មរតក​តេ​ជោ និង​កីឡដ្ឋាន​ព្រី​នស៍​។ ក្រុម​កម្ពុជា ស្ថិតក្នុង​ពូ​ល A ជាមួយ​ទី​ម័​រ​ខាងកើត ហ្វីលីពីន និង​ព្រុយ​ណេ ខណៈ​ការប្រកួត​បើកឆាក កម្ពុជា ត្រូវ​ជួប​ព្រុយ​ណេ មុនគេ នា​ថ្ងៃទី​១៤ ខែកុម្ភៈ តែម្ដង ។ រីឯ​ពូ​ល B នៅសល់​បេក្ខភាព ប្រកួតប្រជែង ៣ ក្រុម​ប៉ុណ្ណោះ បន្ទាប់ពី​ឥណ្ឌូនេស៊ី រួមមាន ក្រុម​ម៉ាឡេស៊ី មី​យ៉ាន់​ម៉ា និង​ឡាវ គ្រា​ដែល​ពូ​ល C មាន ៣ ក្រុម ដូចគ្នា រួមមាន ថៃ វៀតណាម និង​សិង្ហ​បុរី​៕/V​