​ដោយៈ ដកស្រង់​ពី​វចនានុក្រម​សម្តេច​សង្ឃរាជ ជួន ណាត​

តម្កល់​

​កិរិយាសព្ទ​

​ទ្រ​ឲ្យ​ខ្ពស់​ផុតពី​ទី​ប្រក្រតី​, ថ្កល់​លើ​អ្វីៗ​, តាំង​
​តម្កល់​គ្រឿង​សក្ការបូជា ។ តម្កល់ចិត្ត គឺ​តាំងចិត្ត​ឲ្យ​នឹង ។​

​តម្កាត់​

នាមសព្ទ​

​ជំងឺ​តិចតួច​, ជំងឺ​ស្រាលៗ​, ថ្កាត់ ។ ច្រើនតែ​ប្រើ​ជា​បរិវារ​សព្ទ សម្រាប់​ជា​រណប​នឹង​ពាក្យ​ជំងឺ​
​ជំងឺ​តម្កាត់ (​ម​. ព​. ថ្កាត់ ផង​) ។​

​តម្កុំតម្កើង​

កិរិយាសព្ទ​

​លើក​, សរសើរ ឲ្យ​ថ្កុំថ្កើង​
​តម្កុំតម្កើង​កូន​ឲ្យ​ទាល់តែ​ឡើងចិត្ត​ឡើងចាង ច្រងេងច្រងាង​ខូច​អស់ ។​

​តម្កើង​

​កិរិយាសព្ទ​

​រាប់អាន​ជា​ថ្កើង ធ្វើ​ឲ្យ​ថ្កើង​, ដាក់​តម្កល់​លើ​ទី​ខ្ពស់​
​តម្កើងខ្លួន ។​

​តម្បាញ​

​នាមសព្ទ​

​គ្រឿង​ប្រដាប់​សម្រាប់​ត្បាញ​
​ដាក់​តម្បាញ​, មូរ​តម្បាញ ។​
​ជាង​តម្បាញ គឺ​អ្នក​ប្រកបមុខរបរ​ខាង​ត្បាញ​, អ្នក​ចិញ្ចឹមជីវិត​ដោយ​ការ​ត្បាញ ។​