​ដោយៈ គង់​ហេង​/ កំពង់ចាមៈ ក្រុមគ្រូពេទ្យ​ស្ម័គ្រចិត្ត​របស់លោក ហ៊ុន ម៉ា​នី ចំនួន​ជិត ៥០០ នាក់​មកពី​ខេត្តកំពង់ស្ពឺ បាននិងកំពុង​ពិនិត្យ​ព្យាបាល​ជំងឺ​ទូទៅ ជូន​ប្រជាពលរដ្ឋ​ចំនួន បួន ស្រុក របស់​ខេត្តកំពង់ចាម ចាប់ពី​ថ្ងៃទី​១៣ កុម្ភៈ​នេះ​តទៅ​។​

​លោក អ៊ុន ចាន់​ដា អភិបាលខេត្ត​កំពង់ចាម ដែល​បាន​អញ្ជើញ​ចូលរួម​សំណេះសំណាល​ជាមួយ​ក្រុមគ្រូពេទ្យ និង​ប្រជាពលរដ្ឋ​ដែលមាន​បញ្ហា​សុខភាព​ប្រមាណ ១.០០០ នាក់ អញ្ជើញ​មកពី​ឃុំ​ចំនួន ១១ នៅ​វិទ្យាល័យ​កង​តា​ណឹ​ង ស្រុក​កងមាស​បាន​ថ្លែងឱ្យដឹងថាៈ ការព្យាបាល​ជំងឺ​ទូទៅ​ជូន​ប្រជាពលរដ្ឋ ដោយ​ឥតគិតថ្លៃ​ពី​សំណាក់​ក្រុមគ្រូពេទ្យ​ច្រើន​ជំនាញ ដោយ​ចាប់ផ្តើម​ពី​ដើមឆ្នាំ​២០២២​នេះ ដំបូង​គេ​ចេញពី​ស្រុក​កងមាស​។​

​លោក​អភិបាលខេត្ត​កំពង់ចាម​បាន​ថ្លែង​ឱ្យដឹងទៀតថាៈ យោងតាម​ផែនការ ការពិនិត្យ​ព្យាបាល​ជំងឺ​ជូន​ប្រជាពលរដ្ឋ ដែលមាន​ការឯកភាព​ពី​លោក ហ៊ុន ម៉ា​នី គឺ​ក្នុង​ខែកុម្ភៈ​នេះ​ក្រុមគ្រូពេទ្យ​ពិនិត្យ ព្យាបាល សុខភាព​ជូន​ប្រជាពលរដ្ឋ​ទូទៅ ឥតគិតថ្លៃ មិន​ប្រកាន់​បក្សពួក ពូជសាសន៍ សាសនា និង​និន្នាការ​នយោបាយ​នោះទេ បន្ទាប់ពី​ស្រុក​កងមាស​នេះ ចូលដល់​ខែក្រោយ​ខែមីនា នឹង​ទៅកាន់​ស្រុក​ស្រី​សន្ធរ ខែមេសា​ទៅ​ស្រុក​ជើងព្រៃ ហើយនឹង​បិទ​បញ្ចប់​ខែឧសភា នៅ​ខាង​ស្រុក​ចម្ការលើ​។ ស្របពេល​ការបោះឆ្នោត​ក្រុមប្រឹក្សាឃុំ សង្កាត់​នឹង​ជិត​មកដល់​។​

​លោក​បាន​បន្តថាៈ ក្នុងនោះ​ប្រជាពលរដ្ឋ ដែលមាន​បញ្ហា​សុខភាព នឹង​ជួប​ជាមួយ​ក្រុមគ្រូពេទ្យ​ជំនាញ​តាម​អាកា​រៈ​ជំងឺ ហើយ​គ្រូពេទ្យ​នឹង​ផ្តល់​ថ្នាំសង្កូវ​តាម​វេជ្ជបញ្ជា​។ ជាមួយ​នោះ​លោក​អភិបាលខេត្ត​កំពង់ចាម​រូបនេះ ក៏​សូម​សម្តែង​ការ​អរគុណ​ជា​អនេក​ដល់​ថ្នាក់ដឹកនាំ នៃ​ក្រុមគ្រូពេទ្យ​ស្ម័គ្រចិត្ត​របស់លោក ហ៊ុន ម៉ា​នី ទាំងអស់ ដែល​បាន​ខិតខំ​ប្រឹង​ប្រែ​រៀបចំ​ផែនការ​ពិនិត្យ ព្យាបាល​ជំងឺ​យ៉ាង​លម្អិត​ជូន​ដល់​ប្រជាពលរដ្ឋ​ខេត្តកំពង់ចាម​៕​