ដោយៈ​វ៉ៃ​កូ​/​ស្វាយរៀងៈ នៅ​ព្រឹក​ថ្ងៃទី​១៣ ខែកុម្ភៈ ឆ្នាំ​២០២២ លោក លី ធុច ប្រធាន​ក្រុមការងារ​រាជរដ្ឋាភិបាល​ចុះជួយ​ក្រុង​បាវិត ខេត្តស្វាយរៀង បាន​មានប្រសាសន៍ថាៈ ភាពជោគជ័យ​ក្នុង​ជីវិត និង​ភាពជោគជ័យ​របស់​ប្រទេសជាតិ គឺ​បានមកពី​ការចូលរួម​របស់លោក​គ្រូ អ្នកគ្រូ ដែលជា​ស្ថាបនិក​នៃ​ក្តី​ស​ង្ឍឹ​ម និង​អនាគត សម្រាប់​សង្គមជាតិ​មាតុភូមិ​របស់​យើង​។​

​លោក លី ធុច បាន​មានប្រសាសន៍​ដូច្នេះ ក្នុងឱកាស​ដែល​លោក និង​ក្រុមការងារ​បាន​អញ្ជើញ​ជួប​សំណេះសំណាល​ជាមួយ​លោកគ្រូ​-​អ្នកគ្រូ និង​ថ្លែង​អំណរ​ដល់​លោកគ្រូ​-​អ្នកគ្រូ ទូទាំង​ក្រុង​បាវិត​សរុប​ចំនួន ៣៦៣ នាក់​មកពី​សាលា​ចំនួន ២១ និង​ការិយាល័យ​អប់រំ យុវជន និង​កីឡា ក្រុង​បាវិត​ខេត្តស្វាយរៀង​។

​ពិធី​នេះ បាន​ប្រព្រឹត្តិ​ទៅ​នៅ​វិទ្យាល័យ​ចំណេះ​ទូទៅ​និង​បច្ចេកទេស​បាវិត និង​មានការ​ចូលរួម​ពី លោក សេង សីលា អភិបាលរង​ខេត្តស្វាយរៀង តំណាង​របស់ លោក ម៉ែន វិបុល អភិបាលខេត្ត​ស្វាយរៀង លោក លឹម សៀង ហេង អភិបាលក្រុង​បាវិត ក្រុមការងារ​ក្រុង ក្រុមការងារ​សង្កាត់​ទាំង​៥ និង​រដ្ឋបាល​ក្រុង​បាវិត​។

​លោក​បាន​ថ្លែងអំណរគុណ​យ៉ាង​ជ្រាលជ្រៅ និង​សម្តែង​នូវ​ការដឹងគុណ​ជូន​ចំពោះ​ការលះបង់​ចេញពី​បេះដូង​ទាំង​កម្លាំងកាយ និង​កម្លាំងចិត្ត​របស់​លោកគ្រូ​-​អ្នកគ្រូ​ទាំងអស់ ដែល​បាន​ខិតខំ​បណ្តុះបណ្តាល និង​បង្រៀន​ដល់​សិស្សានុសិស្ស​ដោយ​មិន​គិតពី​ប្រយោជន៍​ផ្ទាល់ខ្លួន ដើម្បីឱ្យ​យើង​ទាំងអស់​ក្លាយជា​មនុស្ស​ល្អ បងប្អូន​ល្អ ប្តី​ប្រពន្ធ​ល្អ និង​ប្រជាពលរដ្ឋ​ល្អ​។

​លោក​បាន​បន្តទៀតថាៈ ការលះបង់​របស់លោក​គ្រូ​-​អ្នកគ្រូ ពិតជា​មាន​ភាព​វិសេស​ក្រៃលែង​សម្រាប់​យើងទាំងអស់គ្នា មានតម្លៃ​មហិមា មាន​សារៈសំខាន់ និង​មាន​ឥទ្ធិពល​ទៅលើ​ជីវិត​មនុស្ស​គ្រប់គ្នា​។ លោក​សូម ចាត់ទុក​គ្រូបង្រៀន គឺជា​ឆ្អឹងខ្នង​ដ៏​រឹងមាំ និង​ជា​ត្រីវិស័យ​ដែល​បានបង្ហាញ​ផ្លូវ​យើង​ទៅកាន់​ការចង់​ដឹង ការចង់​លឺ ផ្តល់​ចំណេះដឹង និង​មាន​ប្រាជ្ញា​វាងវៃ ព្រមទាំង​ជា​ផ្លូវ​បង្ហាញ​ទិស ទៀន​បំភ្លឺ​ផ្លូវ ផ្តល់​មិត្តភាព វិន័យ និង​សេចក្តីស្រលាញ់ ដល់​មនុស្ស​គ្រប់គ្នា​។ លោកគ្រូ​-​អ្នកគ្រូ គឺជា​អ្នកជំរុញ​ទឹកចិត្ត និង​ជា​អ្នក​ផ្លាស់​ប្តូរជីវិត​របស់​យើង ហើយ​ភាពជោគជ័យ​ក្នុង​ជីវិត និង​ភាពជោគជ័យ​របស់​ប្រទេសជាតិ​របស់​យើង គឺ​បានមកពី​ការចូលរួម​របស់លោក​គ្រូ អ្នកគ្រូ ដែលជា​ស្ថាបនិក​នៃ​ក្តី​ស​ង្ឍឹ​ម និង​អនាគត សម្រាប់​សង្គមជាតិ​មាតុភូមិ​របស់​យើង​៕​