ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមហ៊ុន​អាកាសចរណ៍​មួយចំនួន​បាន​លុបចោល​ឬ​បង្វែរ​ជើងហោះហើរ​ចេញពី​ប្រទេស​អ៊ុ​យក្រែន ចំ​ពេល​មាន​ការបារម្ភ​កាន់តែ​ខ្លាំង​ឡើង​ថា​ការឈ្លានពាន​​ពី​សំណាក់​រុស្ស៊ី​គឺ​ជិត​មក​ដល់ បើទោះជា​កំពុង​មាន​ការចរចា​យ៉ាង​ស៊ីជម្រៅ​រវាង​វិមាន​ក្រឹម​ឡាំង និង​លោក​ខាងលិច​ក៏ដោយ​។​

​សេត​វិមាន​បាន​និយាយថា នៅក្នុង​ការហៅ​ទូរស័ព្ទ​រយៈពេល​មួយ​ម៉ោង​កាលពី​ថ្ងៃ​សៅរ៍​ជាមួយ​ប្រធានាធិបតី​រុស្ស៊ី​លោក​វ្ល៉ា​ឌី​មៀរ ពូ​ទីន ប្រធានាធិបតី​អាម៉េរិក​លោក ចូ បៃ​ដិន បាន​និយាយថា​ការ​ឈ្លាន​​ពាន​លើ​អ៊ុយ​ក្រែ​ននឹង​បង្ក​ឱ្យមាន “​ទុក្ខវេទនា​រីក​រាលដាល​” ហើយ​ថា​លោក​ខាងលិច​បាន​ប្តេជ្ញាចិត្ត​បន្ត​ផ្នែក​ការទូត​ដើម្បី​បញ្ចប់​វិបត្តិ​នេះ ប៉ុន្តែ “​បាន​ត្រៀម​ខ្លួន​ស្មើ​ដៃ​ផង​ដែរ​សម្រាប់​សេណា​រី​យ៉ូ​ផ្សេងទៀត​”​។​

​សេត​វិមាន​មិន​បាន​លើកឡើង​ថា​តើ​ការតេ​ទូរស័ព្ទនេះ​បាន​បន្ថយ​ការគំរាមកំហែង​នៃ​សង្គ្រាម​ដែល​អាច​នឹង​កើត​ឡើង​នៅ​អឺរ៉ុប​ឬ​យ៉ាងណា​នោះ​ទេ​។​

​សេត​វិមាន​បាន​និយាយថា លោកបៃ​ដិន​គ្រោង​ពិភាក្សា​ជាមួយ​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀរ ហ្សេ​លេន​ស្គី (Volodymyr Zelensky)​នៅ​យប់​ថ្ងៃអាទិត្យ​។​

​កាលពី​ថ្ងៃ​សុក្រ ទីប្រឹក្សា​សន្តិសុខ​ជាតិ​របស់​លោកបៃ​ដិន​លោក ជែក ស៊ូ​ល​លី​វ៉ាន់ (Jake Sullivan) បាន​ព្រមាន​ថា ព័ត៌មាន​ស៊ើបការណ៍​សម្ងាត់​របស់​ស​ហ​រដ្ឋ​អាម៉េរិក​បង្ហាញថា​ការឈ្លានពាន​​របស់​រុស្ស៊ី​អាច​នឹង​ចាប់ផ្តើម​ក្នុង​រយៈពេល​ប៉ុន្មាន​ថ្ងៃ​ទៀត​។ លោក​ហ្សេ​លេន​ស្គី​បាន​បដិសេធ​ការព្រួយបារម្ភ​ពី​ការឈ្លានពាន ដោយ​ជំរុញ​ឱ្យ​ប្រជាជន​ក្នុង​ប្រទេស​រក្សា​ភាពស្ងប់ស្ងាត់​។​

​រុស្ស៊ី​បដិសេធថា​ខ្លួន​ពុំ​មាន​ចេតនា​ឈ្លានពាន​ទេ ប៉ុន្តែ​បាន​ប្រមូលផ្តុំ​ទ័ព​ជាង​១០​ម៉ឺន​នាក់​នៅ​ជិត​ព្រំដែន​អ៊ុ​យក្រែន ហើយ​បាន​បញ្ជូន​ទាហាន​ទៅ​ធ្វើ​សមយុទ្ធ​នៅ​ប្រទេស​ជិតខាង បេឡា​រូស​រួម​ទាំង​ទាំង​​ទាមទារ​អោយ​លោកខាងលិច​បំពេញ​តាម​សំណើ​របស់​ខ្លួន​មួយចំនួន រួម​ទាំង​មិន​បញ្ចូល​អ៊ុយ​ក្រែន​ក្នុង​អង្គកា​រណាតូ​។​

​ក្រុមមន្ត្រី​អាម៉េរិក​និយាយថា ការបង្កើន​ទាហាន​របស់​រុស្ស៊ី​បាន​ឈាន​ដល់​ចំណុច​ដែល​រុស្ស៊ី​អាច​បើក​ការឈ្លានពាន​ក្នុងពេល​ដ៏​ខ្លី​។​

​អាម៉េរិក​បាន​ប្រមូល​ព័ត៌មាន​សម្ងាត់​ដែលថា​រុស្ស៊ី​កំពុង​សម្លឹងមើល​ថ្ងៃ​ពុធ​ជា​កាលបរិច្ឆេទ​វាយប្រហា​រ នេះ​បើ​យោង​តាម​មន្ត្រី​អាមេរិក​ម្នាក់​ដែល​ដឹង​អំពី​ព័ត៌មាន​ចារកម្ម​។​

​លោក​ហ្សេ​លេន​ស្គី​បាន​និយាយ​កាលពី​ថ្ងៃ​សៅ​រ៍ថា “​ខ្ញុំ​ជឿថា សព្វ​ថ្ងៃនេះ​មាន​លំហ​ព័ត៌មាន​ច្រើនណាស់ ចឹង​គឺ​សម្បូរណាស់​ព័ត៌មាន​។ យើង​ដឹង​ពី​ហានិភ័យ​ទាំងអស់នេះ យើង​ដឹង​ថា​មាន​ហានិភ័យ​។​ប្រសិន​​បើ​អ្នក​ឬ​នរណា​ម្នាក់​ផ្សេង​ទៀត​មាន​ព័ត៌មាន​បន្ថែម​ទាក់ទង​នឹង​ការឈ្លានពាន​របស់​រុស្ស៊ី ១០០​ភាគរយ ដែល​ចាប់ផ្តើម​នៅ​ថ្ងៃទី​១៦​កុម្ភៈ សូម​បញ្ជូន​ព័ត៌មាន​នោះ​មក​ពួក​យើង​”៕

​ក្រុមហ៊ុន​អាកាសចរណ៍​មួយចំនួន​បាន​លុបចោល​ឬ​បង្វែរ​ជើងហោះហើរ​ចេញពី​ប្រទេស​អ៊ុ​យក្រែន