ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ កងទ័ពអាកាស​អាម៉េរិក​បាន​និយាយ​កាលពី​ថ្ងៃ​សៅ​រ៍ថា យន្តហោះ​ចម្បាំង F-22​របស់​អាម៉េរិក​បានមក​ដល់​មូលដ្ឋាន​ទ័ពអាកាស​មួយ​ក្នុង​ប្រទេស​អារ៉ាប់​រួម​​អេ​មី​រ៉ាត​(​សហភាព​អារ៉ាប់​)​កាលពី​ថ្ងៃ​សៅរ៍​ទី ១៣ ខែ​កុម្ភៈ បន្ទាប់​ពី​ការវាយប្រហារ​មិន​ធ្លាប់​មាន​ពីមុន​មក​លើ​ទីក្រុង​អា​ប៊ូ​ដា​ប៊ី (Abu Dhabi)​ពី​សំណាក់​ពួក​យុទ្ធជន​ហូ​ធី (Houthi)​ក្នុងប្រទេស​​យេ​ម៉ែន​។​

​ក្នុង​រយៈពេល​ប៉ុន្មាន​សប្តាហ៍​ថ្មីៗ​នេះ ក្រុម​ឧទ្ទាម​ហ៊ូ​ធី ដែល​ជា​សម្ពន្ធមិត្ត​អ៊ីរ៉ង់ បាន​ធ្វើ​ការវាយប្រហារ​បរាជ័យ​ទៅ​លើ​គោលដៅ​នៅ​អារ៉ាប់​រួម​អេ​មី​រ៉ា​ត ដែល​ជំរុញ​ឱ្យ​មាន​ការបាញ់​ទប់ទល់​ពី​ខែល​ការពារ​ដែនអាកាស​របស់​អា​រ៉ាប់រួម​និង​សហរដ្ឋ​អាម៉េរិ​ក ហើយ​ថែមទាំង​បាន​ឃើញ​ទាហាន​អាម៉េរិក​ដែលមាន​មូលដ្ឋាន​នៅ​ទី​នោះ​រត់​ជ្រក​គ្រាប់​មួយ​ប្រាវ​ផងដែរ​។​

​សេចក្តីថ្លែងការណ៍​បាន​និយាយថា យន្តហោះ​ចម្បាំង​ទាំងនោះ​បាន​មកដល់​មូលដ្ឋាន​នៅ​អារ៉ាប់​រួម​អេ​មី​រ៉ា​ត ជា​ផ្នែក​នៃ​ការបង្ហាញ​ការគាំទ្រ​ពហុ​មុំ​របស់​សហរដ្ឋ​អាម៉េរិក​បន្ទាប់ពី​ការវាយប្រហារ​ជា​បន្តបន្ទាប់​​ពេញ​មួយ​ខែ​មករា បាន​គំរាមកំហែង​ដល់​កងកម្លាំង​ប្រដាប់អាវុធ​អាម៉េរិក​និង​អារ៉ាប់​រួម ដែល​ឈរជើង​នៅឯ​មូលដ្ឋាន​មួយ​របស់​ប្រទេស​ម្ចាស់ផ្ទះ​។​

​សេចក្តីថ្លែងការណ៍​របស់​ទីបញ្ជាការ​កណ្តាល​កងទ័ពអាកាស​អាម៉េរិ​ក​បាន​និយាយថា រដ្ឋមន្ត្រី​ក្រសួង​ការពារជាតិ​អាម៉េរិក​បាន​បញ្ជា​ឱ្យ​ដាក់ពង្រាយ​យន្តហោះ​ជំនាន់​ទី ៥​យ៉ាង​ឆាប់រហ័ស​ដោយ​មាន​ការ​​សម្របសម្រួល​ជាមួយ​ព្រះអង្គម្ចាស់​នៃ​ទីក្រុង​អា​ប៊ូ​ដា​ប៊ី គឺ​ទ្រង់ ម៉ូ​ហាម​ម៉េត ប៊ីន ហ្សា​យ៉េត អាល់ ណា​យ៉ាន (Mohammed Bin Zayed Al Nahyan) នៃ​អារ៉ាប់​រួម​អេ​មី​រ៉ា​ត​។​

​យន្តហោះ​នេះ​នឹង​ចូលរួម​ក្នុង​ការប្រយុទ្ធ​រួមគ្នា​របស់​សម្ពន្ធមិត្ត កងកម្លាំង​ចម្រុះ និង ដៃគូ ដែល​មាន​មូលដ្ឋាន​រួចជាស្រេច​នៅ​ទូទាំង​តំបន់​។​

​កងទ័ពអាកាស​អាម៉េរិក​បាន​និយាយថា ទាហានជើងអាកាស និង​យន្តហោះ F-22 ត្រូវបាន​ដាក់​ពង្រាយ​ពី​កង​យន្តហោះ​ចម្បាំង​ទី​១ ដែល​មាន​ទីតាំង​នៅ​មូលដ្ឋាន​រួម លែង​លី​-​យូ​ស្ទីស (Langley-Eustis) ក្នុង​រដ្ឋ​វើជី​នៀ​៕

​យន្តហោះ F-22 បាន​មក​ដល់​អារ៉ាប់​រួម​កាលពី​ថ្ងៃ​សៅរ៍​