​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ មាន​ការរំខាន​នៅ​ក្នុង​ព្រឹត្តិការណ៍​កីឡា​អូឡាំពិក​រដូវរងា​កាលពី​ថ្ងៃអាទិត្យ​ទី​១៣​កុម្ភៈ ដោយសារ​តែ​ការធ្លាក់​ព្រិល​មែនទែន​មក​ភ្លាមៗ​។​

​ក្នុងចំណោម​ការរិះគន់​កីឡា​អូឡាំពិក​ឆ្នាំនេះ​គឺ​ការពឹងផ្អែក​លើ​ព្រិល​ក្លែងក្លាយ ១០០ ភាគរយ ដោយសារ​កង្វះ​ទឹកភ្លៀង​នៅក្នុង​តំបន់​ដែល​ជា​ធម្មតា​ទទួលបាន​ព្រិល​តិចជាង​មួយ​អ៊ី​ញ​ក្នុង​មួយខែ​​ក្នុង​រដូវរងា​។​

​ប៉ុន្តែ​ព្រិល​បាន​ធ្លាក់​មក​យ៉ាងខ្លាំង​កាលពី​ចុង​សប្តាហ៍ ជាហេតុ​នាំ​ឱ្យ​មាន​ការលុបចោល​ព្រឹត្តិការណ៍​ជា​ច្រើន ខណៈ​ព្រិល​ជាច្រើន​អ៊ី​ញ​បាន​ធ្លាក់​ចុះ​ក្នុង​ចន្លោះ​ពេល​ត្រឹមតែ​២៤​ម៉ោង​។​

​នៅ​ទីក្រុង​ចាង​ចៀ​គូ (Zhangjiakou) នៅ​សួន​ព្រិល​ជែន​ធី​ង (Genting) ការប្រកួត​ជម្រុះ​ជិះ​ស្គី​ចុះ​ជម្រាលភ្នំ​វិញ្ញាសា​ស្ត្រី​ត្រូវបាន​លើក​ពេល​ទៅ​ថ្ងៃ​ចន្ទ ដោយសារ​ព្រិល​ធ្លាក់​ខ្លាំង​ពេក​។​

​កីឡាការិនី​សង្ឃឹម​ឈ្នះ​មេដាយមាស​របស់​ចក្រភព​អង់គ្លេស​នាង គ្រីស្ទី មៀ (Kirsty Muir) ដែល​ជាប់​ចំណាត់ថ្នាក់​លេខ ៥ ក្នុង​វិញ្ញាសា Big Air នឹង​ត្រូវ​ប្រកួត​ចាប់​ដៃគូ​ជាមួយ​នាង ខា​ធី សាំ​មឺ​ហេស (Katie Summerhayes)​។​

​ថ្ងៃ​ទី​ពីរ​នៃ​ការហាត់​សម​ចុះ​ពីលើ​ភ្នំ​នៃ​វិញ្ញាសា​ស្ត្រី​នៅ​មជ្ឈមណ្ឌល​ជិះ​ស្គី​ភ្នំ​អាល់​ជាតិ (National Alpine Ski) ក្នុង​ទីក្រុង​យ៉ាន​ឈីង (Yanqing) ក៏​ត្រូវ​បាន​លុបចោល​ផងដែរ ប៉ុន្តែ​វិញ្ញាសា Giant Slalom របស់​បុរស​បាន​ដំណើរការ​ទៅ​មុខ​ជា​ធម្មតា​៕

​ព្រិល​ធ្លាក់​ខ្លាំង​បណ្តាលឱ្យ​ការប្រកួត​ជាច្រើន​ត្រូវ​លើក​ពេល​មក​ថ្ងៃ​ចន្ទ​វិញ