ប្រែ​សម្រួល : កញ្ញា​ដា​លី​ស (​ឆា​នែ​ល​ញូ​វ​អេ​ស៊ា​) ៖ សិង្ហ​បុរី​បាន​ទទួល​ថ្នាំ​គ្រាប់ Paxlovid របស់​ក្រុមហ៊ុន Pfizer កញ្ចប់​ដំបូង​របស់​ខ្លួន បន្ទាប់​ពី​អាជ្ញាធរ​បាន​ប្រកាស​កាល​ពី​សប្តាហ៍​មុន​ថា​ខ្លួន​​បានអនុម័ត​ថ្នាំ​គ្រាប់​នេះ​សម្រាប់​ព្យាបាល​កូវី​ដ​១៩​នេះ​ចំពោះ​អ្នកជំងឺ​ពេញវ័យ ដែល​មាន​ហានិភ័យ​ធ្លាក់ខ្លួន​ឈឺធ្ងន់ធ្ងរ​។​

​រដ្ឋមន្ត្រីក្រសួង​សុខាភិបាល​លោក អុង យេ គង់ (Ong Ye Kung)​បាន​និយាយ​នៅក្នុង​សារ​បង្ហោះ​លើ​ហ្វេ​សប៊ុក​កាលពី​ថ្ងៃ​សៅរ៍​ទី​១២ កុម្ភៈ​ថា “​កញ្ចប់​ទីមួយ​នៃ​ថ្នាំ Paxlovid​បាន​មក​ដល់​ច្រាំង​​សមុទ្រ​របស់​យើង​ក្នុង​សប្តាហ៍​នេះ​”​។​

​លោក​បាន​បន្ថែមថា “​នេះ​គឺជា​ថ្នាំលេប​ប្រឆាំង​មេរោគ​ដំបូង​គេ ដែល​ត្រូវបាន​អនុម័ត​សម្រាប់​ការព្យាបាល​កូវី​ដ​១៩​នៅក្នុង​សិង្ហ​បុរី​។​វា​នឹង​ត្រូវ​បាន​ចេញ​វេជ្ជបញ្ជា​និង​ផ្តល់​អាទិភាព​សម្រាប់​អ្នក​ដែល​​មាន​ហានិភ័យ​ខ្ពស់​ក្នុង​ការ​ធ្លាក់ខ្លួន​ឈឺធ្ងន់ធ្ងរ​ដោយកូវី​ដ​១៩”​។​

“​ជាមួយ​នឹង​ជម្រើស​នៃ​ការព្យាបាល​កាន់តែច្រើន ឥឡូវ​នេះ​យើង​ស្ថិតក្នុង​ស្ថានភាព​ប្រសើរ​ជាង​មុន​ក្នុង​ការផ្តល់​ការថែទាំ​ដ៏​ល្អ​ដល់​ប្រជាជន​សិង្ហ​បុរី​ដែល​ឆ្លងកូវី​ដ​១៩”​។​

Paxlovid ត្រូវបាន​រកឃើញ​ថា​អាច​កាត់បន្ថយ​ហានិភ័យ​នៃ​ការ​ចូល​ដេក​មន្ទីរពេទ្យ​ដែល​ទាក់ទង​នឹង​កូវី​ដ​១៩ ឬ​ការស្លាប់​បាន ៨៨,៩ ភាគរយ​នៅពេលដែល​ការព្យាបាល​ត្រូវ​បាន​ផ្តល់ឱ្យ​ក្នុង​រយៈពេល​បី​​ថ្ងៃ​បន្ទាប់ពី​រោគសញ្ញា​ចាប់ផ្តើម​លេចឡើង នេះ​បើ​យោង​តាម​ការ​ពិនិត្យ​ឡើងវិញ​របស់​អាជ្ញាធរ​វិទ្យាសាស្ត្រ​សុខាភិបាល (HSA) លើ​ទិន្នន័យ​គ្លីនិក​ដោយ​ផ្អែក​លើ​ការសិក្សា​ជា​បន្ត​របស់ Pfizer ។​

Paxlovid រួម​មាន​ថ្នាំ Nirmatrelvir ចំនួន​ពីរ​គ្រាប់ និង​ថ្នាំ Ritonavir មួយ​គ្រាប់ ដែល​វេច​ខ្ចប់​រួមគ្នា​សម្រាប់​លេប​។ ថ្នាំ Nirmatrelvir គឺជា​ថ្នាំ​ប្រឆាំង​មេរោគ ខណៈ​ថ្នាំ Ritonavir ជួយ​រក្សា​កម្រិត​ឈាម​នៃ​ថ្នាំ Nirmatrelvir សម្រាប់​ប្រសិទ្ធភាព​ប្រឆាំង​មេរោគ​។

HSA បាន​និយាយ​កាលពី​ថ្ងៃទី ៣ ខែ​កុម្ភៈ​ថា ថ្នាំ​នេះ​គួរតែ​លេប​ពីរ​ដង​ក្នុង​មួយ​ថ្ងៃ​សម្រាប់​រយៈពេល​ប្រាំ​ថ្ងៃ ដោយ​ការព្យាបាល​ត្រូវ​ចាប់ផ្តើម “​ឱ្យបាន​ឆាប់​តាម​ដែល​អាច​ធ្វើទៅបាន បន្ទាប់​ពី​ការធ្វើ​រោគវិនិច្ឆ័យ​ឃើញ​រោគសញ្ញា​កូវី​ដ​១៩​ក្នុង​រយៈពេល​ប្រាំ​ថ្ងៃ​បន្ទាប់ពី​ឆ្លង​រោគ​”​។​

​ថ្នាំ​គ្រាប់ Paxlovid របស់​ក្រុមហ៊ុន Pfizer កញ្ចប់​ដំបូង​សម្រាប់​ព្យាបាល​កូ​វីដ​ដឹក​មក​ដល់​សិង្ហ​បុរី​កាលពី​ថ្ងៃ​សៅរ៍

​ជុំវិញ​កូវី​ដ​១៩​នេះដែរ សិង្ហ​បុរី​កាលពី​ថ្ងៃអាទិត្យ​បាន​រាយការណ៍​អ្នក​ឆ្លងកូវី​ដ​១៩​ថ្មី​ចំនួន​៩.៤២០​នាក់ ក្នុង​ចំនួន​នេះ ៩.១៩៥​នាក់​ឆ្លង​នៅ​ក្នង​ស្រុក​៕

​គិត​មក​ត្រឹម​ថ្ងៃអាទិត្យ សិង្ហ​បុរី​បាន​រក​ឃើញ​អ្នក​ឆ្លងកូវី​ដ​១៩​ចំនួន​៤៦៩.៤៩៥​នាក់ ចាប់តាំងពី​ពេល​ចាប់ផ្តើម​មាន​ជំងឺ​នេះ​កាលពី​ពីរ​ឆ្នាំ​មុន​មក​