ដោយ​: ភ្នំ​ខៀវ / ប៉ៃលិន​: នៅ​ព្រលប់​ថ្ងៃទី ១៣ ខែកុម្ភៈ ឆ្នាំ ២០២២ សមត្ថកិច្ច​ជំនាញ​ចម្រុះ​ចុះ ឆែកឆេរ និង បង្ក្រាប​ទីតាំង​លួចលាក់​បើក​ល្បែង​អន​ឡាញ​ខុសច្បាប់ និង​បាន​លួច​បង្កប់​នូវ​ទំនិញគេចពន្ធ​ជាច្រើន​ទៀត នៅ​ភូមិ​ផ្សារ​ព្រំ​ជើង ឃុំ​ស្ទឹង​កាច់ ស្រុក​សាលា​ក្រៅ ខេត្ត​ប៉ៃលិន ។​

​ក្រោយ​ការពិនិត្យ និង​រកឃើញ​សម្ភារ​:​ជាច្រើន​នេះ សមត្ថកិច្ច​នឹង​បន្ត​កោះហៅ​ម្ចាស់​ទីតាំង​ឈ្មោះ​ចាន់ វាសនា ភេទ​ប្រុស អាយុ ៣៩ ឆ្នាំ ឲ្យ​ចូលមក​បំភ្លឺ​បន្ទាប់ពី​រត់គេចខ្លួន​នៅពេល​សមត្ថកិច្ច​ចុះទៅ​ដល់​។​

​ជាមួយគ្នា​កម្លាំង​ការិយាល័យ​ជំនាញ​ដកហូត​វត្ថុតាង​ជាច្រើន​រួមមាន ម៉ូនីទ័រ​ចំនួន​ប្រាំ​គ្រឿង តុ​សំរាប់​តាំង​កុំព្យូទ័រ​ចំនួន​ពីរ ស៊ី​ភី​យូ​ចំនួន ១០​គ្រឿង គ្រាប់កាំភ្លើង​ម៉ា​កឡុក​ចំនួន​បី​គ្រាប់ ម៉ាស៊ីន​ព្រី​ន​ចំនួន​ពីរ​គ្រឿង ខ្សែ​អ៊ីនធឺណិត​ពណ៌​ខៀវ​ចំនួន​មួយ​កេះ​ធំ ពណ៌​ខ្មៅ​ចំនួន​៦​ដុំ​តូច ឧបករណ៍​សម្រាប់​ទប់​ភ្លើង​ចំនួន​៦​គ្រឿង ដុំ WiFi ចំនួន ១​គ្រឿង រួមទាំង​សម្ភារ​:​ពាក់ព័ន្ធ​មួយចំនួនទៀត​។​

​ប្រភពព័ត៌មាន​ដដែល​បញ្ជាក់ថា ក្រោយ​ការបង្ក្រាប​ដកហូត វត្ថុ​ទាំងអស់​ខាងលើ​ត្រូវបាន​កម្លាំង​ជំនាញ​យកទៅ​រក្សាទុក​នៅ​ស្នងការដ្ឋាន​នគរបាល​ខេត្ត​ប៉ៃលិន រង​ការដោះស្រាយ​តាម​នីតិវិធី​៕​