​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ នាយករដ្ឋមន្ត្រី​អូស្ត្រាលី​លោក ស្កុត ម៉ូ​រី​សុន កំពុង​ប្រឈមមុខ​នឹង​បរាជ័យ​ដ៏​ធំ​នៅក្នុង​ការបោះឆ្នោត​ដែល​គ្រោង​ធ្វើឡើង​ក្នុង​រយៈពេល​ប៉ុន្មាន​ខែ​ខាងមុខ នេះ​បើ​យោង​តាម​ការស្ទង់មតិ​ដោយញូវ​ស៍ភូល​( Newspoll) ដែល​មាន​ការគោរព​យ៉ាង​ខ្ពង់ខ្ពស់ ខណៈ​រដ្ឋាភិបាល​អភិរក្សនិយម​របស់​លោក​កំពុងតាម​ពី​ក្រោយ​គណបក្ស​ពលក​រ ឆ្វេង​និយម ដោយ​សំឡេង ៤៥ ភាគរយ​ទល់​នឹង ៥៥ ភាគរយ​បន្ទាប់​ពី​សប្តាហ៍​ដ៏​ចលាចល​នៅក្នុង​សភា​។​

​លទ្ធផល​នេះ​គឺ​គ្រាន់តែ​ជា​ការ​ល្អ​ប្រសើរ​តិចតួច​ប៉ុណ្ណោះ​សម្រាប់​រដ្ឋាភិបាល​បើ​ធៀប​នឹង​ការស្ទង់មតិ​របស់ Newspoll​កាលពី​ខែ​មករា ដែល​ឃើញ​បក្ស​អភិរក្សនិយម​មាន​សំឡេងគាំទ្រ ៤៤ ភាគរយ​ទល់​នឹង ៥៦ ភាគរយ​នៅក្នុង​លទ្ធផល​ដ៏​អាក្រក់​បំផុត​របស់​ខ្លួន​ក្នុង​រយៈពេល​ជាង​បី​ឆ្នាំ​។​

​ការស្ទង់មតិ​ថ្មី​ត្រូវបាន​ធ្វើឡើង​នៅ​ចន្លោះ​ថ្ងៃទី ៩ ដល់​ថ្ងៃទី ១២ ខែ​កុម្ភៈ ហើយ​បាន​ចុះផ្សាយ​ក្នុង​កាសែត The Australian កាលពី​ថ្ងៃ​ចន្ទ​ទី ១៤ ខែ​កុម្ភៈ​។​

​យោង​តាម​កាសែត The Australian ប្រសិនបើ​ការស្ទង់មតិ​នេះ​កើតឡើង​ម្តងទៀត​នៅ​ទូទាំង​ប្រទេស​នៅ​ការ​ក្នុង​បោះឆ្នោត​បន្ទាប់​លោក​ម៉ូ​រី​សុន​នឹង​ធ្លាក់​ពី​តំណែង​ជាមួយនឹង​ការបាត់បង់​​កៅអី​ចំនួន ២១ អាសនៈ​។​

​រដ្ឋាភិបាល​ស្តាំនិយម​របស់​អូស្ត្រាលី​កំពុង​ពិបាក​បង្វែរ​ការយកចិត្ត​ទុកដាក់​របស់​អ្នកបោះឆ្នោត​ឱ្យ​ងាក​មក​មើល​ព័ត៌មាន​សេដ្ឋកិច្ច​វិជ្ជមាន​បន្ទាប់ពី​ការកើនឡើង​ករណី​កូវី​ដ​១៩​យ៉ាង​ឆាប់រហ័ស​នៅ​រដូវ​​ក្តៅ​និង​ការកកស្ទះ​ខ្សែសង្វាក់​ផ្គត់ផ្គង់​បណ្តាល​ឱ្យ​ធ្នើ​ទទេ​ស្អាត​នៅ​តាម​ផ្សារ​ទំនើប​ទូទាំង​ប្រទេស​។​

​ភាពចលាចល​កាន់តែច្រើន​បាន​កើត​ឡើង​កាលពី​សប្តាហ៍​មុន នៅពេល​ដែល​សភា​របស់​អូស្ត្រាលី​បើក​ការប្រជុំ​ជា​លើក​ដំបូង​ក្នុង​ឆ្នាំ ២០២២​។​

​រដ្ឋាភិបាល​ត្រូវ​បង្ខំចិត្ត​ផ្អាក​ច្បាប់​ប្រឆាំង​ការរើសអើង​សាសនា​ដ៏​លេចធ្លោ​របស់ខ្លួន បន្ទាប់​ពី​ការប្រជុំ​សភា​បន្លាយពេល​រហូតដល់​យប់​ជ្រៅ ដែល​ក្នុងនោះ​សមាជិក​សភា​ប្រាំ​នាក់​របស់​ខ្លួន​បាន​បោះឆ្នោត​គាំទ្រ​វិសោធនកម្ម​របស់​បក្ស​ប្រឆាំង ដែល​ការពារ​សិស្ស​ខ្ទើយ (LGBTQ)​ពី​ការបណ្ដេញចេញ​ពី​សាលា​សាសនា​៕

លោក​ស្កុត ម៉ូ​រី​សុន បាន​ឈ្នះ​ការបោះឆ្នោត​យ៉ាង​ភ្ញាក់ផ្អើល​ក្នុង​ឆ្នាំ​២០១៩ បន្ទាប់ពី​មាន​សំឡេង​ទាប​ក្នុង​ការស្ទង់មតិ