​ប្រែ​សម្រួលៈ​បំណង​/​ហាណូយ​(ST)៖ បណ្តា​រោងចក្រ​វៀតណាម​ដែល​ផលិត​អ្វីៗ​គ្រប់យ៉ាង​ចាប់តាំងពី​ស្បែកជើង​រហូតដល់​ស្វាត​ហ្វូន រំពឹងថា​នឹង​បន្ត​ដំណើរការ​ផលិតកម្ម ទោះជា​ការឆ្លង​ជំងឺ​កូវី​ដ​១៩​ប្រចាំ​​ថ្ងៃ​កើន​ដល់​កំពិត​ខ្ពស់បំផុត​ជា​បន្តបន្ទាប់​នៅ​ប៉ុន្មាន​ថ្ងៃ​មកនេះ ដោយ​មិន​អនុវត្ត​វិធានការ​បិទ​ខ្ទប់​ទូទៅ​ដែល​ប្រទេស​នេះ​បាន​អនុវត្ត​កាលពី​ឆ្នាំ​មុន​ដល់​ថ្នាក់​ធ្វើ​អោយ​ស្ទះ​ខ្សែសង្វាក់​ផ្គត់ផ្គង់​សំរាប់​​បណ្តា​អ្នក​លក់រាយ​នៅ​លោកខាងលិច​។​

​ជា​ទីផ្សារ​កាត់ដេរ​ធំ​បំផុត​មួយ​របស់​ពិភពលោក វៀតណាម​បាន​រាយការណ៍​ចំនួន​ឆ្លងកូវី​ដ​១៩​ថ្មី​ជាង​២៦.០០០​កាលពី​ថ្ងៃអាទិត្យ​ទី​១៣​កុម្ភៈ ឬ​ប្រមាណ​ពីរដង​នៃ​ការឆ្លង​ខ្ពស់បំផុត​កាលពី​ឆ្នាំមុន​នៅពេល​​បណ្តា​រោងចក្រ​ដែល​ផ្គត់​ផ្គត់​ទំនិញ​ម៉ាក​Nike , Zara, Apple និង Samsung ត្រូវ​បង្ខំ​អោយ​បិទទ្វារ​អស់​ពេល​រាប់​ខែ​។​តែ​មិន​ដូច​កាល​ពី​ប្រាំបួន​ខែ​មុន​ពេល​វីរុស​ដែល​តា​វាយប្រហារ​រាតត្បាត​​ពេញ​ប្រជាជន​ដែល​មិន​បាន​ចាក់​វ៉ាក់សាំង​ភាគច្រើន​នោះ​ទេ ឥឡូវ​កម្មករ​រោងចក្រ​រាប់លាន​នាក់​បាន​ចាក់​វ៉ាក់សាំង​ការពារកូ​វីដ​១៩​បាន​ពេញលេញ ហើយ​វីរុស​អូ​មី​ក្រុង​ក៏​ហាក់​មិន​កាច​សាហាវ​ដូច​ដែល​តា​​ដែរ​។​

​ដាង ឌឹ​ក អាញ់ ( Dang Duc Anh)​នាយក​វិទ្យាស្ថាន​អនាម័យ​និង​ជំងឺឆ្លង​ជាតិ បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័​រថា «​ហានិភ័យ​នៃ​ការបិទ​ខ្ទប់​ទូទៅ​ទាប​ណាស់​នៅ​ឆ្នាំនេះ នៅពេល​វៀតណាម​បាន​អនុវត្ត​យុទ្ធនាការ​ចាក់​វ៉ាក់សាំង​កូវី​ដ​១៩​ដោយ​ជោគជ័យ​»​។​

​សូមបញ្ជាក់​ថា វៀតណាម​បាន​បន្ធូរបន្ថយ​ការ​រឹតត្បិត​ប្រឆាំង​កូវី​ដ​១៩​នៅ​ប៉ុន្មាន​ខែ​មកនេះ ដោយ​សាលា​រៀន​បាន​បើក​ឡើង​វិញ​កាលពី​សប្តាហ៍​មុន​ហើយ​រដ្ឋាភិបាល​បាន​និយាយ​កាលពី​ថ្ងៃអាទិត្យ​ថា​ខ្លួន​​នឹង​ដក​ចេញ​ការ​រឹតត្បិត​លើ​ជើងហោះហើ​រដឹក​អ្នកដំណើរ​អន្តរជាតិ​ទាំងអស់​ចាប់ពី​ថ្ងៃ​១៥​កុម្ភៈ​ស្អែក​ទៅ​។​

​ក្រសួង​សុខាភិបាល​វៀត​ណា​ម​ក្នុងពេល​ជាមួយ​គ្នា​និយាយ​ថា ប្រជាជន​វៀតណាម​ជាង​៧៦​ភាគរយ​បាន​ចាក់​វ៉ាក់សាំង​កូវី​ដ​១៩​បាន​យ៉ាងតិច​ពី​រដូស ។​

​អាដាម ស៊ីតកូ​ហ្វ (Adam Sitkoff)​ប្រធានសភា​ពាណិជ្ជកម្ម​អាម៉េរិក​ប្រចាំ​ក្រុង​ហាណូយ ដែល​តំណាង​ធុរកិច្ច​អាម៉េរិក​នៅ​វៀតណាម រំពឹង​ថា​វៀតណាម​ឆ្នាំ​២០២២​នឹង​ល្អ​ប្រសើរ​ឡើង​។​លោក​ថា «​ខ្ញុំ​មិន​​រំពឹងថា​នឹង​ឃើញ​ការបិទ​ខ្ទប់​ទូទាំងប្រទេស​ថែម​ទៀត​ទេ​នៅពេល​ការ​ឆ្លងកូវី​ដ​១៩​ភាគច្រើន​នៃ​ប្រទេស​នេះ​ស្ថិតក្នុង​កំរិត​អាច​ចាត់ចែង​បាន​ហើយ​អាជ្ញាធរ​បាន​រៀន​បទពិសោធន៍​ពី​ការ​រឹតបន្តឹង​ដែល​ធ្វើ​​អោយ​ប៉ះពាល់​សេដ្ឋកិច្ច​ដែល​មិន​អាច​អនុវត្ត​យូរអង្វែង​បាន​»​។​

​រដ្ឋាភិបាល​ក្រុង​ហាណូយ​កំពុង​កំណត់​គោលដៅ​កំណើនសេដ្ឋកិច្ច​៦​ដល់​៦,៥​ភាគរយ​នៅ​ឆ្នាំនេះ ដោយ​កើន​ពី​២,៥​ភាគរយ​កាលពី​ឆ្នាំ​២០២១​។​

​ប្រតិបត្តិការ​រោងចក្រ​ដ៏​រលូន​នៅ​វៀតណាម ដែល​ជា​កន្លែង​នាំ​ចេញ​ស្បែកជើង​និង​សម្លៀក​បំពាក់​ធំ​បំផុត​ទី​២​សំរាប់​ទីផ្សារ​អាម៉េរិក​បន្ទាប់​ពី​ចិន ក៏​នឹង​ជួយ​រំដោះ​ការជាប់គាំង​ខ្សែសង្វាក់​ផ្គត់ផ្គង់​ដែល​​កំពុង​រុញអោយ​អតិផរណា​កើនឡើង​នៅ​ទូទាំង​ពិភពលោក​។​

​ឌឹ​ក មិញ ង្វៀន នៅ​ក្រុមហ៊ុន​គណនេយ្យ​EY​បាន​និយាយថា «​បើសិន​វៀតណាម​រក្សា​សមត្ថភាព​ផលិតកម្ម​និង​ទិន្នផល​រោងចក្រ​រឹងមាំ វា​នឹង​ពិតជា​គាំទ្រ​ខ្សែសង្វាក់​ផ្គត់ផ្គង់​សកល ជាពិសេស​ក្នុង​វិស័យ​ដូចជា​​កសិកម្ម វាយ​ន​ភណ្ឌ​និង​គ្រឿង​ប្រើប្រាស់​អេឡិចត្រូនិច​»​។​

​សូមបញ្ជាក់​ថា នៅ​មួយ​ទសវត្សរ៍​មក​នេះ វៀតណាម​បាន​លេចធ្លោ​ឡើង​ជា​មជ្ឈមណ្ឌល​ផលិតកម្ម​ជំរើស​ដ៏​ទាក់ទាញ​មួយ​សំរាប់​ក្រុមហ៊ុន​ដែល​ស្វែង​កាត់បន្ថយ​ការពាក់ព័ន្ធ​នឹង​ចិន​។​និន្នាការ​នេះ​រំពឹងថា​នឹង​​បន្ត បើសិនជា​វៀតណាម​នៅ​អាច​ដោះស្រាយ​បាន​ជាមួយនឹង​ការវាយប្រហារ​ពី​កូវី​ដ​១៩​នៅ​រលក​បច្ចុប្បន្ន ហើយ​រដ្ឋាភិបាល​ក្រុង​ប៉េកាំង​នៅ​រក្សា​ការបិទ​ខ្ទប់​យ៉ាង​តឹងរ៉ឹង​ដើម្បី​លុបបំបាត់​ការឆ្លង​នៅ​នឹង​​កន្លែង​។​

​រ៉ា​ហ្វា​អែល ម៉ុក​(Raphael Mok) ប្រធាន​អង្គការ​Fitch Solutions​ប្រចាំ​វៀតណាម​បានន​និយាយថា «​វៀតណាម​នឹង​ក្លាយជា​អ្នក​ទទួលផល​ដ៏​ធំ​មួយ​ពី​ការផ្លាស់ប្តូរ​ទីតាំង​ខ្សែសង្វាក់​ផលិតកម្ម​​ជា​ពិសេស​ពាក់ព័ន្ធ​នឹង​ការ​រើ​ទីតាំង​ផលិតកម្ម​ចេញពី​ចិន ។​

​កាលពី​ខែ​កញ្ញា​ឆ្នាំមុន ពេល​ការបិទ​ខ្ទប់​កើតមាន​ពេញបន្ទុក បណ្តា​ក្រុមហ៊ុន​អាជីវកម្ម​បានចាប់ផ្តើម​ពិចារណា​រើ​ទីតាំង​ផលិតកម្ម​ទៅកាន់​កន្លែង​ផ្សេង​។​ឥឡូវ​កម្មករ​រោងចក្រ​៩០​ភាគរយ​បាន​វិល​មក​​ធ្វើការ​ក្រោយ​ការ​ឈប់សម្រាក​ចូលឆ្នាំថ្មី​។​កម្មករ​ដែល​ទទួល​ប្រាក់ខែ​ជា​មធ្យម​៣៣០​ដុល្លារ រំពឹង​ទូទាត់​ចំណូល​ដែល​បាត់បង់​ពី​ការបិទ​រោងចក្រ​កាលពី​ឆ្នាំមុន​៕

​វៀតណាម​ជា​កន្លែង​នាំចេញ​ស្បែកជើង​និង​សម្លៀកបំពាក់​ធំ​បំផុត​ទី​២​សំរាប់​ទីផ្សារ​អាម៉េរិក បន្ទាប់​ពី​ចិន​