ដោយៈតារារិទ្ធ/ភ្នំពេញ​៖ សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា​បានប្រកាស​ពីការពេល ជួបជុំ​ជាមួយ​សិស្ស​និទ្ទេស​អេ​( A) ដែល​គ្រោង​នឹងធ្វើ​នៅ​ថ្ងៃទី​២៨ កុម្ភៈ ឆ្នាំ​២០២២ ខាងមុខ​ ទៅ​ពេល​ក្រោយ​វិញ ​ដោយសារ​កូ​វីដ​-១៩ មេរោគ​បំប្លែង​ថ្មី​ឈ្មោះថា អូ​មី​ក្រុង បាន​នឹង​កំពុង​រីក​រាលដាល​នៅ​ទីក្រុង​ភ្នំពេញ។នៅថ្ងៃនេះ ក្រសួងសុខាភិបាលបានប្រកាសថា នៅកម្ពុជាមានអ្នកឆ្លងមេរោគបំប្លែងថ្មីជាង៥០០ នាក់ឯណោះ។

លើបណ្តាញសង្គមហ្វេ​ស​ប៊ុ​ក​ផ្លូវការ​របស់​សម្តេចតេជោ​នៅ​ល្ងាច​ថ្ងៃទី​១៤ ខែកុម្ភៈ ឆ្នាំ​២០២២​នេះ ​​សម្ដេ​តេជោបានបញ្ជាក់​ ដូច្នេះ​ថា “​ដោយសារ​កូ​វីដ​-១៩ មេរោគ​បំប្លែង​ថ្មី​ឈ្មោះថា អូ​មី​ក្រុង​បាន​នឹង​កំពុង​រីក​រាលដាល នៅ​ទីក្រុង​ភ្នំពេញ​។ ដើម្បី​សុវត្ថិភាព សម្រាប់​ចៅៗ​សិស្ស​និទ្ទេស​អេ​( A) និង​អ្នកចូលរួម ខ្ញុំ​សម្រេចចិត្ត​លើក​ពេល នៃ​ការជួបជុំ​ជាមួយ​សិស្ស​និទ្ទេស A ដែល​គ្រោង​ធ្វើ​នៅ​ថ្ងៃ​២៨ កុម្ភ​: ឆ្នាំ​២០២២ ទៅ​ពេល​ក្រោយ​វិញ​”​។​សម្ដេច​តេ​ជោបាន​បន្តថា រក្សា​ជីវិត និង​សុខភាព គឺ​កិច្ចការ​ចម្បង​របស់​យើងទាំងអស់គ្នា​នាពេលនេះ​។ រក្សាបាន​ជីវិត និង​មាន​សុខភាព​ល្អ មិន​ខ្វះ​ទេ​ពេលវេលា​នៃ​ការជួបជុំ​។​សម្ដេច​សង្ឃឹមថា ចៅៗ និង​ក្រុមគ្រួសារ​នឹងមាន ការយោគយល់​នូវ​ការលំបាក​នេះ ។​

​សូម​រំលឹកថា កាលពី​ព្រឹក​ថ្ងៃទី​៧ ខែកុម្ភៈ កន្លងទៅ​នៅក្នុង​ពិធី​សម្ពោធ​កំណាត់​ផ្លូវជាតិ​លេខ​៧​ប្រវែង​សរុប ៩៣,៥៦​គីឡូម៉ែត្រ ពី​រង្វង់​មូល​ខ្លា​ស្ទុះ ស្ថិតក្នុង​ភូមិ​កា​ប៉ូ សង្កាត់​អូរឫស្សី ក្រុង​ក្រចេះ ទៅ​ភូមិ​រមាត ឃុំ​អូរ​គ្រៀង ស្រុក​សំបូរ ខេត្តក្រចេះ សម្តេច​តេ​ជោ ហ៊ុន សែន បានប្រកាស​យក​ថ្ងៃទី​២៨ ខែ​កម្ភៈ ដើម្បី​ជួប​ជាមួយ​សិស្ស ដែល​ប្រលង​ជាប់​និទ្ទេស A ជាង​មួយ​ពាន់​នាក់​។ សម្ដេច​បានបញ្ជាក់​ថា ដំបូង​សម្ដេចចង់​រៀបចំ​ឱ្យមាន​ជំនួប​ជាមួយ​សិស្ស​និទ្ទេស A ដោយផ្ទាល់​ត្រឹមតែ​រាជធានី​ភ្នំពេញ និង​ខេត្តកណ្ដាល​ ហើយ​សម្រាប់​ខេត្ត​ផ្សេងៗ និង​ជួប​តាម​អន​ឡាញ តែដោយសារ​ឆ្នាំនេះ មាន​សិស្ស​និទ្ទេស A ច្រើន ជាង​ឆ្នាំមុនៗ រហូតដល់​ជាង ១.៧០០​នាក់ ។ដូចនេះ​សម្ដេច បាន​អនុញ្ញាតឱ្យ​សិស្ស​និទ្ទេស A ទាំង​ជាង ១.៧០០​នាក់ ចូលជួប​សម្ដេច​នៅ​ភ្នំពេញទាំងអស់គ្នា​តែម្ដង នៅ​ថ្ងៃទី​២៨ ខែកុម្ភៈ ដោយ​ខាង​ខេត្ត​ត្រូវ​រៀបចំ​ទាំង​ការធ្វើដំណើរ និង​ការ​ស្នាក់នៅ​របស់​សិស្សនិង​អាណាព្យាបាល​សិស្ស ។​

​គួរបញ្ជាក់ដែរថា នៅ​ថ្ងៃទី​១៤​ខែកុម្ភៈ​នេះ​ក្រសួងសុខាភិបាល​បានចេញ​សេចក្តី​ជូន​ព័ត៌មានស្តីពី​ការសរុប​ស្ថានភាព​ជំងឺ​កូ​វីដ​-១៩ ក្នុង​ព្រះរាជាណាចក្រ​កម្ពុជា​សម្រាប់​ថ្ងៃទី​១៣ ខែកុម្ភៈ​ថា មាន​ករណី​ឆ្លង​ថ្មី ៥១២​នាក់ (​លទ្ធផល​បញ្ជា​ក់ដោយ PCR),ករណី​ជាសះស្បើយ ១៥៦​នាក់​តែ​មិនមាន​ករណី​ស្លាប់​ទេ​៕សរន