​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អគ្គលេខាធិការ​អង្គការសហប្រជាជាតិ​លោក អង់​តូ​នីញ៉ូ គូថេ​រ៉េស បាន​និយាយ​កាលពី​ថ្ងៃ​ចន្ទ​ទី​១៤​កុម្ភៈ​ថា​លោក​មាន​ការព្រួយបារម្ភ​យ៉ាងខ្លាំង​អំពី​ភាព​​តានតឹង​ដែល​កើនឡើង​ជុំវិញ​អ៊ុ​យក្រែន និង “​ការរំពឹង​ខ្ពស់​ឡើង​” អំពី​ជម្លោះ​យោធា ដោយ​ជំរុញ​ឱ្យ​មេដឹកនាំ​ពិភពលោក​បង្កើន​ទំនាក់ទំនង​ការទូត​ដើម្បី​ធ្វើឱ្យ​ស្ថានភាព​ស្ងប់ស្ងាត់​។​

​លោក​បាន​ប្រាប់​អ្នកយក​ព័ត៌មាន​បន្ទាប់​ពី​ទទួលទាន​អាហារ​ថ្ងៃត្រង់​ជាមួយ​ឯកអគ្គរដ្ឋទូត​របស់​ក្រុមប្រឹក្សាសន្តិសុខ​អ​.​ស​.​ប​ថា​”​យើង​មិន​អាច​ទទួលយកបាន​សូម្បី​តែ​លទ្ធភាព​នៃ​ការប្រឈមមុខគ្នា​​ដ៏​មហន្តរាយ​បែបនេះ​”​។​

​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀរ ហ្សេ​លេន​ស្គី (Volodymyr Zelenskiy)​បាន​និយាយ​កាលពី​ថ្ងៃ​ចន្ទ​ថា លោក​បាន​ឮ​ថា​ថ្ងៃ​ពុធ​អាចជា​ថ្ងៃ​នៃ​ការឈ្លានពាន​របស់​រុស្ស៊ី​។ រុស្ស៊ី​បាន​លើកឡើង​ថា ខ្លួន​ត្រៀម​រួចជាស្រេច​ក្នុង​ការបន្ត​ពិភាក្សា​ជាមួយ​លោក​ខាងលិច ដើម្បី​ព្យាយាម​ដោះស្រាយ​វិបត្តិ​សន្តិសុខ ខណៈ​សហរដ្ឋ​អាម៉េរិក​បាន​និយាយថា ទីក្រុង​មូ​ស្គូ​កំពុង​បន្ថែម​សមត្ថភាព​យោធា​របស់​ខ្លួន​។​

​លោក​គូថេ​រ៉េស​បាន​និយាយថា “​ពេលវេលា​នេះ​គឺ​ដើម្បី​បំបាត់​ភាព​តានតឹង​និង​បន្ថយ​សកម្មភាព​តានតឹង​នៅនឹងកន្លែង​។ មិន​មាន​កន្លែង​សម្រាប់​វោហា​សាស្ត្រ​បញ្ឆេះ​កំហឹង​នោះទេ​។ សេចក្តីថ្លែងការណ៍​ជា​សាធារណៈ​គួរតែមាន​គោលបំណង​កាត់បន្ថយ​ភាព​តានតឹង មិនមែន​ធ្វើ​ឱ្យ​ឆាបឆេះ​កំហឹង​នោះទេ​”​។​

​កាលពី​ព្រឹក​ថ្ងៃ​ចន្ទ លោក​គូថេ​រ៉េស​បាន​និយាយដា​ច់ដោ​យ​ឡែក​ជាមួយ​រដ្ឋមន្ត្រី​ការបរទេស​នៃ​ប្រទេស​រុស្ស៊ី​និង​អ៊ុ​យក្រែន ហើយ​លោក​បាន​ប្រាប់​អ្នកសារព័ត៌មាន​ថា លោក​នឹង​បន្ត​”​ចូលរួម​យ៉ាង​ពេញ​​លេញ​គ្រប់​ម៉ោង​និង​គ្រប់​ថ្ងៃ​ខាងមុខ​”​។​

​លោក​គូថេ​រ៉េស​បាន​សង្កត់ធ្ងន់ថា ធម្មនុញ្ញ​របស់​អង្គការសហប្រជាជាតិ​តម្រូវ​ឱ្យ​រដ្ឋ​ជា​សមាជិក​ទាំងអស់​”​រក្សា​ភាព​អត់ធ្មត់​ក្នុង​ទំនាក់ទំនង​អន្តរជាតិ​របស់​ពួកគេ​ពី​ការគំរាមកំហែង​ឬ​ការប្រើប្រាស់​កម្លាំង​​ប្រឆាំង​នឹង​បូរណភាព​ទឹកដី ឬ​ឯករាជ្យភាព​នយោបាយ​នៃ​រដ្ឋ​ណាមួយ​”​។​

​លោក​គូថេ​រ៉េស​បាន​និយាយថា “​ការបោះបង់​ការទូត​សម្រាប់​ការប្រឈមមុខ​ដាក់​គ្នា មិនមែន​ជា​ជំហាន​ហួស​ខ្សែបន្ទាត់​នោះទេ វា​គឺជា​ការ​លោត​ចុះ​ពី​ជ្រោះ​។ និយាយ​ឱ្យ​ខ្លី​ទៅ ការអំពាវនាវ​របស់​ខ្ញុំ​គឺ កុំ​ធ្វើ​ឱ្យ​បាត់បង់​បុព្វហេតុ​សន្តិភាព​”​។​

​អ្នកនាំពាក្យ​អ​.​ស​.​ប លោក ស្តេ​ហ្វេន ឌួ​ចារិក (Stephane Dujarric) បាន​និយាយ​កាលពី​ថ្ងៃ​ចន្ទ​ថា អ​.​ស​.​ប​មិន​មាន​គម្រោង​ជម្លៀស​ឬ​ផ្លាស់​ទី​បុគ្គលិក​ជាង ១.៦០០​នាក់​ចេញពី​អ៊ុយ​ក្រែន​នោះទេ ដែល​ក្នុងនោះ​មាន​បុគ្គលិក​បរទេស ២២០​នាក់​និង​អ៊ុយ​ក្រែន​ជាង ១.៤០០​នាក់​៕

​អគ្គលេខាធិការ​អង្គការសហប្រជាជាតិ​លោក អង់​តូ​នីញ៉ូ គូថេ​រ៉េស​