​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ រដ្ឋមន្ត្រីការបរទេស​អាម៉េរិក​លោក អ៊ែន​ថូ​នី ប្លីង​កិន បាន​និយាយ​កាលពី​ថ្ងៃ​ចន្ទ​ទី​១៤​កុម្ភៈ​ថា​សហរដ្ឋ​អាម៉េរិក​កំពុង​រើ​ទីតាំង​ប្រតិបត្តិការ​ស្ថានទូត​របស់ខ្លួន​​នៅ​អ៊ុយ​ក្រែន​ពី​រដ្ឋធានី​គៀវ​ទៅ​កាន់​ទីក្រុង​អេ លី​វីវ (Lviv)​ភាគ​ខាងលិច ដោយ​លើកឡើង​ពី “​ការបង្កើន​ល្បឿន​យ៉ាង​ខ្លាំង​ក្នុង​ការកសាង​កងកម្លាំង​របស់​រុស្ស៊ី​”​។​

​ចំណាត់ការ​នេះ​កើត​ឡើង​នៅ​ពេល​ដែល​ក្រុមមន្ត្រី​អាម៉េរិក​បាន​ព្រមាន​ថា ទីក្រុង​មូ​ស្គូ​កំពុងបន្ត​ប្រមូលផ្តុំ​កងទ័ព​ជាង ១០០.០០០ នាក់​នៅ​ជិត​ព្រំដែន​រុស្ស៊ី​ជាមួយ​អ៊ុយ​ក្រែ​ន​និង​នៅ​ប្រទេស​បេឡា​រូ​ស​​ជិតខាង ហើយ​អាច​ធ្វើ​ការវាយប្រហារ​ដ៏​បំផ្លិចបំផ្លាញ​គ្រប់ពេល រួម​ទាំង​ទីក្រុង​គៀវ​ផងដែរ​។

​ទោះជា​យ៉ាងណា​ទីក្រុង​មូ​ស្គូ​បដិសេធ​ការចោទប្រកាន់​របស់​លោក​ខាងលិច​ថា ខ្លួន​កំពុង​រៀបចំ​ផែនការ​ឈ្លានពាន​។​

​អ្នកនាំពាក្យ​ក្រសួងការបរទេស​អាម៉េរិក​លោក ណេ​ត ប្រា​យ (Ned Price)​បាន​ប្រាប់​សន្និសីទ​សារព័ត៌មាន​មួយ​ថា “​ការ​លុកលុយ​ចូល​អ៊ុយ​ក្រែន​អាច​នាំមក​នូវ​អំពើហិង្សា​ដ៏​ធំ ការបំផ្លិចបំផ្លាញ​ដ៏​ធំ និង​ការបាត់បង់​អាយុជីវិត​នឹង​មិន​មាន​ការរើសអើង​នោះ​ទេ​រវាង​ជនជាតិ​អាម៉េរិក អ៊ុ​យក្រែន ឬ​អ្នក​ផ្សេង​ទៀត​”​។​

​លោក​ប្លីង​កិន​បាន​និយាយ​នៅក្នុង​សេចក្តីថ្លែងការណ៍​មួយ​ថា ការសម្រេចចិត្ត​រើ​ប្រតិបត្តិការ​របស់​ស្ថានទូត​ទៅ​កាន់​ទីក្រុង​អេ លី​វីវ ដែល​មាន​ចម្ងាយ​ប្រហែល ៨០​គីឡូម៉ែត្រ​ពី​ព្រំដែន​ភាគ​ខាងលិច​​នៃ​ប្រទេស​អ៊ុយ​ក្រែន​ជាមួយ​ប៉ូឡូញ ត្រូវបាន​ធ្វើ​ឡើង​ចេញ​ពី​ការព្រួយបារម្ភ​ចំពោះ​សុវត្ថិភាព​របស់​បុគ្គលិក​។​

​បុគ្គលិក​ស្ថានទូត​ភាគច្រើន​ត្រូវបាន​បញ្ជា​ឱ្យ​ចាកចេញ​ពី​អ៊ុ​យក្រែន ហើយ​ពលរដ្ឋ​អាម៉េរិក​ត្រូវបាន​ណែនាំ​ឱ្យ​ចាកចេញ​ពី​ប្រទេស​នេះ​តាម​មធ្យោបាយ​ពាណិជ្ជកម្ម​។​

​លោក​ប្លីង​កិន​បាន​និយាយថា ការ​រើ​ទីតាំង​ប្រតិបត្តិការ​ស្ថានទូត​មិន​បាន​ធ្វើឱ្យ​ខូច​ដល់​ការគាំទ្រ​របស់​សហរដ្ឋ​អាម៉េរិក​សម្រាប់ “​អធិបតេយ្យភាព និង​បូរណភាព​ទឹកដី​”​របស់​អ៊ុយ​ក្រែន​នោះ​ទេទោះ​​តាម​វិធី​ណាក៏ដោយ ហើយ​ថា​អ្នកការទូត​អាម៉េរិក​នឹង “​បន្ត​ចូលរួម​” ជាមួយ​រដ្ឋាភិបាល​អ៊ុ​យក្រែន​។​

​លោក​បាន​និយាយថា សហរដ្ឋ​អាម៉េរិក​កំពុង​បន្ត​ដាក់​សម្ពាធ​លើ​ទីក្រុង​មូ​ស្គូ​សម្រាប់​ដំណោះស្រាយ​ការទូត​។​

​ទោះយ៉ាងណា លោក​ប្រាយ​បាន​ប្រាប់​អ្នកយកព័ត៌មាន​ថា ពួក​យើង​មិន​ច្បាស់​ទេ​ថា​តើ​រុស្ស៊ី​ចាប់អារម្មណ៍​ក្នុង​ការបន្ត​ផ្នែក​ការទូត​ឬ​អត់​។​

​លោក​បាន​និយាយថា ទីក្រុង​វ៉ាស៊ីនតោន​បាន​កត់សម្គាល់​នូវ​សម្តី ដែល​រដ្ឋមន្ត្រីការបរទេស​រុស្ស៊ី​លោក សឺ​ហ្គី ឡាវ​រ៉ូវ (Sergei Lavrov)​បាន​ធ្វើឡើង​នៅក្នុង​កិច្ចប្រជុំ​តាម​ទូរទស្សន៍​ជាមួយ​ប្រធានាធិបតី​​រុស្ស៊ី​លោក វ្ល៉ា​ឌី​មៀរ ពូ​ទីន ថា ទីក្រុង​មូ​ស្គូ​នឹង​ជំរុញ​កិច្ចខិតខំ​ប្រឹងប្រែង​ការទូត​ដើម្បី​ទាញ​យក​ការធានា​សន្តិសុខ​ពី​លោកខាងលិច​។​

​លោក​ប្រាយ​បន្តថា “​អ្វី​ដែល​យើង​មិន​បាន​កត់សម្គាល់​នោះ​គឺ ការបង្ហាញ​ពី​ការបន្ថយ​ភាព​តានតឹង​” ដោយ​កងកម្លាំង​រុស្ស៊ី​។​

​លោក​បាន​និយាយថា ការ​រើ​ទីតាំង​ប្រតិបត្តិការ​ស្ថានទូត​គឺ​ផ្អែក​លើ​ការវាយតម្លៃ “​នៃ​អ្វីដែល​យើង​កំពុងតែ​ឃើញ​នៅនឹងកន្លែង​ដោយ​ភ្នែក​របស់​យើង​ផ្ទាល់ ដែល​ជា​ការបង្កើន​ទ័ព​របស​រុស្ស៊ី​ជា​បន្ត​និង​​ដ៏​បង្កហេតុ​”​។​

​លោក​បាន​និយាយថា “​វា​គឺជា​លទ្ធភាព​ពិសេស ប្រហែល​ជាក់ស្តែង​ជាង​ពេលមុនៗ ដែល​រុស្ស៊ី​អាច​នឹង​សម្រេច​ចិត្ត​ធ្វើ​សកម្មភាព​យោធា​”​។​

​លោក​បាន​និយាយថា អ្នកការទូត​កំពូល​អាម៉េរិក​ប្រចាំ​ប្រទេស​អ៊ុ​យក្រែន គឺ​ភារធារី គ្រីស្ទី​ណា ខេ​វិន (Kristina Kvien) នឹង​ធ្វើការ​ពី​ទីក្រុង​លី​វី​វ ហើយ​ស្ថានទូត​អាម៉េរិក​នៅ​ទីក្រុង​គៀវ​នឹង​ត្រូវបាន​ការពារ​ដោយ​ប៉ូលិស​ឆ្មាំ​ជាតិ​អ៊ុ​យក្រែន​៕

​ស្ថានទូត​អាម៉េរិក​នៅ​ទីក្រុង​គៀវ​ត្រូវ​បិទទ្វារ​ស្ងាត់ឈឹង ហើយ​នឹង​ត្រូវ​បាន​ការ​ពារ​ដោយ​ប៉ូលិស​ឆ្មាំ​ជាតិ​អ៊ុ​យក្រែន​