​ដោយៈ សុ​ផានី​តា / កោះកុងៈ ប្រជាពលរដ្ឋ រស់នៅ​ក្នុងភូមិ​ព្រលាន និង​ភូមិ​តាំ​កន់ ឃុំ​កណ្តោល ត្រៀម​ទទួលបាន​ដី​ឡូ​តិ៍​ម្នាក់ ១​ប្លង់ ទំហំ​៥០​គុណ​នឹង​៥០​ម៉ែត្រ ពី​រដ្ឋបាល ខេត្តកោះកុង និង​ស្រុក​បូ​ទុម​សាគរ ដើម្បី​អាច​បង្កបង្កើនផល​កសិក​ម្ម ទៅតាម​តម្រូវការ​។​

​លោក ហាក់ ឡេង អភិបាលស្រុក​បូ​ទុម​សាគរ បានឱ្យ​រស្មី​កម្ពុជា ដឹង​នៅ​ព្រឹក ថ្ងៃទី​១៥ ខែកុម្ភៈ ឆ្នាំ​២០២២​ថាៈ ក្រុមការងារ​ជំនាញ​របស់លោក កំពុង​ចុះ​ត្រួតពិនិត្យ និង​បោះបង្គោល កំណត់​ត្រួសត្រាយ ព្រំ​ជា​ដី​ឡូ​តិ៍ សម្រាប់​បែងចែក​ពលរដ្ឋ ប្រមាណ ៦០០ គ្រួសារ​។​

​លោក ហាក់ ឡេង បាន​បន្ថែមថាៈ ការកំណត់​ព្រំដី​ឡូ​តិ៍ ត្រៀម​ចាប់ឆ្នោត​បែងចែក​ដី ក្នុង​១​ឡូ​តិ៍ ៥០​គុណ​នឹង​៥០​ម៉ែត្រ នាពេល​ឆាប់ៗ ខាងមុខនេះ ក្នុងន័យ​លើកកម្ពស់​ជីវភាព និង​បង្កបង្កើនផល​កសិកម្ម របស់​ពលរដ្ឋ ដែលមាន​តម្រូវការ​លើ​ផ្ទៃដី សរុប​ជាង ៣០០ ហិកតា ស្ថិតនៅ​ចំណុច​ទំនប់​ទប់ទឹក​ប្រៃ ក្រោយ​ដី​នោះ ត្រូវបាន​រាជរដ្ឋាភិបាល​ល​កម្ពុជា ឆ្វៀល​ចេញពី​តំបន់​ការងារ​ធម្មជាតិ​។​

​លោក​អភិបាលស្រុក​បូ​ទុម​សាគរ បាន​បន្តថាៈ ដ្បិត​មាន​ផ្ទៃដី ៣០០ ហិកតា ពិតមែន ប៉ុន្តែ​មិនមែន​បែងចែក​ជូន ប្រជាពលរដ្ឋ​ទាំងអស់​នោះដែរ ពោលគឺ រៀបចំ​ដី​ទុក​សម្រាប់ កសាង​មណ្ឌល​សុខភាព ទីលាន​ចាក់សំរាម តារាង​បាល់ទាត់​ស្រុក និង​រក្សា​ទុកជា​ដី សម្បទាន​សង្គមកិច្ច ដោះស្រាយ ទៅ​ថ្ងៃ​អនាគត​។​

​គួរ​ជម្រាប​ដែរ​ថា ផែនការ​បែងចែក​ដីធ្លី ជូន​ប្រជាពលរដ្ឋ​នេះ ពុំមែន​ទើបតែ​ធ្វើឡើង ប៉ុន្មាន​ថ្ងៃនេះ​ទេ ជាក់ស្តែង អាជ្ញាធរ​ខេត្តកោះកុង និង​ស្រុក បាន​គិតគូរ​យកចិត្ត​ទុកដាក់ ដោះស្រាយ​ជូន ប្រជាពលរដ្ឋ ជាង ១ ឆ្នាំ​មកហើយ​។ ដូច្នេះ​អាជ្ញាធរ ស្នើសុំ​ដល់​ពលរដ្ឋ ក្នុង​មូលដ្ឋាន បញ្ឈប់​សកម្មភាព តវ៉ា​ទាមទារ​ដីធ្លី ខុសច្បាប់ បន្តទៅទៀត ក្រោម​ការ​ញុះញង់ របស់​ជនខិលខូច ឬ​សកម្មជន​បក្សនយោបាយ ប្រឆាំង​ដែលនាំឱ្យ មានទោស ជា​ធរមាន​៕/V​