ប្រែ​សម្រួល : ញា​ដា​លី​ស (​ដេល្លីម៉េ​ល​) ៖ អ៊ីរ៉ង់​កាលពី​ថ្ងៃ​ចន្ទ​ទី​១៤​កុម្ភៈ​បាន​និយាយថា ការឯកភាព​គ្នា​មួយ​ដើម្បី​ស្តារឡើងវិញ​នូវ​កិច្ចព្រមព្រៀង​នុយក្លេអ៊ែរ​ឆ្នាំ ២០១៥ ជាមួយ​មហាអំណាច​ពិភពលោក​គឺ “​ជិត​កើតឡើង​ហើយ​” ប៉ុន្តែ​បាន​ទទូច​ថា​ទណ្ឌកម្ម​ត្រូវតែ “​ដកចេញ​” យ៉ាង​ពិតប្រាកដ​តាមរយៈ​កិច្ចពិភាក្សា​ដែល​កំពុង​បន្ត​នៅ​ទីក្រុង​វី​យែន​។​

​បន្ទាប់​ពី​ការចរចា​មិន​ជាប់លាប់​អស់​រយៈពេល​ជា​ច្រើន​ខែ ប្រធាន​គោលនយោបាយ​ការបរទេស​របស់​សហ​ភាព​អឺរ៉ុប​លោក ចូសេប ប័រ​រ៉ែល (Josep Borrell) បាន​និយាយ​អំពី​ក្តីសង្ឃឹម​នៃ​កិច្ចព្រមព្រៀង​ថ្មី​មួយ​។​

​លោក​បាន​និយាយ​នៅលើ Twitter បន្ទាប់​ពី​ការហៅ​ទូរស័ព្ទ​ជាមួយ​រដ្ឋមន្ត្រី​ការបរទេស​អ៊ីរ៉ង់​ថា “​ខ្ញុំ​ជឿជាក់​យ៉ាង​មុតមាំ​ថា កិច្ចព្រមព្រៀង​មួយ​កំពុង​ជិត​មក​ដល់​ហើយ​”​។​

​លោកប័​ររ៉ែ​លបាននិយាយ​នៅក្នុង​សមត្ថភាព​ទ្វេ​របស់​គាត់​ក្នុងនាម​ជា​អ្នកសម្របសម្រួល​នៃ​ផែនការ​សកម្មភាព​ទូលំទូលាយ​រួម (JCPOA)​ពោល​ជា​កិច្ចព្រមព្រៀង​ដែល​យល់ព្រម​រវាង​អ៊ីរ៉ង់​និង​មហាអំណាច​​ពិភពលោក​ក្នុង​ឆ្នាំ​២០១៥ យ៉ាង​ដូច្នេះ​ថា “​ពេលវេលា​បាន​មក​ដល់​ហើយ​ដើម្បី​ធ្វើ​កិច្ចខិតខំ​ប្រឹងប្រែង​ចុង​ក្រោយ​និង​ឈាន​ដល់​ការសម្រុះសម្រួល​”​។​

​ប៉ុន្តែ​ប្រធានាធិបតី​អ៊ីរ៉ង់​លោក អ៊ីប្រាហ៊ីម រ៉ៃ​ស៊ី (Ebrahim Raisi) ដែល​បាន​ទទួល​រដ្ឋមន្ត្រីការបរទេស​និង​រដ្ឋមន្ត្រី​ការពារ​ជាតិ​អៀរ​ឡង់ លោក សាយ​ម៉ុន ខូ​វេនី (Simon Coveney)​កាលពី​​ថ្ងៃ​ចន្ទ បាន​និយាយថា “​ទណ្ឌកម្ម​ត្រូវតែ​ដក​ចេញ​យ៉ាង​ពិតប្រាកដ​” នៅក្នុង​ការចរចា​ដែល​កំពុង​បន្ត ដើម្បី​សង្គ្រោះ​កិច្ចព្រមព្រៀង​។​

​លោក​បាន​បន្ថែមថា “​សិទ្ធិ​របស់​ប្រជាជន​អ៊ីរ៉ង់​ត្រូវតែ​គោរព​”​។​

​កិច្ចពិភាក្សា​នេះ​មាន​ការចូលរួម​ពី​អ៊ីរ៉ង់ អង់គ្លេស ចិន បារាំង អាល្លឺម៉ង់ និង​រុស្ស៊ី​ដោយផ្ទាល់ និង​សហរដ្ឋ​អាម៉េរិក​ដោយ​ប្រយោល​។​

​កិច្ចព្រមព្រៀង​ឆ្នាំ ២០១៥ បានផ្តល់​ការបន្ធូរបន្ថយ​ទណ្ឌកម្ម​ដល់​ទី​ក្រុងតេអេ​រ៉ង់ ជា​ថ្នូរ​នឹង​ការទប់ស្កាត់​កម្មវិធី​នុយក្លេអ៊ែរ​របស់ខ្លួន ប៉ុន្តែ​សហរដ្ឋ​អាម៉េរិក​បាន​ដកខ្លួន​ចេញ​ជា​ឯកតោភាគី​ក្នុង​ឆ្នាំ ២០១៨ ក្រោម​ការដឹកនាំ​របស់​អតីត​ប្រធានាធិបតី​ដូណាល់ ត្រាំ និង​បានដាក់​ទណ្ឌកម្មសេដ្ឋកិច្ច​ឡើងវិញ​ដោយ​ជំរុញ​ឱ្យ​ទី​ក្រុងតេអេ​រ៉ង់​ចាប់ផ្តើមងាក​ទៅរ​កការប្តេជ្ញា​ចិត្ត​របស់​ខ្លួន​ឡើងវិញ​។​

​អ្នកនាំពាក្យ​ក្រសួងការបរទេស​អាម៉េរិក​លោក ណេ​ត ប្រា​យ (Ned Price) បាន​និយាយប្រាប់​យ៉ាង​អ្នកយកព័ត៌មាន​ប្រុងប្រយ័ត្ន​កាលពី​ល្ងាច​ថ្ងៃ​ចន្ទ​យ៉ាង​ដូច្នេះ​ថា​”​យើង​នឹង​មាន​កាលៈ​​ទេសៈ​បន្ថែម​ទៀត​នៅក្នុង​លក្ខខណ្ឌ​នៃ​វឌ្ឍនភាព​ដែល​យើង​អាច​មើលឃើញ​នៅ​នឹង​កន្លែង​នៅ​ទីក្រុង​វី​យែន​។ ពេល​វេលា​ជិត​អស់ហើយ​”៕

​ប្រធានាធិបតី​អ៊ីរ៉ង់​លោក អ៊ីប្រាហ៊ីម រ៉ៃ​ស៊ី (​ស្តាំ​) និង​រដ្ឋមន្ត្រី​ការបរទេស​អៀរ​ឡង់ លោក សាយ​ម៉ុន ខូ​វេនី (​ឆ្វេង​) ពិភាក្សា​គ្នា​នៅ​ទី​ក្រុងតេអេ​រ៉ង់​កាលពី​ថ្ងៃ​ចន្ទ​