​ប្រែ​សម្រួល : កញ្ញា​ដា​លី​ស (​បាល់ទាត់​) ៖ នៅ​រាត្រី​ថ្ងៃ​អង្គារ​នេះ​មាន​ការប្រកួត UEFA Champions League វគ្គ​១៦ ក្រុម​ចុងក្រោយ ដែល​គេ​ទន្ទឹង​រង់ចាំ​យ៉ាង​យូរ​។ វា​ជា​ជំនួប​រវាង PSG និង Real Madrid ដែល​នឹង​ធ្វើឱ្យ​ប្រិយមិត្ត​ស្នេហា​បាល់ទាត់​មាន​អារម្មណ៍​រំភើប​ជាងគេ ដោយហេតុ​ថា​ពួកគេ​ជា​ក្រុម​យក្ស​នៅ​បារាំង​និង​អេ​ស្ប៉ាញ​ដូចគ្នា​។ ចំណែក Man City ដែល​ធ្វើដំណើរ​ទៅ​ទឹកដី​ក្រុម Sporting Lisbon របស់​ព័រ​ទុយ​ហ្គាល់ រំពឹង​ទទួលបាន​លទ្ធផល​ល្អ​ជា​ទី​គាប់ចិត្ត​បំផុត​។

​ដោយឡែក​នៅ​ក្របខ័ណ្ឌ English Premier League ឯណោះ​វិញ ក៏​មាន​ការប្រកួត​បង្គ្រប់​ជុំ​មួយគូ​ផងដែរ គឺ​រវាង Man U និង Brighton​ដោយ​បច្ចុប្បន្ន​គូ​នេះ​មាន​ស្ថានភាព​លេង​​ស្រដៀង​គ្នា យើង​រំពឹង​ពួក​គេ​លេង​ត្រឹម​ស្មើគ្នា​ប៉ុណ្ណោះ​។

​យើង​នឹង​វិភាគ​ជូន​២​គូ​ក្នុង​ក្របខ័ណ្ឌ CL ៖

– PSG vs Real Madrid

PSG មាន​ក្រុម​មួយ​ស្រដៀង​នឹង​តួអង្គ​ក្នុង​រឿង Avengers ដែល​ដាក់​មក​ចេញ​មក​គឺ​ដើម្បី​ដណ្តើម​ជើងឯក​អឺរ៉ុប ប៉ុន្តែ​ការយល់ឃើញ​ជា​ទូទៅ​គឺ​ថា លោក ម៉ូ​រី​ស៊ី​អូ ផូ​ឆេត​ទីណូ (Mauricio Pochettino) នៅតែ​មិន​ទាន់​អាច​រៀបចំ​ក្រុម​ឱ្យ​ខ្លាំង​ដូចក្តី​សុបិន​របស់​គាត់​នៅឡើយ​ទេ​។​

​ត្បិត​លី​ក​កំពូល​បារាំង​មាន​ភាពងាយស្រួល​ជាង​លី​ក​ធំៗ​ដទៃ​ទៀត​ក៏​ពិតមែន ប៉ុន្តែ PSG មិន​ទាន់​បង្ហាញ​ភាព​លេចធ្លោ ដែល​គេ​រំពឹង​ទុក​ពី​ពួក​គេ​នៅឡើយ​ទេ​។​

​ពួកគេ​បាន​បន្ត​ឈ្នះ​ការប្រកួត​ក្នុងស្រុក​ក៏ពិតមែន ប៉ុន្តែ​ចំណុច​សំខាន់​គឺ​ថា​តើ​ពួកគេ​អាច​យកឈ្នះ​លើ​ក្រុម​ចាស់វស្សា​ដូចជា Real Madrid បាន​ឬ​អត់​។​

​កូនក្រុម​របស់លោក កា​ឡូ​ស អាន់​សេ​ឡូ​ទី កំពុង​ធ្វើ​បាន​ល្អ​បំផុត​ក្នុងប្រទេស​អេ​ស្ប៉ាញ​ក្នុងរ​ដូវ​កាលនេះ​។ គាត់​បានប្រែក្លាយ​កីឡាករ វី​នី​សៀ​ស ជូនៀ ទៅ​ជា​កំពូល​កីឡាករ​សំខាន់​បំផុត​របស់​ស្តេច​ស ហើយ​បាន​ធ្វើឱ្យ​កីឡាករ​ជើងចាស់​ដូចជា លូ​កា ម៉ូ​ទ្រិក និង តូ​នី គ្រូ​ស បញ្ចេញ​សមត្ថភាព​ខ្លាំងក្លា​មិន​នឹកស្មាន​ដល់ ត្បិត​មាន​វ័យ​ចំណាស់​ជាងគេ​ក្នុង​ក្រុម​ក៏ដោយ​។​

​ស្តេច​ស Real Madrid នឹង​អវត្តមាន​ខ្សែប្រយុទ្ធ​ស្រួច ការី​ម បិ​ន​ហ្សេ​ម៉ា ដោយសារ​របួស ប៉ុន្តែ​ក្រុម​នេះ​មាន​សន្ទុះ​និង​ទេពកោសល្យ​គ្រប់គ្រាន់​ដើម្បី​យកឈ្នះ​លើ​ក្រុម PSG ដែល​មិន​ទាន់​រកឃើញ​ទម្រង់​លេង​ពិតប្រាកដ​របស់​ខ្លួន​នៅឡើយ​។​

​ប្រវត្តិ​ជួបគ្នា​
– ជួបគ្នា ៥ លើកចុងក្រោយ មាន​គ្រាប់​បាល់​ស៊ុត​ចូលគ្នា​លើសពី ៣ គ្រាប់​ឡើងទៅ​។​
– ជួប​គ្នា​លើក​ចុងក្រោយ​ស្មើគ្នា ២-២​។​
– Real Madrid កត់ត្រា​ជ័យជម្នះ ៥ ដង​ក្នុង​ជំនួប ៧ លើកចុងក្រោយ​ជាមួយ PSG​។​
– តាំងពី​ឆ្នាំ ១៩៩៣ មក PSG ឈ្នះ​នៅ​ទឹកដី​ខ្លួន​ឯង​លើ​ស្តេច​ស​តែ​ម្តង​គត់​។​

​ផ្អែក​លើ​ចំណុច​ទាំងនេះ យើង​រំពឹង Real Madrid ធ្វើ​បាន​ល្អ​ជាង និង​ទទួល​ជ័យជម្នះ​ក្នុង​លទ្ធផល​ទស្សន៍ទាយ ០-២​។

– Sporting Lisbon vs Manchester City

Manchester City គឺជា​ក្រុម​រំពឹង​ឈ្នះ​ខ្លាំង​បំផុត​ក្នុងពេល​ជួប​ជាមួយ Sporting Lisbon នៅ​ថ្ងៃ​អង្គារ​នេះ ខណៈ​លោក ប៉េប ហ្គាឌី​អូ​ឡា កំណត់​គោលដៅ​លើ​កពាន Champions League ជា​លើកដំបូង​ជាមួយនឹង​ក្រុម​មេឃ​ខៀវ​។​

Sporting ឡើង​មក​វគ្គ​នេះ​ចេញពី​ពូ​ល​ងាយស្រួល​ជាងគេ ប៉ុន្តែ​ចាញ់​រហូត ៣ ដង គឺ​ចាញ់ Ajax ពីរដង និង Dortmund ម្តង ខណៈ​ឈ្នះ​បី​ដង បាន​ជាប់​លេខ ២ ក្នុង​ពូ​ល​។​

​នេះ​ទើបតែ​ជា​ការបង្ហាញ​ខ្លួន​លើក​ទី​ពីរ​របស់​ពួកគេ​នៅ Champions League វគ្គ ១៦ ក្រុម​ចុង​ក្រោយ​ប៉ុណ្ណោះ​។ ពួកគេ​ត្រូវបាន​ក្រុម Bayern Munich ទម្លាក់​ក្នុង​ដំណាក់កាល​នេះ​ក្នុង​រដូវ​កាល ២០០៨/០៩​។​

​បច្ចុប្បន្ន​ពួកគេ​កំពុង​មាន​ទម្រង់​លេង​ល្អ​និង​ឈរ​លេខ​២​ក្នុង​លី​ក​ព័រ​ទុយ​ហ្គាល់ តាម​ពីក្រោយ​ក្រុម Porto​។​

​ចំណែក ក្រុម​មេឃ​ខៀវ​ឈរ​នៅ​លេខ​១​ក្នុង​ពូ​ល​នាំមុខ​លើ​ក្រុម PSG ។ ទោះយ៉ាងណា ពួកគេ​បាន​ចាញ់​ការប្រកួត​ក្រៅ​ដី​ចំនួន​ពីរលើក ដោយ​ដំបូង​គឺ​ចាញ់​នៅ PSG និង​បន្ទាប់មក​នៅ Leipzig ។​

​ក្រុម​ជើងឯក​អង់គ្លេស​នេះ​គឺជា​ក្រុម​រំពឹង​ឈ្នះ​ពាន CL ក្នុង​រដូវ​កាល​នេះ​គ្មានអ្វី​ត្រូវ​ងឿងឆ្ងល់​នោះទេ ហើយ​ពួកគេ​ត្រៀម​ខ្លួន​យ៉ាង​បានល្អ​ក្នុង​ការរក្សាពាន Premier League នៅក្នុង​យុទ្ធនាការ​បច្ចុប្បន្ន​ផងដែរ បន្ទាប់ពី​បាន​នាំមុខ ១២ ពិន្ទុ​លើ​គូប្រជែង​កៀក​បំផុត Liverpool កាលពី​ចុង​សប្តាហ៍​។​

Manchester City ដែល​ចាញ់​ការប្រកួត​វគ្គ​ផ្តាច់ព្រ័ត្រ​កាល​ពី​រដូវ​កាល​មុន​ក្រោម​ថ្វីដៃ​គូប្រជែង​ក្នុងស្រុក Chelsea គឺ​មាន​ហាងឆេង​ចាក់ ១ សង ៥,៥ ក្នុង​ការលើក​ពាន Champions League នៅ​រដូវ​កាល​នេះ​។​

​ប្រវត្តិ​ជួបគ្នា

– ក្រុម​ទាំង​ពីរ​ជួបគ្នា​២​ដង​ក្នុង​ក្របខ័ណ្ឌ Europa League រដូវ​កាល ២០១១/១២ ដោយ​ឈ្នះ​ម្នាក់​ម្តង​ក្នុង​លទ្ធផល ១-០ និង ២-៣​។
– Sporting មាន​កំណត់ត្រា​ល្អ​ក្នុង​ទឹកដី​ទល់នឹង​ក្រុម​អង់គ្លេស ដោយ​ឈ្នះ ៧ ដង​ក្នុង​ជំនួប ១១ លើក​។
– Man City ធ្លាប់​ទៅ​ទឹកដី​ក្រុម​ព័រ​ទុយ​ហ្គាល់ ៤ ដង គឺ​ឈ្នះ ១ ស្មើ ២ ចាញ់ ១​។

​ក្រុម​ទាំង​ពីរ​កំពុង​មាន​ទម្រង់​លេង​ល្អ​ដូច​គ្នា​នៅ​លី​ក​ក្នុងស្រុក​រៀងៗ​ខ្លួន ប៉ុន្តែ​បើ​ប្រៀបធៀប​កម្រិត​លេង​របស់​លី​ក​ទាំងពីរ គឺ​លី​ក​អង់គ្លេស​មាន​កម្រិត​ខ្ពស់​ជាង​ព័រ​ទុយ​ហ្គាល់​ឆ្ងាយ​ណាស់​។

​លោក​ប៉េប ហ្គាឌី​អូ​ឡា នឹង​មិន​ឱ្យ​ភ្លាត់​ស្នាត់ចាញ់​ប្រកួត​នេះឡើយ ។ លទ្ធផល​ព្យាករណ៍ Man City ឈ្នះ ៤-១៕

Man City រំពឹង​ឈ្នះ Sporting ងាយៗ​នៅ​យប់​ថ្ងៃ​អង្គារ​នេះ