​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ មន្ត្រីជាន់ខ្ពស់​នៃ​អង្គការ​ស្បៀងអាហារ​និង​កសិកម្ម​របស់​អង្គការសហប្រជាជាតិ (FAO) បាន​និយាយ​កាលពី​ថ្ងៃ​ចន្ទ​ទី​១៤​កុម្ភៈ​ថា​គ្រោះរាំងស្ងួត​នៅ​តំបន់​ស្នែង​​អាហ្វ្រិក​បាន​សម្លាប់សត្វ​ពាហនៈ​ជាង ១,៥ លាន​ក្បាល និង​កាត់បន្ថយ​ផលិតកម្ម​ធញ្ញជាតិ​យ៉ាងច្រើន “​ហើយ​ឥឡូវនេះ​យើង​ពិតជា​កំពុង​នៅលើ​មាត់ជ្រោះ​នៃ​គ្រោះមហន្តរាយ​”​។​

​លោក រេ​ន ផូល​សិន (Rein Paulsen) នាយក​ផ្នែក​គ្រាអាសន្ន​និង​ភាព​ធន់រ​បស់ FAO ដែល​បាន​ត្រឡប់​មកពី​តំបន់​នេះ​កាលពី​ថ្ងៃ​សុក្រ បាន​និយាយថា “​ឱកាស​មាន​តូច​ណាស់​”​ដើម្បី​ចាត់​វិធាន​​ការ​បន្ទាន់ ហើយ​គន្លឹះ​មួយ​គឺ​ថា​តើ​ភ្លៀង​ធ្លាក់​ដ៏​យូរ​ក្នុង​តំបន់​រវាង​ខែ​មីនា​និង​ឧសភា​គឺ​ល្អ​ឬ​អត់ និង​ថា​តើ​ទីភ្នាក់ងារ​នេះ​ទទួលបាន​ជំនួយ​ចាំបាច់ ១៣០​លាន​ដុល្លារ​ដែល​ខ្លួន​ត្រូវការ​រហូតដល់​ខែមិថុនា​​ឬ​អត់​។​

​លោក​បាន​និយាយថា ភ្លៀង​កក់ខែ​នៅក្នុង​តំបន់ ដែល​រួមមាន​ផ្នែក​ខ្លះ​នៃ​ប្រទេស​សូ​ម៉ាលី អេត្យូ​ពី និង​កេន​យ៉ា ត្រូវបាន​សន្មត់​ថា​មក​ដល់​នៅ​ចន្លោះ​ខែ​តុលា​និង​ខែ​ធ្នូ ប៉ុន្តែ “​មាន​កម្រិត​ខ្សោយ​ខ្លាំងណាស់​។ ហើយ​នេះ​តំណាងឱ្យ​ការខកខាន​រដូវវស្សា​លើក​ទី​បី​ជាប់​គ្នា ដែល​ទាំងអស់​នេះ​មាន​ផលប៉ះពាល់​យ៉ាងធ្ងន់ធ្ងរ​ដល់​គ្រួសារ​ដែល​ងាយ​រងគ្រោះ​”​។​

​លោកផូ​លសិន​បាន​និយាយថា លទ្ធផល​នៃ​គ្រោះរាំងស្ងួត​មានន័យថា​ផលិតកម្ម​ធញ្ញជាតិ​ទាំងមូល​សម្រាប់​រដូវ​ភ្លៀង​ចុង​ក្រោយ​នៅ​ភាគ​ខាងត្បូង​ប្រទេស​សូ​ម៉ាលី​ត្រូវ​បាន​ប៉ាន់ប្រមាណ​ថា​ទាប​ជាង​មធ្យម​​ភាគ​រយៈពេល​វែង ៥៨ ភាគរយ​។ លោក​បាន​បន្តថា​នៅ​តំបន់​កសិកម្ម​តាម​មាត់​សមុទ្រ​នៅ​ភាគ​អាគ្នេយ៍​នៃ​ប្រទេសកេន​យ៉ា “​យើង​កំពុង​សម្លឹង​មើល​ឃើញ​ផលិតកម្ម​ដំណាំ​មាន​កម្រិត​ទាប​ជាង​មធ្យម ៧០ ភាគរយ​”​។​

​គាត់​បាន​និយាយ​ក្នុងអំឡុង​សន្និសីទ​សារព័ត៌មាន​តាម​អន​ឡាញ​ពី​ទីក្រុង​រ៉ូម​ថា លើសពីនេះ ប្រភពទឹក​ភាគច្រើន ដែល​ជា​ធម្មតា​មាន​ភាព​ធន់​នឹង​ការប្រែប្រួល​អាកាសធាតុ​បាន​រីងស្ងួត​នៅក្នុង​ប្រទេស​​កេន​យ៉ា​។​

​លោកផូ​លសិន​និយាយថា ការផ្តល់​មូលនិធិ​ចំនួន ១៣០ លាន​ដុល្លារ​គឺ​មាន​សារៈសំខាន់​នៅពេលនេះ ដើម្បី​ផ្តល់​សាច់ប្រាក់​សម្រាប់​ប្រជាជន​ទិញ​អាហារ​រហូតដល់​ផលិតកម្ម​ចាប់ផ្តើម​ឡើង​វិញ ដើម្បី​រក្សា​សត្វ​ចិញ្ចឹម​ឱ្យ​នៅ​រស់ និង​ដើម្បី​ផ្តល់​គ្រាប់ពូជ​ដែល​ធន់​នឹង​គ្រោះរាំងស្ងួត​សម្រាប់​កសិករ​ក្នុង​ការប្រមូល​ផល​៕

​សត្វ​ចំនួន ១,៥ លាន​ក្បាល​ងាប់​ដោយសារ​គ្រោះរាំងស្ងួត​នៅ​តំបន់​ស្នែង​អាហ្វ្រិក