​ប្រែ​សម្រួលៈ​បំណង​(VnExpress)៖​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​ឡេន​ស្គី (Volodymyr Zelenskiy)​បាន​អំពាវនាវ​អោយ​ប្រជាជន​មួយ​ប្រទេស​ដោត​ទង់ជាតិ​និង​ច្រៀង​ចម្រៀង​​ជាតិ​ដើម្បី​បង្ហាញ​ការឯកភាព​និង​សាមគ្គី​ជាតិ​នៅ​ថ្ងៃ​១៦​កុម្ភៈ ជា​ថ្ងៃ​ដែល​ប្រព័ន្ធ​ផ្សព្វផ្សាយ​លោកខាងលិច​និយាយថា រុស្ស៊ី​អាច​ចូល​ឈ្លានពាន​។

​ទោះជា​យ៉ាងណា ពួក​មន្ត្រី​រដ្ឋាភិបាល​អ៊ុយ​ក្រែន​មិន​បាន​បញ្ជាក់ថា លោក​ហ្សេ​ឡេន​ស្គី ទាយ​ទុក​ថា​ការវាយប្រហារ​មួយ​នឹង​កើតឡើង​ន​ថ្ងៃ​ពុធ​ទី​១៦​កុម្ភៈ​នេះ​ទេ តែ​លោក​ធ្វើការ​អំពាវនាវ​ដូច្នេះ​ដើម្បី​ឆ្លើយ​​តប​ទៅ​នឹង​របាយការណ៍​ក្នុង​សារព័ត៌មាន​បរទេស​។​

​លោក​ប្រធានាធិបតី​បាន​និយាយ​ក្នុង​សុន្ទរកថា​ថត​ផ្សាយ​ទៅកាន់​ប្រជាជាតិ​ថា « ពួក​គេ​ប្រាប់​យើង​ថា​ថ្ងៃ​១៨​កុម្ភៈ​នឹង​ជា​ថ្ងៃ​វាយប្រហារ​។​យើង​ចាត់ទុក​វា​ជា​ទិវា​ឯកភាព​ជាតិ​។​ពួកគេ​កំពុង​បំភ័យ​យើង​​ដោយ​កំណត់​ថ្ងៃ​ចាប់ផ្តើម​នៃ​ចំណាត់ការ​យោធា​។​នៅថ្ងៃនោះ យើង​នឹង​ដោត​ទង់ជាតិ លើក​បដា​ពណ៌​លឿង​ខៀវ និង​បង្ហាញ​ពិភពលោក​នូវ​ឯកភាព​ជាតិ​យើង​»​។​

​លោក ហ្សេ​ឡេន​ស្គី បាន​និយាយថា​លោក​ជឿ​ង​ថា​រុស្ស៊ី​កំពុង​គំរាម​វាយប្រហារ​ប្រទេស​របស់​លោក តែ​ការចូល​ឈ្លានពាន​ក្នុងពេល​ឆាប់ៗ​ទំនងជា​ត្រូវ​បណ្តា​ប្រទេស​សម្ពន្ធមិត្ត​បំផ្លើស​។​

​មី​ខាយ​ឡូ ប៉ូ​ដូល​យ៉ា​ក​(Mykhailo Podolyak)​ទីប្រឹក្សា​របស់​នាយសេនាធិកា​រកង​ទ័ព​របស់​ហ្សេ​ឡេន​ស្គី បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័​រថា លោក​ប្រធានាធិបតី​ឆ្លើយតប​នឹង​របាយការណ៍​​សារព័ត៌មាន​ដែល​អាច​ជា​ការ​ចំអក​ទាក់ទង​នឹង​កាលបិច្ឆេទ​នៃ​ការចូល​ឈ្លានពាន​។​«​ហេតុ​ដូច្នេះ​ហើយ​បានជា​ប្រជាជន​អ៊ុយ​ក្រែន​ហាក់​មិន​មាន​ជំនឿ​ទាំងស្រុង​អំពី​កាលបរិច្ឆេទ​ជាក់លាក់​នៃ​អ្វីដែល​​ហៅថា​” ការចាប់ផ្តើម​ការឈ្លានពាន ” ប្រកាស​ឡើង​ដោយ​សារព័ត៌មាន​លោកខាងលិច​…»​។​

​ការិយាល័យ​របស់​លោក​ហ្សេ​ឡេន​ស្គី បាន​ចេញ​ក្រិត​មួយ​ដោយ​អំពាវនាវ​អោយ​គ្រប់​ភូមិ​និង​ទីប្រជុំជន​ដោត​ទង់ជាតិ​នៅ​ថ្ងៃ​ពុធ​និង​អំពាវនាវ​អោយ​ប្រជាជន​មួយ​ប្រទេស​ច្រៀង​ចម្រៀង​ជាតិ​នៅ​ម៉ោង​១០​ព្រឹក​ថ្ងៃ​១៦​កុម្ភៈ​។​វា​ក៏​សុំ​អោយ​ដំឡើង​ប្រាក់ខែ​ទាហាន​និង​ឆ្មាំ​ព្រំដែន​ផង​ដែរ​។​

​ទាហាន​អ៊ុយ​ក្រែ​ននឹង​ត្រូវ​ដំឡើង​ប្រាក់​ខែ ចំ​ពេល​មាន​ការ​គំរាម​វាយ​ចូល​ពី​សំ​ណា​ក់កងកម្លាំង​រុស្ស៊ី​

​ពួក​មន្ត្រី​អាម៉េរិក​បាន​និយាយថា ពួកគេ​មិន​ព្យាករណ៍​អំពី​ការវាយប្រហារ​បញ្ជា​ឡើង​ដោយ​ប្រធានាធិបតី វ្ល៉ា​ឌី​មៀ ពូ​ទីន នៅ​ថ្ងៃ​ជាក់លាក់​ណាមួយ​ទេ តែ​បាន​ធ្វើ​ការព្រមាន​ជា​ថ្មី​ថា វា​អាច​កើត​ឡើង​នៅ​​ពេល​ណាមួយ​។​

​កាលពី​ថ្ងៃ​ចន្ទ រុស្ស៊ី​បាន​និយាយថា ខ្លួន​នឹង​បន្ត​ពិភាក្សា​ជាមួយ​លោក​ខាងលិច​ដើម្បី​ព្យាយាម​បន្ថយ​វិបត្តិ​សន្តិសុខ​។​រដ្ឋាភិវាល​ក្រុង​មូ​ស្គូ​អះអាងថា ការ​ដែល​អ៊ុយ​ក្រែន​ស្វះស្វែង​សុំ​ចូល​ជា​សមាជិក​អង្គការ​ណា​តូ​​វា​បង្ក​ការ​គំរាម​មួយ​ដល់​ខ្លួន​។​ទោះជា​ណា​តូ​មិនទាន់​ទទួលយក​អ៊ុ​យក្រែន ក៏​បណ្តា​ប្រទេស​លោកខាងលិច ជាពិសេស​អាម៉េរិក​បាន​និយាយថា​ពួកគេ​មិន​អាច​ចរចា​អំពី​សិទ្ធិ​អធិបតេយ្យភាព​របស់​ប្រទេស​ណា​​មួយ​ក្នុង​ការបង្កើត​សម្ពន្ធភាព​ទេ​៕

​ក្នុង​រូប អធិការបតី​អាឡឺម៉ង់​បាន​ជួបពិភាក្សា​ជាមួយ​លោក​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​ឡេន​ស្គី​នៅ​ទីក្រុង​គៀ​វ​កាលពី​ថ្ងៃ​ចន្ទ​។​អធិការបតី​អាឡឺម៉ង់​ត្រូវ​ចេញដំណើរ​ទៅ​ទីក្រុង​មូ​ស្គូ​នៅ​​ថ្ងៃ​អង្គារ​ដើម្បី​ជួប​ពិភាក្សា​ជាមួយ​លោក ពូ​ទីន​