ដោយៈ​រ៉ា​ម៉ន​/​ភ្នំពេញៈ នៅ​ព្រឹក​ថ្ងៃទី​១៥​ខែកុម្ភៈ ឆ្នាំ​២០២២​នេះ លោក ហែម ដា​រិ​ទ្ធិ អភិបាលខណ្ឌ​ពោធិ​សែន​ជ័យ និង​មន្ត្រី​ជំនាញ ក្រោម​ឱវាទ អញ្ជើញ​ប្រគល់​វិញ្ញាបនបត្រ​សម្គាល់​ម្ចាស់​អចលនវត្ថុ ជូនទៅ​ដល់ដៃ​ប្រជាពលរដ្ឋ​ចំនួន​២៥៨​គ្រួសារ ស្ថិត​ក្នុងភូមិ ត្រពាំង​ថ្លឹង​៣ ក្នុង​សង្កាត់​ចោមចៅ​ទី​១ ខណ្ឌ​ពោធិ៍​សែន​ជ័យ ដើម្បី​យកទៅ​រក្សា​ទុកដាក់ និង​ប្រើប្រាស់​ទៅតាម​តម្រូវការ​។​

​ក្នុង​ពិធី​ប្រគល់​វិញ្ញាបនបត្រ​សម្គាល់​ម្ចាស់​អចលនវត្ថុ​នោះ លោក ហែម ដា​រិ​ទ្ធិ បាន​បញ្ជាក់ថា នេះ​មិនមែនជា​លើកដំបូង​ទេ សម្រាប់​ខណ្ឌ​ពោធិ​សែន​ជ័យ ដែល​បានប្រគល់​វិញ្ញាបនបត្រ​សម្គាល់​ម្ចាស់​អចលនវត្ថុ​នេះ ជូនទៅ​ប្រជាពលរដ្ឋ​ក្នុង​មូលដ្ឋាន​របស់ខ្លួន ហើយក៏​នឹង​រៀបចំ​ផ្តល់ជូន​ជា​បន្តបន្ទាប់​ទៀត​សម្រាប់​អ្នក​មិនទាន់​ទទួលបាន​វិញ្ញាបនបត្រ​សម្គាល់​ម្ចាស់​អចលនវត្ថុ​នេះ​។

​គិត​មកដល់ពេលនេះ រដ្ឋបាល​ខណ្ឌ​ពោធិ៍​សែន​ជ៍យ បានប្រគល់​វិញ្ញាបនបត្រ​សម្គាល់​ម្ចាស់​អចលនវត្ថុ​ជូន​ប្រជាពលរដ្ឋ​បាន​ប្រមាណ​ជិត​១០០​ភាគរយ​ហើយ​។ នៅសល់តែ​បងប្អូន​ប្រជាពលរដ្ឋ ដែលមាន​បញ្ហា​ទំនាស់​ក្នុង​គ្រួសារ ឬ មាន​បញ្ហា​ជាមួយ​សម្បត្តិ​សាធារណ​និង​ជាប់​អនុ​ក្រិ​ត្យ​ជាដើម យ៉ាងណា​អាជ្ញាធរ​ខណ្ឌ​បាននិងកំពុង​ខិតខំ​ប្រឹងរក​ដំណោះស្រាយ​និង​ស្នើសុំ​ទៅ​ថ្នាក់លើ​ដើម្បី​ធ្វើ​បណ្ណ​ជូន​ឱ្យបាន​គ្រប់​ក្រុមគ្រួសារ​។

​លោក​អភិបាល​បញ្ជាក់ទៀតថា សម្រាប់​ប្រជាពលរដ្ឋ​មានទំនាស់ ហើយ​បាន​ដោះស្រាយ​គ្នា​រួចរាល់​ហើយ​នោះ សុំ​ទំនាក់ទំនង​មក​មន្ត្រី​ជំនាញ ដើម្បី​រៀបចំ​ឯកសារ ផ្តល់ជូន​ទៅតាម​ស្ថានភាព​ជាក់ស្តែង​៕​