​ដោយៈ ប​.​ជ័យ / បាត់ដំបងៈ កិច្ចប្រជុំ​មួយ​ដែល​ដឹកនាំ​លោក​សុខ លូ អភិបាលខេត្ត​បាត់ដំបង នៅ​ព្រឹក​ថ្ងៃ ទី​១៥ ខែកុម្ភៈ ឆ្នាំ​២០២២ បាន​ផ្តោត​ការណែនាំ​អនុវត្ត​ផែនការ​ធ្វើ​ឲ្យ​ប្រសើរឡើង​នូវ​សោភ័ណភាព បរិស្ថាន អនាម័យ​ទូទាំង​ខេត្តបាត់ដំបង ដោយមាន​ការអញ្ជើញ​ចូលរួម​ពី​សំណាក់ លោក​អភិបាលរង​ខេត្ត លោក​លោកស្រី​អភិបាល អភិបាលរងក្រុង​ស្រុក​ទាំង​១៤ លោក លោកស្រី​ជា​ប្រធាន និង​អនុប្រធាន​មន្ទីរ​អង្គភាព​ពាក់ព័ន្ធ​ជុំវិញ​ខេត្ត ព្រមទាំង​អ្នកពាក់ព័ន្ធ​មួយចំនួនទៀត​ផងដែរ ។​

​លោក​ប្រធាន អនុប្រធាន​មន្ទីរ អភិបាលរង​ស្រុក ក្រុង​មួយចំនួន​លើកឡើង​ពី​ចំណុចខ្លាំង ខ្សោយ​និង​គន្លឹះ​ដើម្បីអោយ​ការងារ​នៅ​នេះ​បានសម្រេច​ដូច​ផែនការ​។​

​​នាឱកាសនោះលោក​អភិបាលខេត្ត​បានលើកឡើងថា ខេត្តបាត់ដំបង ជា​ខេត្ត​មាន​ដែល​ល្បី មាន​ប្រជាប្រិយ​ឈ្មោះ​បោះ​សម្លេង ហើយ​នរណាៗ​ក៏​នៅតែ​ចង់​មក​ទស្សនា​កំសាន្ត ប្រកប​របរ​រកស៊ី​ធ្វើការ​។​
​ដូច្នេះ​លើ​គ្រប់​វិស័យ រួមទាំង​វិស័យ​ខាងលើ លោកអ្នក​គ្រប់គ្នា​ត្រូវតែ​បន្ត​រួមគ្នា​គិត រួមគ្នា​ធ្វើ រួមគ្នា​ទទួលខុសត្រូវ​ដើម្បី​ខេត្តបាត់ដំបង​កាន់តែ​មាន​ការរីកចម្រើន សោភ័ណភាព បរិស្ថាន​ល្អ​ថែមទៀត ៕​