​ដោយៈ​សុខុម​/​ស្ទឹងត្រែងៈ​ពិធី​ផ្លាស់ប្ដូរ​ប្រធាន​និង​អនុប្រធាន​ពន្ធនាគារ​ខេត្តស្ទឹងត្រែង​គ្រោង​នឹង​រៀបចំឡើង​នៅ ថ្ងៃទី​១៧​ខែកុម្ភៈ​ក្នុង​សប្តាហ៍​នេះ​។​នេះ​បើតាម​ការបញ្ជាក់​របស់​មន្ត្រី​សាលាខេត្ត​ប្រាប់​រស្មី​កម្ពុជា​នៅ​ថ្ងៃទី​១៥​ខែកុម្ភៈ​ឆ្នាំ​២០២២​នេះ​។​

យោង​តាម​សេចក្តីប្រកាស​របស់​ក្រសួងមហាផ្ទៃ​បាន​ឲ្យ​ដឹងថា​អគ្គនាយកដ្ឋាន​ពន្ធនាគា​រ​បានសម្រេច​ផ្លាស់ប្ដូរ​ប្រធាន អនុប្រធាន​ពន្ធនាគារ​ខេត្តស្ទឹងត្រែង​ចំនួន​ប្រាំ​នាក់​ឲ្យ​ទៅ​បម្រើ​ការងារ​ថ្មី​នៅ​អគ្គនាយកដ្ឋាន​ពន្ធនាគា​រ​។​

​សេចក្តីប្រកាស​ឲ្យ​ដឹងថា​ទីមួយ​.​លោក​ឧ​ត្ត​ម​អគ្គា​អនុរក្ស​ថ្នាក់​លេខ​២ ឈុន ដា​រ៉ា ពី​ប្រធាន​ពន្ធនាគារ​ខេត្តស្ទឹងត្រែង​ឱ្យទៅ​បម្រើ​ការងារ​ថ្មី​នៅ​អគ្គនាយកដ្ឋាន​ពន្ធនាគា​រ​។​ទី​ពីរ​.​លោក​ឧ​ត្ត​ម​អគ្គា​អនុរក្ស​ថ្នាក់​លេខ​៣ រស់ សុធា ឱ្យទៅ​បម្រើ​ការងារ​នៅ​អគ្គនាយកដ្ឋាន​ពន្ធនាគា​រ​។​ទី​បី​.​លោក​វីរៈ​អគ្គា​អនុរក្ស​ថ្នាក់​លេខ​១ ជា សុជាតិ ពី​អនុប្រធាន​ពន្ធនាគារ​ខេត្តស្ទឹងត្រែង​ឱ្យទៅ​បម្រើ​ការងារ​នៅ​អគ្គនាយកដ្ឋាន​ពន្ធនាគា​រ​។​
ទី​បួន​.​លោក​វីរៈ​អគ្គា​អនុរក្ស​ថ្នាក់​លេខ​១ ប៉ិន សំ​អូន ពី​ប្រធានការិយាល័យ​បណ្ដុះបណ្ដាល​វិជ្ជាជីវៈ​និង​មុខរបរ​ពន្ធនាគារ​ខេត្តស្ទឹងត្រែង​ឲ្យ​ទៅ​បម្រើការ​នៅ​នៅ​អគ្គនាយកដ្ឋាន​ពន្ធនាគា​រ​និង​ទី​ប្រាំ​.​លោក​អគ្គានុរក្ស​ថ្នាក់​លេខ​១ លាង សំអឿន ពី​ប្រធាន​ផ្នែក​ទិន្នន័យ​និង​បណ្ណសារ​នៃ​ពន្ធនាគារ​ខេត្ត​ឱ្យទៅ​បម្រើ​ការងារ​នៅ​អគ្គនាយកដ្ឋាន​ពន្ធនាគា​រ​។​

រីឯ​ការតែងតាំង​មន្ត្រី​ពន្ធនាគារ​ថ្មី​ចំនួន​ពរ​រូប​គឺ​លោក​ឧ​ត្ត​ម​អគ្គានុរក្ស​ថ្នាក់​លេខ ៣ ប្រាជ្ញ សុ​ភី ឲ្យ​កាន់​មុខតំណែង​ជា​ប្រធាន​ពន្ធនាគារ​ខេត្តស្ទឹងត្រែង​។​លោក​វរៈ​អគា​នុ​រក្ស​ថ្នាក់​លេខ​១ រិ​ទ្ធ ឌី​ណា ឲ្យ​កាន់តំណែង​ជា​អនុប្រធាន​ពន្ធនាគារ​ខេត្តស្ទឹងត្រែង​។

ការផ្លាស់ប្ដូរ​មុខតំណែង​តួនាទី​ខាងលើនេះ​បន្ទាប់ពី​មាន​ករណី​អ្នកទោស​បទល្មើស​ឧក្រិដ្ឋ​ជួញដូរ​គ្រឿងញៀន​និង​បទល្មើស​ផ្សេងទៀត​បាន​រត់គេច​ពី​ក្នុង​ពន្ធ​ធនាគារ​ខេត្តស្ទឹងត្រែង​កាលពីពេល​កន្លង​ទៅហើយ​ក្រោយមក​ក៏​ចាប់បាន​មកវិញ​ទាំងអស់​៕​សរន