ដោយៈមុនីរ័ត្ន/​ភ្នំពេញៈលោក អ៊ុន វិ​សិទ្ធ​គុន ប្រធាន​គណ​ប​ក្យ​កម្លាំង​ប្រជាធិបតេយ្យ​បាន​បដិសេធ​ចំពោះ​ការលើកឡើង​របស់លោក អ៊ូ ច័ន្ទ​រ័ត្ន សហ​ស្ថាបនិក​គណបក្ស​កែទម្រង់​កម្ពុជាដែល​និយាយថា មាន​គណបក្សនយោបាយ​ចំនួន​ប្រាំមួយ​បាន​ចងសម្ព័ន្ធភាព​នឹង​គ្នា​នោះ គឺ​ពុំមែនជាការពិត​ឡើយ​។​

​យោងតាម​លិខិត​បដិសេធ​របស់លោក អ៊ុន វិ​សិទ្ធ​គុន ប្រធាន​គណ​ប​ក្យ​កម្លាំង​ប្រជាធិបតេយ្យ នៅ​ថ្ងៃទី​១៥ ខែកុម្ភៈ ឆ្នាំ​២០២២​បាន​បញ្ជាក់ថា គណ​ប​ក្យ​កម្លាំង​ប្រជាធិបតេយ្យសូម​បដិសេធ​ចំពោះ​ពាក្យសំដី​របស់លោក អ៊ូ ច័ន្ទ​រ័ត្ន សហ​ស្ថាបនិក​គណ បក្ស​កែទម្រង់​កម្ពុជា ដែល​បាន​បញ្ជាក់ប្រាប់​សារព័ត៌មាន កាលពី​ថ្ងៃទី​១៤ ខែកុម្ភៈ ឆ្នាំ​២០២២ ស្តីពី​គណបក្សនយោបាយ​ចំនួន​ប្រាំមួយ ដែល​បាន​ចងសម្ព័ន្ធភាព​នឹង​គ្នា​។ យោងទៅលើ​ខ្លឹមសារ​និង​អត្ថន័យ​នៅក្នុង ការចុះផ្សាយ​ជា​សាធារណៈ និង​ការលើកឡើង​របស់លោក អ៊ូ ច័ន្ទ​រ័ត្ន សហ​ស្ថាបនិក​គណបក្ស​កែទម្រង់​កម្ពុជា ពុំមាន​ការពិត​នោះឡើយ​។​គណ​ប​ក្យ​កម្លាំង​ប្រជា​ធិ​តយ្យ​ពុំ​ដែលមាន​ទំនាក់ទំនង​ឬ​បញ្ជូន​ថ្នាក់ដឹកនាំ​របស់​គណបក្ស​ទៅ​ចូលរួម​ប្រជុំ ដើម្បី​ស្វែងយល់​ពី​ការ​ចងសម្ព័ន្ធភាព​នឹង​គ្នា​នោះទេ​។​

លោក អ៊ូ ច័ន្ទរ័ត្ន(រូបថត ឯកសារ)

​សូមជម្រាបថា គណបក្សនយោបាយ​ចំនួន​ប្រាំមួយ ដែល​លោក អ៊ូ ច័ន្ទ​រ័ត្ន សហ​ស្ថាបនិក​គណបក្ស​កែទម្រង់​កម្ពុជា បាន​អះអាងថា ចងសម្ព័ន្ធភាព​នឹង​គ្នា​ដើម្បី​ត្រៀម​បង្កើត​គណបក្ស​ធំ​មួយ មានដូចជាៈ ១. គណបក្ស​កម្ពុជា​និយម របស់លោក​យ៉ែម បុញ្ញឫទ្ធិ​។ ២. គណបក្ស​ប្រជាធិបតេយ្យ​មូលដ្ឋាន​របស់លោក យ៉េ​ង វិ​រៈ​។ ៣. គណបក្ស​កែទម្រង់​កម្ពុ​ជា របស់លោក​អ៊ូ ច័ន្ទ​រ័ត្ន​។ ៤. គណបក្ស​ភ្លើងទៀន ។ ៥. គណបក្ស​បំណង​ពលរដ្ឋ របស់លោក អ៊ិត សារ​ម្យ និង​ទី​៦. គណបក្ស​កម្លាំង​ប្រជាធិបតេយ្យ របស់លោក អ៊ុន វិ​សិទ្ធ​គុន​៕សរន​