​ដោយៈម៉េង​ឆៃ / ភ្នំពេញៈ ចាប់ពី​ថ្ងៃទី​១៥​កុម្ភៈ​តទៅគណៈកម្មាធិការជាតិរៀបចំការបោះឆ្នោត( គ​.​ជ​.​ប.) ចាប់ផ្តើម​ការងារ​រប​ស់​ខ្លួន ក្នុងការ​រៀបចំ​ការបោះ​ឆ្នោត​ជ្រើសរើស​ក្រុមប្រឹក្សាឃុំ​សង្កាត់ អាណត្តិ​ទី​៥ ដោយ​ចាប់ផ្តើម​ចុះឈ្មោះអ្នកសង្កេត ការណ៍​ជាតិ​-​អន្តរជាតិ និង​អ្នកសារព័ត៌មាន​ជាតិ​-​អន្តរជាតិ​។ តាម​កម្មវិធីដែល​បាន​គ្រោងទុកការបោះឆ្នោត​ជ្រើសរើស​ក្រុមប្រឹក្សាឃុំ​សង្កាត់ អាណត្តិ​ទី​៥ នឹងធ្វើ​ឡើង នៅ​ថ្ងៃអាទិត្យ ទី​៥ ខែមិថុនា ឆ្នាំ​២០២២ ខាងមុខនេះ​។​

 

​តាម​ប្រតិទិនចាប់ពី​ថ្ងៃទី​១៥​កុម្ភៈ ដល់​ថ្ងៃទី​២៥​ឧសភា ឆ្នាំ​២០២២ គ​.​ជ​.​ប. ទទួល​ចុះឈ្មោះ​អ្នកសង្កេតការណ៍​ជាតិ និង​អ្នកសារព័ត៌មាន​ជាតិ​។ ចំណែក​អ្នកសង្កេតការណ៍​អន្តរជាតិ និង​អ្នកសារព័ត៌មាន​អន្តរជាតិ ក៏​អាច​ចុះឈ្មោះ​នៅ​គ​.​ជ​.​ប ចាប់ពី​ថ្ងៃទី​១៥ ខែកុម្ភៈ រហូតដល់​ថ្ងៃទី​១ ខែមិថុនា ឆ្នាំ​២០២២​។​

​ចំណែក​ការទទួល​ពាក្យសុំ​ចុះបញ្ជី​បេក្ខជន​នៃ​គណបក្សនយោបាយ ឈរឈ្មោះ​បោះឆ្នោត ដោយ​គណៈកម្មការ​ឃុំ​សង្កាត់​រៀបចំ​ការបោះឆ្នោត គឃ​.​សប នឹងធ្វើ​ឡើង រយៈពេល ៣​ថ្ងៃ ចាប់ពី​ថ្ងៃទី​៤ ដល់​ថ្ងៃទី​៦ ខែមីនា ឆ្នាំ​២០២២​។

​គ​.​ជ​.​ប. នឹង​ចែក​ប័ណ្ណ​ព័ត៌មាន​អ្នកបោះឆ្នោត នៅតាម​ភូមិ​ក្នុង​ឃុំ​សង្កាត់ ចាប់ពី​ថ្ងៃទី​១៧ ខែមេសា ដល់​ថ្ងៃទី ១៦ ខែឧសភា ហើយ​ការឃោសនាបោះឆ្នោត​ឃុំ​សង្កាត់ នឹងធ្វើ​ឡើង រយៈពេល ១៤​ថ្ងៃ ចាប់ពី​ថ្ងៃទី​២១ ខែឧសភា ដល់​ថ្ងៃទី​៣ ខែមិថុនា ឆ្នាំ​២០២២​។

​នៅ​ថ្ងៃអាទិត្យ ទី​៥ ខែមិថុនា ឆ្នាំ​២០២២ ជា​ថ្ងៃ​បោះឆ្នោត ការរាប់​សន្លឹកឆ្នោត និង​ការបិទ​ផ្សាយ​លទ្ធផល នៅ​ការិយាល័យ​បោះឆ្នោត​និ​មួយៗ​។ លទ្ធផល​បោះឆ្នោត​បណ្តោះអាសន្ន នឹងត្រូវ​បិទ​ផ្សាយ​ភ្លាមៗ នៅ​ថ្ងៃ​បោះឆ្នោត នា​ថ្ងៃទី​៥​មិថុនា ហើយ​គជប នឹង​ប្រកាស​ផ្សាយ​លទ្ធផល​បឋម​នៃ​ការបោះឆ្នោត នៅ​ថ្ងៃទី​៥-៦ ខែមិថុនា ឆ្នាំ​២០២២​។ ចំណែក​ថ្ងៃទី​២៦ ខែមិថុនា ឆ្នាំ​២០២២ ជា​ថ្ងៃ​ចុងក្រោយ នៃ​ការប្រកាស​ផ្សាយ​លទ្ធផល​ផ្លូវការ​នៃ​ការបោះឆ្នោត​។ ក្នុងនោះ ប្រសិនបើ​មាន​ករណី ត្រូវ​បោះឆ្នោត​សាជាថ្មី គឺ​នឹងត្រូវ​ធ្វើឡើង នៅ​ថ្ងៃទី​២៥ ខែកក្កដា ឆ្នាំ​២០២២ ដែលជា​ថ្ងៃ​ចុងក្រោយ​។​

​ការចេញដំណើរ​របស់​គជប លើ​ដំណើរការ​រៀបចំ​ការបោះ​ឆ្នោត​ឃុំ​សង្កាត់ អាណត្តិ​ទី​៥ នា​ថ្ងៃទី​៥ ខែមិថុនា ឆ្នាំ​២០២២ ធ្វើឡើង​ខណៈដែល​គណបក្ស​នយោបាយ​ជាច្រើន ក៏បាន​ចុះ​មូលដ្ឋាន ប្រជុំ​ថ្នាក់ដឹកនាំ ដាក់ចេញ​គោលនយោបាយ និង​រៀបចំ​បេក្ខជន សម្រាប់​ត្រៀម​ចូលរួម​ប្រកួតប្រជែង​ការបោះឆ្នោត​។

​របាយការណ៍​របស់​ក្រសួងមហាផ្ទៃ បង្ហាញថា គិត​ត្រឹម​ដំណាច់​ខែមករា ឆ្នាំ​២០២២ មាន​គណបក្សនយោបាយ​ទាំងចាស់​ទាំងថ្មី សរុប​ចំនួន ៤៥​គណបក្ស បាន​ចុះបញ្ជី​ឈ្មោះ​នៅ​ក្រសួងមហាផ្ទៃ​។ ក្នុងចំណោម​គណបក្ស​ទាំង ៤៥​នេះ មាន​គណបក្ស​បង្កើត​ថ្មី ក្រោយ​ការរំលាយ​គណបក្ស​សង្គ្រោះ​ជាតិ កាលពី​ថ្ងៃទី​១៧ ខែវិច្ឆិកា ឆ្នាំ​២០១៧ មាន​ចំនួន ១៣​គណបក្ស ហើយ​គណបក្ស ដែល​គេ​ដឹងថា កើតចេញពី​អតីត​ថ្នាក់ដឹកនាំ​អតីត​គណបក្ស​សង្គ្រោះ​ជាតិ មាន​យ៉ាងហោចណាស់ ៥​គណបក្ស រួមមាន​៖ ១-​គណបក្ស​ឆន្ទៈ​ខ្មែរ ដែល​លោក គង់ គាំ ចូលរួម​ដឹកនាំ​ជាមួយ​កូនប្រុស​ពៅ​របស់លោក ២-​គណបក្ស​ខ្មែរ​អភិរក្ស របស់​ក្រុម​លោក រៀល ខេ​ម​រិ​ន្ទ្រ ៣-​គណបក្ស​ខ្មែរ​ស្រឡាញ់​ជាតិ របស់លោក ជីវ កត្តា និង​លោក កង គឹម​ហាក់ ៤-​គណបក្ស​កែទម្រង់​កម្ពុ​ជា របស់លោក អ៊ូ ច័ន្ទ​រ័ត្ន និង​លោក ប៉ុល ហំ​ម និង​៥-​គណបក្ស​កម្ពុជា​និយម របស់លោក យ៉ែម បុញ្ញឫទ្ធិ​។​

​គណបក្សនយោបាយ​ទាំងចាស់ ទាំងថ្មី​ជាច្រើន បានធ្វើ​សកម្មភាព ចុះ​ពង្រឹង​មូលដ្ឋាន ប្រជុំ​រៀបចំ​បេក្ខជន​ជា​បណ្តើរៗ​។ ក្នុងនោះ គណបក្ស​បង្កើតឡើង​ថ្មីៗ​នេះ ចេញពី​អតីត​គណបក្សប្រឆាំង​សង្គ្រោះ​ជាតិ ក៏មាន​សកម្មភាព​ផុសផុល លើក​ស្លាក និង​ប្រមូល​សកម្មជន​អ្នកគាំទ្រ​នៅ​មូលដ្ឋាន​យ៉ាងច្រើន​ដែរ​។​

​ការបោះឆ្នោត​ឃុំ​សង្កាត់ កាលពី​ថ្ងៃទី​៤ ខែមិថុនា ឆ្នាំ​២០១៧ មាន​គណបក្សនយោបាយ ចំនួន ៧​ចូលរួម រួមមាន​៖ គណបក្ស​ប្រជាជន​កម្ពុជា គណបក្ស​សង្គ្រោះ​ជាតិ គណបក្ស​ហ្វ៊ុនស៊ិនប៉ិច គណបក្ស​សម្ព័ន្ធ​ដើម្បី​ប្រជាធិបតេយ្យ គណបក្ស​ខ្មែរ​រួបរួម​ជាតិ គណបក្ស​សំបុក​ឃ្មុំ​សង្គម​ប្រជាធិបតេយ្យ និង​គណបក្ស​ប្រជាធិបតេយ្យ​មូលដ្ឋាន​។

​ក៏ប៉ុន្តែ​ក្រោយ​ការរំលាយ​គណបក្ស​សង្គ្រោះ​ជាតិ នៅ​ថ្ងៃទី​១៧ ខែវិច្ឆិកា ឆ្នាំ​២០១៧ គឺ​នៅក្នុង​ការបោះឆ្នោតជាតិ នា​ខែកក្កដា ឆ្នាំ​២០១៨ ចំនួន​គណបក្សនយោបាយ ដែល​ចូលរួម​ការបោះឆ្នោត កើន​ឡើ​ដល់ ២០​គណបក្ស​។ តែ​ក្នុងចំណោម​គណបក្ស​ទាំង ២០​នោះ មិនទាន់មាន​អតីត​ថ្នាក់ដឹកនាំ​គណបក្ស​សង្គ្រោះ​ជាតិ ចេញទៅ​បង្កើត​គណបក្សនយោបាយ​នៅឡើយ​ទេ​។​

​ដូច្នេះ​ក្នុងពេល​គ.ជ.ប. ចេញដំណើរ​រៀបចំ​ការបោះឆ្នោត​ឃុំ​សង្កាត់ អាណត្តិ​ទី​៥ នា​ថ្ងៃទី​៥ ខែមិថុនា ឆ្នាំ​២០២២ នេះ គណបក្សនយោបាយ​ជាច្រើន ទាំងថ្មី​ទាំងចាស់ បានចេញ​ដំណើរ​យូរ​ខែ​មកហើយ ដើម្បី​រៀបចំ​ពង្រឹង​នៅ​មូលដ្ឋាន​ឃុំ​សង្កាត់​។ ប៉ុន្តែ​ទាល់តែ​ដល់​ថ្ងៃទី​៤-៦ ខែមីនា ឆ្នាំ​២០២២ ទើប​គេ​ដឹងថា មាន​គណបក្ស​ប៉ុន្មាន ដាក់​បេក្ខជន​ឈរឈ្មោះ​បោះឆ្នោត​ឃុំ​សង្កាត់ លើក​នេះ​។ តែ​គេ​រំពឹងថា ក៏​មិនតិចជាង​ឆ្នាំ​២០១៧ ឡើយ ព្រោះ​គ្រាន់តែ​អតីត​ថ្នាក់ដឹកនាំ​គណបក្សប្រឆាំង បាន​ចេញទៅ​បង្កើត​គណបក្ស ដែល​ច្បាប់​ទទួលស្គាល់ មាន​ដល់​ទៅប្រាំគណបក្ស​រួចទៅហើយ​៕​