​ដោយៈ មុនី​រ័ត្ន / ភ្នំពេញៈ លោក គិ​ស៊ិ ណូ​ប៊ុ​អូ ( KISHI Nobuo ) រដ្ឋមន្ត្រី​ការពារ ជាតិ​ជប៉ុន បានបង្ហាញ​ការគាំទ្រ ចំពោះ​តួនាទី​កម្ពុជា ក្នុងនាម​ជា ប្រធាន​អាស៊ាន ហើយ​ឆ្នាំ​២០២២ ជា​ឆ្នាំ​ប្រកបដោយ​អត្ថន័យ ជ្រាលជ្រៅ សម្រាប់​ទំនាក់ទំនង​ទ្វេភាគី កម្ពុជា​-​ជប៉ុន ដូច្នេះ​ដំណើរ​ទស្សនកិច្ច​ផ្លូវការ របស់លោក ហ៊ុន ម៉ា​ណែ​ត អគ្គ​មេបញ្ជាការរង នៃ​កងយោធពល​ខេមរភូមិន្ទ មេបញ្ជាការ​កងទ័ពជើងគោក នៅ​ជប៉ុន នាពេលនេះ នឹង​ជួយ​ដល់​ការពង្រឹង​ទំនាក់ទំនង រវាង​កម្ពុជា​-​ជប៉ុន ឱ្យ​កាន់តែខ្លាំង​ឡើង​បន្ថែមទៀត យ៉ាងពិត​ប្រាកដ​។​

​ការបង្ហាញ​ពី​ការគាំទ្រ​នេះ បាន​ធ្វើឡើង​នៅក្នុង​ជំនួប​ពិភាក្សា​ការងារ ជាមួយ​លោក​ឧ​ត្ត​ម សេនីយ៍​ឯក ហ៊ុន ម៉ា​ណែ​ត នៅ​ទីស្តីការក្រសួង​ការពារជាតិ​ជប៉ុន កាលពី​ថ្ងៃទី​១៥ ខែកុម្ភៈ ឆ្នាំ​២០២២​។ ដោយ​កិច្ចពិភាក្សា​នេះ ផ្តោតជាសំខាន់​លើ​គោលបំណង​រួម កម្ពុជា​-​ជប៉ុន ក្នុង​ការបន្ត​ពង្រឹង​ទំនាក់ទំនង ប្រកបដោយ​សក្តានុពល រវាង​ប្រទេស​ទាំងពីរ ជាពិសេស កិច្ចសហប្រតិបត្តិការ និង​ការផ្លាស់ប្តូរ​ផ្នែក​យោធា​។​

​ក្នុងជំនួប​នេះ លោក ហ៊ុន ម៉ា​ណែ​ត បាន​ជម្រាបជូន​លោក KISHI Nobuo អំពី​លទ្ធផល នៃ​កិច្ចពិភាក្សា​ជាមួយ​លោក អគ្គមេបញ្ជាការ កងកម្លាំង​ស្វ័យការពារ​ជប៉ុន និង​លោក មេបញ្ជាការ កងកម្លាំង​ស្វ័យការពារ​ជើងគោក​ជប៉ុន និង​បាន​ស្នើសុំ​ការគាំទ្រ លើ​ការបន្ត​កិច្ចសហប្រតិបត្តិការ រវាង​កងទ័ពជើងគោក នៃ​ប្រទេស​ទាំងពីរ ក៏ដូចជា ការជំរុញឱ្យ ទំនាក់ទំនង​នេះ បាន​ឈានឡើង ដល់​កម្រិត​ខ្ពស់​ឡើង បន្ថែមទៀត​។​

​ជាការ​ឆ្លើយតប លោក រដ្ឋមន្ត្រី បាន​វាយតម្លៃ​ខ្ពស់ ចំពោះ​កិច្ចខិតខំ​ប្រឹងប្រែង​រួមគ្នា រវាង​កម្ពុជា​-​ជប៉ុន ក្នុង​ការបន្ត​រក្សា​ទំនាក់ទំនង​ជិតស្និទ្ធ ក្នុង​វិស័យ​ការពារជាតិ និង​បាន​គាំទ្រ លើ​សំណើ​ផ្តួចផ្តើម​នានា របស់​កម្ពុជា ពាក់ព័ន្ធ​នឹង​ការពង្រឹង សមត្ថភាព​ធនធានមនុស្ស លើ​ជំនាញ​សំខាន់ៗ មួយចំនួន ដល់​កងទ័ព​កម្ពុជា ជាមួយនឹង​ការរំពឹង​ថា កម្ពុជា នឹង​ក្លាយ​ដៃគូ​ដ៏​ល្អ ក្នុងការ​ចូលរួមចំណែក ដល់​ការពង្រឹង និង​ថែរក្សា​សន្តិភាព នៅក្នុង​តំបន់​។​

​លោក រដ្ឋមន្ត្រី​ការពារជាតិ​ជប៉ុន និង​លោក មេបញ្ជាការ កងទ័ពជើងគោក​កម្ពុ​ជា ក៏បាន​ចូលរួម សម្តែង​ការអបអរសាទរ ចំពោះ​ខួប​លើក​ទី​៣០ នៃ​ការបញ្ជូន​កងកម្លាំង​ស្វ័យ ការពារ​ជើងគោក​ជប៉ុន ជា​លើកដំបូង ចូលរួម​ក្នុង​ប្រតិបត្តិការ រក្សា​សន្តិភាព (PKO) របស់ UNTAC នៅ​កម្ពុជា និង​ស្រប​ពេលដែល​ឆ្នាំ​២០២២​នេះ កម្ពុជា ក៏​កំពុង​បំពេញ​តួនាទី ជា​ប្រធាន​អាស៊ាន ផងដែរ​៕/V​