ដោយៈ សុវណ្ណ​កុម្ភៈ / ភ្នំពេញៈ ការប្រកួត​ប្រដាល់​គុន​ខ្មែរ​ជើងឯក​ជាតិ ដែល​កំពុងតែប្រព្រឹត្ត​ទៅនេះ បាន​បង្ហាញថា កីឡាករ វ័យក្មេងៗ​ជាច្រើន បាន​បង្ក​ឲ្យ​មានការ​ចាប់អារម្មណ៍​ខ្លាំង ។​

​មាន​អ្នក​ប្រដាល់​រៀមច្បង​មួយចំនួន ត្រូវបាន​អ្នក​ប្រដាល់ ដែល​គេ​មិន​ធ្លាប់​ស្គាល់ឈ្មោះ បង្ក្រាបបាន​។ អ្នក​ប្រដាល់ វ័យក្មេង​ទាំងនេះ ពុំ​ធ្លាប់​មានឱកាស​ឡើងប្រកួត តាម​បណ្ដា ស្ថានីយ៍ទូរទស្សន៍​នានា នៅ​រាជធានី​ភ្នំពេញ​ឡើយ​។ តែ​តាមរយៈការ​ប្រកួត​ជើងឯក​ជាតិ នេះ បានធ្វើ​ឲ្យ​អ្នកទស្សនា មានការ​ចាប់អារម្មណ៍​យ៉ាងខ្លាំង ។​

​លោក ម៉ិ​ល កាដូ ដែលជា​អនុប្រធាន​សហព័ន្ធ បានបញ្ជាក់​ថាៈ ពួកគេ មាន​វ័យក្មេងៗមែន តែ​ពួកគេ សុទ្ធ​ជា​អ្នកខ្លាំង តំណាង​ឲ្យ​សមាគម ក្រសួង រាជធានី ខេត្ត​របស់គេ​។ មុននឹង​ឡើង មក​ប្រកួត​ជើងឯក​ជាតិ​នេះ ពួកគេ​សុទ្ធតែ​បាន​ឆ្លងកាត់ ការប្រកួត​ជម្រុះ ជាមួយ​បណ្ដា​អ្នកខ្លាំង​នានា នៅក្នុង​សមាគម ក្រសួង រាជធានី ខេត្ត របស់​ពួកគេ ។​

​លោក​បាន​បន្តថាៈ តាមរយៈ ការប្រកួត​នេះ សហព័ន្ធ នឹង​រកបាន​ធនធាន​កីឡាករវ័យក្មេង ដែលមាន​គុណភាព​ល្អ កាន់តែ​ច្រើនឡើងៗ ជាមិនខាន​ឡើយ​។ ការប្រកួត​ជើងឯក​ជាតិ គឺជា​ឱកាស​តែមួយគត់ សម្រាប់​កីឡាករ វ័យក្មេងៗ បញ្ចេញ​នូវ​សមត្ថភាព​របស់ខ្លួន​។ បន្ទាប់ពី​ការប្រកួត​នេះ​ទៅ ពួកគេ​នឹង​ក្លាយជា​គូ​សំខាន់ៗ សម្រាប់​បណ្ដា​ស្ថានីយ៍ ទូរទស្សន៍​នានា ដែលមាន​កម្មវិធី​ប្រដាល់ ។​

​បើតាម​លោក​ឧ​ត្ត​ម​សេនីយ៍​ឯក តែម ម៉ឺន ដែលជា​ប្រធាន​សហព័ន្ធ​កីឡាប្រដាល់​គុន​ខ្មែរ នោះ​ថា សម្រាប់​ស៊ី​ហ្គេម​លើក​ទី​៣១ នៅ​ប្រទេស​វៀតណាម នា​ពាក់កណ្ដាល ឆ្នាំ​២០២២ នេះ ប្រដាល់​គុន​ខ្មែរ នឹង​ស្វែងរក​មេដាយ ឲ្យ​បានល្អ​ជាង​ស៊ី​ហ្គេម​លើក​ទី​៣០ នៅ​ប្រទេស ហ្វីលីពីន​។​ ​ជាមួយគ្នានេះដែរ សហព័ន្ធ បានដាក់​គោលដៅ​ស្វែងរក មេដាយមាស ឲ្យ​បាន​ចំនួន ៣ គ្រឿង សម្រាប់​ស៊ី​ហ្គេម​លើក​ទី​៣២ នា​ឆ្នាំ​២០២៣ ដែល​កម្ពុជា​ធ្វើជា​ម្ចាស់ផ្ទះ ។​

​លោក​ប្រមុខ​សហព័ន្ធ​ប្រដាល់​គុន​ខ្មែរ​រូបនេះ​បាន​បញ្ជាក់ថាៈ ការប្រកួត​ជើងឯក​ថ្នាក់ជាតិ ឆ្នាំនេះ លោក​ពិត​ជាមាន​ការចាប់​អារម្មណ៍ ចំពោះ​កីឡាករ វ័យក្មេងៗ​មែន​។ លោក​ចាត់ ទុក​ថា ពួកគេ ជា​ធនធាន​ស្រករ​ក្រោយ ជាទី​សង្ឃឹម របស់​សហព័ន្ធ​សម្រាប់​ការចូលរួម ប្រកួត ក្នុង​ក្របខ័ណ្ឌ​ស៊ី​ហ្គេម និង​ការប្រកួត ជា​លក្ខណៈ​អន្តរជាតិ​នានា​។​

​លោក​បាន​បញ្ជាក់ថាៈ ឆ្នាំ​២០២៣ កម្ពុជា នឹង​កាន់​តែមាន​អ្នក​ប្រដាល់​ល្អៗ ប្រកបដោយគុណភាព កាន់តែ​ច្រើនឡើងៗ ហើយ​អ្វី​ដែលជា​គោលដៅ ស្វែងរក​មេដាយមាស ៣ គ្រឿង នា​ឆ្នាំ​២០២៣ កាន់តែ​ស្ថិតក្នុង​ក្ដី​ស្រមៃ និង​ការ​មាន​​ជំនឿ​ចិត្ត​ កាន់តែ ខ្លាំង ៕/V​