​ដោយ​: សុវណ្ណ​កុម្ភៈ​/​ភ្នំពេញ​: កម្មវិធី​ប្រកួត​ព្រឹត្តិការណ៍ AFF U-23 Championship បាន​ប្រែប្រួល​ហើយ​ដោយសារតែ​ក្រុម​ឥណ្ឌូនេស៊ី និង​ក្រុម​ប្រទេស​មី​យ៉ាន់​ម៉ា​ដកខ្លួន​ចេញពី​ការប្រកួត​នោះ​។​

​សហព័ន្ធ​កីឡាបាល់ទាត់​មី​យ៉ាន់​ម៉ា (MFF) បាន​ជូនដំណឹង​ដល់​សហព័ន្ធ​កីឡាបាល់ទាត់​អាស៊ាន (AFF) នៅថ្ងៃនេះ​ថា ពួកគេ​បាន​ដកខ្លួន​ចេញពី​ពានរង្វាន់ AFF U-23 Championship 2022 ដោយសារ​ផលវិបាក​នៃ​ជំងឺ​កូ​វីដ​-១៩​។​

​ជា​ផ្នែក​មួយ​នៃ​វិធានការ​សុខភាព​និង​សុវត្ថិភាព​សម្រាប់​ការប្រកួត​ដែល​កំពុងដំណើរការ U-23 មី​យ៉ាន់​ម៉ា បាន​ឆ្លងកាត់​ការធ្វើ​តេស្ត​​ជាប្រចាំ​មុន​និង​ក្រោយ​ពេលមកដល់​កម្ពុជា​។ បន្ទាប់ពី​ការបញ្ជាក់​ពី​ការធ្វើ​តេស្ត​វិជ្ជមាន​ក្នុងចំណោម​កីឡាករ​មួយចំនួន​ការសម្រេចចិត្ត​មួយ​ត្រូវបាន​ធ្វើឡើង​ដោយ​មី​យ៉ាន់​ម៉ា ដោយ​ប្រកាស​ដក​ក្រុម​របស់ខ្លួន​ចេញពី​ការប្រកួត ដើម្បី​ជួយ​កាត់បន្ថយ​ហានិភ័យ​នៃ​ការឆ្លង​បន្ថែមទៀត​។ កីឡាករ និង​បុគ្គលិក​ដែល​ត្រូវបាន​គេ​កំណត់ថា ជា​អ្នកមាន​ទំនាក់ទំនង​ជិតស្និទ្ធ​ក៏ត្រូវ​បានដាក់​ឱ្យនៅ​ដាច់ដោយឡែក​ផងដែរ​។​

​លោក ខៀវ សា​ម៉េ​ត ប្រធាន​សហព័ន្ធ​កីឡាបាល់ទាត់​អាស៊ាន (AFF) មានប្រសាសន៍ថា លោក​ពិតជា​ការសោកស្តាយ​យ៉ាងខ្លាំង ដែល​ក្រុម U23 មី​យ៉ាន់​ម៉ា ដកខ្លួន​ចេញពី​ពានរង្វាន់ AFF U23 Championship​។ ទោះជា​យ៉ាងណាក៏ដោយ សុខភាព និង​សុវត្ថិភាព​របស់​អ្នក​គ្រប់គ្នា​ដែល​ពាក់ព័ន្ធ គឺមាន​សារសំខាន់​បំផុត ហើយ​យើង​យល់ច្បាស់​អំពី​ការសម្រេចចិត្ត​ដែល​បានធ្វើ​ឡើង​។ យើង​សូម​ជូនពរ​សមាជិក​ដែល​រង​ផលប៉ះពាល់ បានជា​សះស្បើយ​ពេញលេញ និង​ឆាប់រហ័ស​។​

​សូមបញ្ជាក់ថា​ព្រឹត្តិការណ៍​នេះ​ចែកចេញជា​៣​ពូ​ល ដែល​ពូ​ល A កម្ពុជា ទី​ម័​រ​ខាងកើត ហ្វីលីពីន និង ប្រ៊ុយណេ​។ ពូ​ល​B ដំបូង​ឡើយ​ក៏មាន​៤​ក្រុម​ដែរ គឺ​ឥណ្ឌូនេស៊ី ម៉ាឡេស៊ី មី​យ៉ាន់​ម៉ា និង ឡាវ​។ ពេលនេះ​បន្ទាប់ពី​ឥណ្ឌូនេស៊ី និង មី​យ៉ាន់​ម៉ា​ដកខ្លួន​ចេញ​បានធ្វើ​ឲ្យ​ពូ​ល B មានតែ​២​ក្រុម​ប៉ុណ្ណោះ គឺ​ម៉ាឡេស៊ី និង ឡាវ​។ ចំណែក​ពូ​ល C មាន​៣​ក្រុម គឺ​ក្រុម​ថៃ វៀតណាម និង សឹង្ហ​បូរី ។​

​ក្នុង​កម្មវិធី​ប្រកួត​ថ្មី​គឺ​ថ្ងៃទី​១៤ កុម្ភៈ ដែល​កន្លងមក​ទី​ម័​រ​ប្រកួត​ជាមួយ​ហ្វីលីពីន និង កម្ពុជា​ប្រកួត​ជាមួយ​ប្រ៊ុយណេ ថ្ងៃទី​១៥ កុម្ភៈ ម្សិលមិញ ដែល​ត្រូវមាន​២​ប្រកួត ដែលជា​ការប្រកួត​សម្រាប់​ពូ​ល B គឺ​ម៉ាឡេស៊ី​ត្រូវ​ជួប​ជាមួយ​មី​យ៉ាន់​ម៉ា និង ឥណ្ឌូនេស៊ី​ប្រកួត​ជាមួយ​ឡាវ​។ តែ​ការ​​ប្រកួត​ថ្ងៃទី​១៥ កុម្ភៈ ត្រូវបាន​លើក​ពេល​ដោយសារតែ​ការដកខ្លួន​ចេញ​របស់​ក្រុម​ទាំង​២​នេះ ។​ចំពោះ​កម្មវិធី​ប្រកួត​ថ្មី​នោះ​ថ្ងៃទី​១៦ កុម្ភៈ​នេះ ថៃ​ជួប​ជាមួយ​សឹង្ហ​បូរី​ដែល​នេះ​ជាការ​ប្រកួត​សម្រាប់​ពូ​ល C​។ ថ្ងៃទី​១៧ កុម្ភៈ ដែលជា​ការ​ប្រកួត​សម្រាប់​ពូ​ល A ប្រ៊ុយណេ​ជួប​ជាមួយ​ទី​ម័​រ​ខាងកើត និង​ហ្វីលីពីន​ជួប​ជាមួយ​កម្ពុជា​។ ថ្ងៃទី​១៨ កុម្ភៈ ដែលជា​ការប្រកួត​សម្រាប់​ពូ​ល B ដែលមាន​តែមួយ​ប្រកួត​នោះ ឡាវ​ជួប​ជាមួយ​ម៉ាឡេស៊ី​។ សម្រាប់​ក្រុម​ទាំង​២​នេះ បើ​​នរណា​ឈ្នះ​នឹង​ឡើងទៅ​កាន់​វគ្គ​ពាក់កណ្ដាល​ផ្ដាច់ព្រ័ត្រ​តែម្ដង​។ ថ្ងៃទី​១៩ កុម្ភៈ សឹង្ហ​បូរី ជួប​ជាមួយ​វៀតណាម ថ្ងៃទី​២០ កុម្ភៈ ដែលជា​ថ្ងៃ​ប្រកួត​បញ្ចប់​ពូ​ល A កម្ពុជា​ប្រកួត​ជាមួយ​ទី​ម័​រ​ខាងកើត និង​ក្រុម​​ហ្វីលីពីន​ជួប​ជាមួយ​ប្រ៊ុយណេ​។ ថ្ងៃទី​២២​កុម្ភៈ​ដែល​ត្រូវ​ប្រកួត​បញ្ចប់​ពូ​ល C ក្រុម​ក្រុម​វៀតណាម​ជួប​ជាមួយ​ក្រុម​ថៃ​។ ថ្ងៃទី​២៤ កុម្ភៈ គឺជា​ការប្រកួត​វគ្គ​ពាក់កណ្ដាល​ផ្ដាច់ព្រ័ត្រ និង ថ្ងៃទី​២៦ កុម្ភៈ គឺជា​ការប្រកួត​ផ្ដាច់ព្រ័ត្រ​រក​ក្រុម​ជើងឯក ជើងឯក​រង និង​​ក្រុម​ចំណាត់ថ្នាក់​លេខ​៣ ៕​