ដោយៈមុនីរ័ត្ន,សុផល/ភ្នំពេញៈ​លោក ហ៊ុន ម៉ា​នី ប្រធាន​គណៈកម្មការ​ទី​៧​នៃ​រដ្ឋសភា បានទទួល​ជួបពិភាក្សា​ការងារ​ជាមួយ លោក Vivian Balakrishnan រដ្ឋមន្ត្រីការបរទេសនៃ​សាធារណរដ្ឋ​សិង្ហបូរីកាល​ព្រឹក​ថ្ងៃទី​១៦ ខែកុម្ភៈ ក្នុងឱកាស​ដែល​ឯកឧត្តម​អញ្ជើញ​បំពេញ​ទស្សនកិច្ច​ផ្លូវការ​នៅ​ព្រះរាជាណាចក្រ​កម្ពុជា និង​ចូលរួម​កិច្ចប្រជុំ​ថ្នាក់​រដ្ឋមន្ត្រីការបរទេស​អាស៊ាន​។

​អ្នកតាមដានផ្នែកនយោបាយនៅកម្ពុជាកត់សម្គាល់ថា នេះ​ជា​ជំនួប​សារជាថ្មី បន្ទាប់ពី​ថ្នាក់ដឹកនាំ​ទាំងពីរ​បាន​ជួបគ្នា​កាលពី​ឆ្នាំ​២០១៧​កន្លងទៅ​។ ជំនួប​នាពេលនោះ ក៏បាន​ពិភាក្សា​បន្ត​ស្មារតី​នៃ​ទំនាក់ទំនង​ល្អ​ដែល​បាន​ចាក់ឫស​រឹងមាំ​រវាង​មេដឹកនាំ ​ទាំងពីរ គឺ​សម្តេច​អគ្គមហាសេនាបតី​តេ​ជោ ហ៊ុន សែន និងលោក លី ស៊ាន​ឡុង ដើម្បីឱ្យ​ទំនាក់ទំនង​ទ្វេភាគី​កាន់តែ​រីកចម្រើន​បន្តទៅ​ដល់​ជំនាន់​ក្រោយ​។

​ប្រភពបញ្ជាក់ថា ជំនួបខាងលើភាគី​ទាំងពីរ បាន​ពិភាក្សា​ផ្លាស់ប្តូរ​យោបល់​អំពី​ទំនាក់ទំនង​ទ្វេភាគី​នៃ​ប្រទេស​ទាំងពីរ​ដែល​ក្នុងនាម​ជា​ប្រទេស​រួម​សហគមន៍​អាស៊ាន​តែមួយ​។ កិច្ចពិភាក្សា​បាន​ផ្តោត​សំខាន់​លើ​ការបន្ត​រឹតចំណង​មិត្តភាពរ​វា​ង​ប្រជាជន និង​ប្រជាជន និង​ការស្វែងយល់​ពី​តម្រូវការ​របស់​ប្រជាជន​វ័យក្មេង​នៃ​ប្រទេស​ទាំងពីរ​។

​ភាគី​ទាំង​ពីរបាន​ពិភាក្សា ផ្លាស់ប្តូរ​យោបល់ និង​បទពិសោធន៍​ក្នុង​ក្របខ័ណ្ឌ​នៃ​ការងារ​យុវជន​របស់​ប្រទេស​ទាំងពីរ និង​បានបង្ហាញ​ជំហរ​ក្នុង​ការពង្រឹង​ទំនាក់ទំនង​យុវជន​នៃ​ប្រទេស​ទាំងពីរ​ក្នុងការ​ស្វែងយល់​ពីគ្នា​ទៅវិញទៅមក​កាន់តែច្រើន តាមរយៈ​ការបង្កើន​ការផ្លាស់ប្តូរ​ឱកាស​ជំនួប និង​គម្រោង​ការងារ​រ​វាង​យុវជន​អ្នក​បន្តវេន​ជំនាន់​ក្រោយ​។

​ដោយឡែក នា​រសៀល​ថ្ងៃ​នេះ លោករដ្ឋមន្រ្តីការបរទេសសិង្ហបូរីក៏នឹង​អញ្ជើញ​ចូលជួប​សវន​ការសម្តែង​ការគួរសម​ជាមួយ​សម្តេច​​តេ​ជោ ហ៊ុន សែន នាយករដ្ឋមន្ត្រី​នៃ​​កម្ពុជា​​៕សរន