​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ អ្នក​ប្រដាល់​និមិត្តរូប​ហ្វីលីពីន​និង​ជា​បេក្ខជន​ប្រធានាធិបតី មែន​នី ប៉ាក​គី​អៅ បាន​និយាយថា​លោក​នឹង​ស្វាគមន៍​ការស៊ើបអង្កេត​អន្តរជាតិ​លើ​សង្គ្រាម​​បង្ហូរ​ឈាម​របស់​ប្រធានាធិបតី​រ៉ូ​ឌ្រី​ហ្គោ ឌុយ​ទែត លើ​គ្រឿងញៀន ប្រសិនបើ​ជាប់ឆ្នោត ហើយ​សន្យាថា​នឹង​ប្រយុទ្ធប្រឆាំង​នឹង​គ្រឿងញៀន “​តាម​វិធី​ត្រឹមត្រូវ​” ជាមួយនឹង​ដំណើរការ​ត្រឹមត្រូវ​មិនមែន​​ជា​ការបាញ់ប្រហារ​តាម​ដងផ្លូវ​នោះ​ទេ​។​

​នៅក្នុង​ការកត់សម្គាល់​ក្នុង​សប្តាហ៍​នេះ​ទៅ​កាន់​អ្នកសារព័ត៌មាន​បរទេស លោក​ប៉ាក​គី​អៅ ដែល​ជា​អតីត​ជើងឯក​ប្រដាល់​ពិភពលោក​ពហុ​ស្ថាប័ន​និង​ធ្លាប់​ជា​សម្ពន្ធមិត្ត​ដ៏​រឹងមាំ​របស់​ប្រធានាធិបតី​​ឌុយ​ទែត បាន​និយាយថា លោក​នឹង​បើកចំហ​ក្នុង​ការចូលរួម​ជាមួយ​តុលាការ​ឧក្រិដ្ឋកម្ម​អន្តរជាតិ (ICC)​ដែល​លោក​ឌុយ​ទែត​បានដក​ហ្វីលីពីន​ចេញ​ជា​ឯកតោភាគី​កាលពី​ឆ្នាំ ២០១៨​។​

​ទោះ​យ៉ាងណា​ប៉ាក​គី​អៅ​កំពុង​តាម​ពីក្រោយ​ក្នុង​ការស្ទង់មតិ​នៅ​មុន​ការបោះឆ្នោត​ខែ​ឧសភា ដោយ​ចាញ់ ៥០ ពិន្ទុ​ពី​អ្នក​នាំមុខ គឺ​លោក ហ្វែរ​ឌីណ​ង់ ម៉ាកូ​ស ជូនៀ (Ferdinand Marcos Jr.)​។​

​អាណត្តិ​ប្រធានាធិបតី​របស់លោក​ឌុយ​ទែ​តត្រូវ​បាន​សំគាល់​ដោយ​សង្គ្រាម​របស់​លោក​លើ​គ្រឿងញៀន ដែល​ក្នុង​អំឡុងពេល​នោះ​អ្នកជួញដូរ​គ្រឿងញៀន​ជាច្រើន​ពាន់​នាក់​ត្រូវបាន​សម្លាប់​។​

​ក្រុម​សិទ្ធិ​មនុស្ស​និង​អ្នក​រិះគន់​បាន​និយាយថា អ្នកអនុវត្ត​ច្បាប់​បាន​ប្រហារជីវិត​ជនសង្ស័យ​គ្រឿងញៀន​នៅ​ក្រៅ​ប្រព័ន្ធ​តុលាការ​តាម​ការយល់ព្រម​ពី​ប្រធានាធិបតី ប៉ុន្តែ​ប៉ូលិស​និយាយថា​អ្នក​ដែល​ត្រូវ​​បាន​សម្លាប់​គឺ​ជា​ជនសង្ស័យ​គ្រឿងញឿន​ប្រដាប់អាវុធ​និង​បាន​តតាំង​ដោយ​ហិង្សា​ចំពោះ​ការចាប់ខ្លួន​។​

​ប៉ាក​គី​អៅ​អាយុ ៤៣ ឆ្នាំ​បាន​ព្យាយាម​បំបែក​ខ្លួន​គាត់​ចេញ​ពី​លោក​ឌុយ​ទែត ដោយ​និយាយថា គាត់​នឹង “​បន្ត​សង្គ្រាម​លើ​គ្រឿងញៀន​ខុសច្បាប់​”​ដោយ​ជនសង្ស័យ​នឹង​ត្រូវ​បាន​ផ្តល់​ការកាត់ក្តី​ដោយ​យុត្តិធ​​ម៌​និង​ស្តារនីតិសម្បទា​ឡើងវិញ​។​

​លោក​បាន​និយាយ​កាលពី​ថ្ងៃ​ចន្ទ​ថា “​នៅ​ពេល​ខ្ញុំ​និយាយ វិធី​ត្រឹមត្រូវ យើង​នឹង​មិន​សម្លាប់​ពួកគេ​នៅ​តាម​ដងផ្លូវ​ទេ​។ ពួកគេ​នឹង​ត្រូវ​ផ្តល់​សិទ្ធិ​ការពារ​ខ្លួន​នៅ​តុលាការ​”​។​

​លោក​ឌុយ​ទែតបាន​បង្កកំហឹង​ជា​អន្តរជាតិ​ជាមួយ​នឹង​សង្គ្រាម​គ្រឿងញៀន​របស់​គាត់ ហើយ​ថែមទាំង​ផ្គើន​ឱ្យ ICC ស៊ើបអង្កេត​គាត់​ពី​បទ​ឧក្រិដ្ឋកម្ម​ប្រឆាំង​មនុស្ស​ជាតិ​ទៀត​ផង​។​លោក​នៅតែ​និយាយ​ថា​ អ្នក​ដែល​ត្រូវបាន​បាញ់សម្លាប់​គឺ​សុទ្ធតែ​ជា​អ្នកជួញដូរ​គ្រឿងញៀន ដែល​តតាំង​យ៉ាង​ហិង្សា​ចំពោះ​ការចាប់ខ្លួន និង​បាន​លើកទឹកចិត្ត​ជា​សាធារណៈ​ឱ្យ​ប៉ូលិស​បាញ់សម្លាប់​ជនសង្ស័យ​ដើម្បី​ការពារ​ខ្លួន ហើយ​និយាយ​ថា លោក​នឹង​លើកលែង​ទោស​អ្នក​ដែល​ជាប់គុក​ពី​បទ​សម្លាប់​ពួក​គ្រឿងញៀន​ទាំងនោះ​៕

​ប៉ាក​គី​អៅ​នឹងមិន​បាញ់​ស្លាប់​ជនសង្ស័យ​គ្រឿងញៀន​ដូច​លោក​ឌុយ​ទែត​ទេ ប្រសិនបើ​ជាប់ឆ្នោត​