ប្រែ​សម្រួល : កញ្ញា​ដា​លី​ស (​ដេល្លីម៉េ​ល​) ៖ ប្រមុខ​ចារកម្ម​យោធា​របស់​អង់គ្លេស​បាន​ព្រមាន​ថា រុស្ស៊ី​កំពុង​បន្ត​ចល័ត​កម្លាំង​ឆ្ពោះ​ទៅ​ព្រំដែន​ជាមួយ​អ៊ុ​យក្រែន បើទោះបីជា​មាន​ការអះអាង​ដោយ​ក្រុង​មូ​ស្គូថា ខ្លួន​បាន​ដកទ័ព​ចេញ​ក៏ដោយ​។​

​ឧត្តមសេនីយ៍ឯក សៀ ជី​ម ហុក​កិន​ហ៊ូ​ល (Sir Jim Hockenhull)​ជា​ប្រធាន​ផ្នែក​ចារកម្ម​ការពារជាតិ បាន​និយាយថា មានការ​ឃើញ​ការបន្ថែម​រថពាសដែក ឧទ្ធម្ភាគចក្រ និង​មន្ទីរពេទ្យ​ទីវាល​មួយ ចល័ត​ទី​ទៅកាន់​តំបន់​ព្រំដែន​។​

​ការព្រមាន​យ៉ាង​ម៉ឺងម៉ាត់​របស់​គាត់​បានកើត​ឡើង​បន្ទាប់​ពី​រដ្ឋមន្ត្រី​ការពារ​ជាតិ​ណា​តូ ដែល​ជួប​ប្រជុំ​នៅ​ទីក្រុង​ព្រុច​សែ​ល បាន​និយាយថា​ពួកគេ​មិន​បាន​ឃើញ​ភស្តុតាង​ណាមួយ​ដើម្បី​គាំទ្រ​ការអះអាង​​របស់​រុស្ស៊ី​ថា ខ្លួន​បាន​ចាប់ផ្តើម​ដក​កងទ័ព​ទៅកាន់​មូលដ្ឋាន​របស់​ពួក​គេ​វិញ​នោះទេ​។​

​នៅក្នុង​សេចក្តីថ្លែងការណ៍​ដែល​ចេញ​ដោយ​ក្រសួង​ការពារជាតិ ឧត្តមសេនីយ៍ ហុក​កិន​ហ៊ូ​ល បាន​និយាយថា “​ផ្ទុយទៅនឹង​ការអះអាង​របស់​ពួកគេ​រុស្ស៊ី​នៅតែ​បន្ត​បង្កើន​សមត្ថភាព​យោធា​នៅ​ជិត​​អ៊ុ​យក្រែន​។ នេះ​រួម​បញ្ចូល​ទាំង​ការមើលឃើញ​ការបន្ថែម​រថពាសដែក ឧទ្ធម្ភាគចក្រ និង​មន្ទីរពេទ្យ​ទីវាល​មួយ ដែល​កំពុង​ធ្វើ​ដំណើរ​ឆ្ពោះ​ទៅ​ព្រំដែន​អ៊ុ​យក្រែន​។ រុស្ស៊ី​មាន​កម្លាំងយោធា​សម្រាប់​ធ្វើ​ការឈ្លានពាន​អ៊ុ​យក្រែន​”​។​

​មុននេះ រដ្ឋមន្ត្រី​ការពារជាតិ​របស់​សម្ពន្ធមិត្ត​ណាតូ​បាន​និយាយថា ពួកគេ​នៅតែ​មាន “​ការព្រួយបារម្ភ​យ៉ាងខ្លាំង​” ចំពោះ​ការបង្កើន​យោធា​រុស្ស៊ី​ហើយ​ជា​ថ្មី​ម្តងទៀត​បាន​ជំរុញ​ឱ្យ​វិមាន​ក្រឹម​ឡាំង​ត្រឡប់​ទៅរក​ “​ផ្លូវ​ការទូត​” ស្រប​តាម​ការប្តេជ្ញា​ចិត្ត​ជា​អន្តរជាតិ​របស់​ខ្លួន​។​

​អគ្គលេខាធិការ​អង្គការ​ណា​តូ​លោក ជែន ស្តូល​ធិន​បឺក (Jens Stoltenberg)​បាន​និយាយថា ណា​តូ​កំពុង​ពិចារណា​បង្កើត​ក្រុម​សមរភូមិ​ថ្មី​នៅ​អឺរ៉ុប​ភាគ​កណ្តាល ភាគ​ខាងកើត និង​ភាគ​អាគ្នេយ៍ ដើម្បី​ទប់ទល់​នឹង​ការគំរាមកំហែង​ពី​ទីក្រុង​មូ​ស្គូ ដែល​លោក​ពណ៌នា​ថា​ជា “​រឿង​ធម្មតា​ថ្មី​”៕

ឧត្តមសេនីយ៍ ហុក​កិន​ហ៊ូ​ល និយាយថា រុស្ស៊ី​នៅតែ​បន្ត​ចល័ត​រថពាសដែក​ចូល​មក​ជិត​ព្រំដែន​អ៊ុ​យក្រែន