​ដោយៈ ចាន់តូ​/​ភ្នំពេញៈ បុរស​ម្នាក់​ដែល​ជិះ​ម៉ូតូ​ក្នុង​ល្បឿន​លឿន បាន​ជ្រុល​បុក​គូទ រថយន្ត​កុងតឺន័រ​ពីក្រោយ​កំពុង​ចត​លើ​ចិញ្ចើមផ្លូវ​ពេញទំហឹង បាន​ស្លាប់បាត់​បង់ជីវិត​ពេលដែល​បញ្ជូនទៅ​សង្គ្រោះ​នៅឯ​មន្ទីរពេទ្យ​។ ហេតុការណ៍​នេះ​កើតឡើង កាល​វេលា​ម៉ោង​១១:៣០​យប់​ថ្ងៃទី​១៦ ខែកុម្ភៈ ឆ្នាំ​២០២២ ស្ថិត​តាម​បណ្ដោយ​ផ្លូវ​ភ្នំពេញ​ហាណូយ ជិត​ស្តុ​ប​វិមាន​ឈ្នះ ឈ្នះ​ប្រមាណ​២០០​ម៉ែត្រ​ក្នុង​សង្កាត់​ឃ្មួញ ខណ្ឌ​សែន​សុខ ។​

​សព​ជនរងគ្រោះ​មានឈ្មោះ ផាន់​នី ផាន់​ណា ភេទ​ប្រុស អាយុ​២៥​ឆ្នាំ ស្នាក់នៅ​ភូមិ​ស្វាយប៉ាក ខណ្ឌ​ឬ​ស្សី​កែវ​។ មាន​ស្រុកកំណើត​ស្រុក​ស្អាង ខេត្តកណ្ដាល​។​

​បុរសរងគ្រោះ​ជិះ​ម៉ូតូ​ស៊ូ​ម័​រអិច ពណ៌​ក្រហម​លា​យស ពាក់​ស្លាក​លេខ ភ្នំពេញ ១DO ៣៥៣២ ធ្វើដំណើរ​ពី​ត្បូង​ទៅ​ជើង​ក្នុង​ល្បឿន​យ៉ាង​លឿន លុះ​មកដល់​ចំណុចកើតហេតុ​ខាងលើ​បាន​ជ្រុល​ទៅបុក​គូទ​រថយន្ត​កុងតឺន័រ ពីក្រោយ ក្បាល​ពណ៌​ស ពាក់​ស្លាក​លេខ កំពុងចាម ៣B ០២៦៧ ពេញទំហឹង​បណ្ដាលឱ្យ​បោក​ក្បាល​នឹង​គូទ​រថយន្ត​រងរបួស​ធ្ងន់​ត្រូវបាន​រថយន្ត​សា​ម៉ុ​យ​មន្ទីរពេទ្យ​ឯកជន​ដឹក​យកទៅ​សង្គ្រោះ ដោយ​ស្ថានភាព​របួស​ធ្ងន់ធ្ងរ​ពេក​ជនរងគ្រោះ​ក៏​ស្លាប់បាត់​បង់ជីវិត​៕​